ភ្នំពេញ ៖ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានអះអាងថា មកដល់ពេលនេះ នៅលើពិភពលោក មានការប្រកួតប្រជែងមនោគមន៍វិជ្ជា រវាងមហាអំណាច និងមហាអំណាច ដើម្បីដណ្តើមយកឧត្តមភាពលើភូមិសាស្ត្រនយោបាយ ដើម្បីយកប្រៀបលើដៃគូរបស់ខ្លួន ធ្វើឲ្យប្រទេសទន់ខ្សោយមួយចំនួនស្ថិតនៅក្រោមឥទ្ធិពលរបស់ខ្លួន ប៉ុន្តែការស្ថិតនៅក្រោមឥទ្ធិពលបរទេស ក៏អាស្រ័យលើជំហររបស់មេដឹកនាំប្រទេសទាំងនោះផងដែរ ដូច្នេះមហាអំណាចគួរកុំយកកម្ពុជា ធ្វើជាភូមិសាស្ត្រនយោបាយរបស់ខ្លួន។
លោក សុខ ឥសាន លើកឡើងបែបនេះ បន្ទាប់ពីមើលឃើញថា មានមហាអំណាចខ្លះ ជាពិសេសសហរដ្ឋអាមេរិក បានព្យាយាមត្រួតត្រាលើប្រទេសតូចតាច មានកម្ពុជាជាដើម ដោយដាក់លក្ខខណ្ឌគ្រប់បែបយ៉ាង ដើម្បីឲ្យប្រទេសទន់ខ្សោយធ្វើតាមខ្លួន ហើយបើមិនធ្វើទេ គេអាចដាក់ការគាបសង្កត់ផ្សេងៗ។
ទាក់ទងបញ្ហានេះ លោក សុខ ឥសាន លើកឡើងយ៉ាងនេះថា “នៅលើពិភពលោក មានការប្រកួតប្រជែងមនោគមន៍វិជ្ជារវាងលោកខាងលិច និងលោកខាងកើត ដើម្បីដណ្តើមយកឧត្តមភាពលើភូមិសាស្ត្រនយោបាយ យកប្រៀបលើភាគីម្ខាងទៀត ដែលធ្វើឲ្យប្រទេសទន់ខ្សោយមួយចំនួនស្ថិតនៅក្រោមឥទ្ធិពលរបស់ប្រទេសធំ មហាអំណាច ប៉ុន្តែការស្ថិតនៅក្រោមឥទ្ធិពលបរទេស ក៏អាស្រ័យលើជំហររបស់មេដឹកនាំប្រទេសទាំងនោះដែរ។ ដូចករណីកម្ពុជា រាជរដ្ឋាភិបាលកម្ពុជា បានប្រកាន់ខ្ជាប់លើនយោបាយការបរទេសអព្យាក្រឹត្យអចិន្ត្រៃយ៍ មិនចូលបក្សសម្ព័ន្ធ ដែលបានកំណត់ក្នុងរដ្ឋធម្មនុញ្ញ ដោយកសាងទំនាក់ទំនងល្អជាមួយបណ្តាប្រទេសលើសកលលោក ដោយមិនប្រកាន់ជាតិសាសន៍ ពណ៌សម្បុរ ជំនឿសាសនា និន្នាការនយោបាយ និងមនោគមន៍វិជ្ជា ដោយឈរលើមូលដ្ឋានគោរពឯករាជ្យ អធិបតេយ្យភាព បូរណភាពទឹកដីផងគ្នា មិនលូកចូលកិច្ចការផ្ទៃក្នុងផងគ្នា គោរពគ្នា ស្មើសិទ្ធិ ស្មើភាពគ្នា ក្នុងនាមជាសមាជិកពេញសិទ្ធិនៃ អសប ដូចគ្នា”។
ទោះយ៉ាងណាក្តី នៅក្នុងទំនាក់ទំនងទ្វេភាគីរវាងកម្ពុជាជាមួយប្រទេសនានា លោក សុខ ឥសាន អះអាងថា មានចំណុចពិសេសដោយឡែកៗ អាស្រ័យលើនយោបាយ និងអាកប្បកិរិយារបស់ប្រទេសនីមួយៗ ដូចជា ទី១- ជាមួយប្រទេសចិន គឺជាមិត្តចាស់ ជាមិត្តជាទីទុកចិត្ត មានទំនាក់ទំនងជាយុទ្ធសាស្ត្រគ្រប់ជ្រុងជ្រោយ គោរព និងឲ្យតម្លៃគ្នាទៅវិញទៅមក ជួយគ្នានៅគ្របកាលៈទេសៈ ដើម្បីផលប្រយោជន៍រួម និងរៀងខ្លួន។ ទី២- ជាមួយវៀតណាម ជាទំនាក់ទំនងជាប្រពៃណីជាបងប្អូន ភូមិផងរបងជាមួយ ជាប្រទេសជិតខាងល្អ គោរពគ្នាស្មើភាពគ្នា គោរពឯករាជ្យ អធិបតេយ្យភាព បូរណភាពទឹកដីផងគ្នា ចេះជួយគ្នាទៅវិញទៅមកនៅគ្រប់កាលៈទេសៈជាពិសេសពេលមានទុក្ខលំបាកឈរលើស្មារតីអន្តរជាតិអធន។ ទី៣- ជាមួយសហរដ្ឋអាមេរិក និងបណ្តាប្រទេសនៅសហគមន៍អឺរ៉ុប ដោយឈរលើគោលការណ៍ស្មើសិទ្ធិ ស្មើភាព ក្នុងនាមជាសមាជិក អសប ដូចគ្នា ជាពិសេសមិនជ្រៀតជ្រែកចូលកិច្ចការផ្ទៃក្នុងផងគ្នា គោរព និងអនុវត្តកិច្ចព្រមព្រៀងទីក្រុងប៉ារីស ថ្ងៃ២៣ តុលា ៩១ តាមការសន្យា។
តាមលោក សុខ ឥសាន ផ្អែកលើមូលដ្ឋានខាងលើនេះ កម្ពុជារក្សាសិទ្ធិស្វ័យសម្រេចរបស់ខ្លួននូវនយោបាយការបរទេសដែលបានកំណត់ក្នុងរដ្ឋធម្មនុញ្ញ មិនអាចចោទថា កម្ពុជាលំអៀងទៅខាងនេះ ខាងនោះ បានជាដាច់ខាត។ ប្រទេសណាមាននយោបាយការបរទេសយ៉ាងណា ជារឿងរបស់គេ កម្ពុជាមិនលូកដៃចូលឡើយ កុំឲ្យតែគេលូកដៃចូលកិច្ចការផ្ទៃក្នុងកម្ពុជា ពីព្រោះកម្ពុជាធ្លាប់បានឆ្លងកាត់ដំណាក់កាលប្រវត្តិសាស្ត្រដ៏ជូរចត់រួចមកហើយ។
អ្នកនាំពាក្យគណបក្សប្រជាជនកម្ពុជាបញ្ជាក់ថា បច្ចុប្បន្នកម្ពុជាទើបរកបានសន្តិភាព ស្ថិរភាពនយោបាយ និងអភិវឌ្ឍន៍ប្រទេសជាតិ ឲ្យមានការរីកចម្រើនដូចសព្វថ្ងៃ ដូច្នេះសុំតែសេចក្តីសុខប៉ុណ្ណោះ ហើយប្រទេសមហាអំណាចគួរកុំចូលចិត្តលូកដៃចូលកិច្ចការផ្ទៃក្នុងកម្ពុជា កុំចង់យកកម្ពុជា ធ្វើជាភូមិសាស្ត្រនយោបាយរបស់ខ្លួន៕
Source: Kampuchea Thmey Daily
0 Comments