រតនគិរី ៖ បុរសម្នាក់ក្រោយពីបានផឹកស្រាជោកជាំរួចមក ក៏ទៅដាក់មងនៅក្នុងស្រះលង់ទឹកស្លាប់តែម្តង។
ករណីនេះ បង្កការភ្ញាក់ផ្អើល កាលពីវេលាម៉ោង៥និង១៥នាទីល្ងាចថ្ងៃអាទិត្យ ៨កើត ខែស្រាពណ៍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៩ ខែសីហា ឆ្នាំ២០១៨ នៅចំណុចស្រះចម្ការ ឈ្មោះ ហ៊ួ ស្ថិតនៅព្រំប្រទល់ភូមិឡែ ឃុំលំជ័រនិងភូមិកាចក់ ឃុំកក់ស្រុកបរកែវ។
បើយោងតាមការសួរបំភ្លឺពីប្រពន្ធជនរងគ្រោះ ឈ្មោះ និត ឡាប អាយុ៣៧ឆ្នាំ ជនជាតិខ្មែរ មុខរបរកម្មករចម្ការម្ចាស់ខាងលើ ប្រាប់ថា ប្តីរបស់គាត់ ឈ្មោះ យាន យ៉ាត អាយុ៣៤ឆ្នាំ ជនជាតិខ្មែរ បានហូបស្រាស្រវឹងជោកជាំ ហើយក៏យកមងទៅដាក់ក្នុងស្រះតែម្នាក់ឯង ចំណែកខ្លួនជាប្រពន្ធទៅធ្វើការ ដោយពុំដឹងថាប្តីលង់ទឹកឡើយ។ រហូតដល់ម៉ោងផុតការងារក៏ត្រឡប់មកផ្ទះវិញ ពុំឃើញប្តី ក៏នាំគ្នារុករក បានប្រទះឃើញសម្លៀកបំពាក់ ស្បែកជើង នៅលើគោក ក៏នាំគ្នាចុះក្នុងទឹករាវរកឃើញសាកសព ភ្លាមៗនោះ ក៏ប្រញាប់ដឹកបញ្ជូនមកដល់មណ្ឌលសុខភាព គ្រូពេទ្យប្រាប់ថា ផុតដង្ហើមកន្លះម៉ោងហើយ។
សមត្ថកិច្ចបានចុះត្រួតពិនិត្យធ្វើកោសល្យវិច័យលើសាកសព ពិតជាស្លាប់ដោយសារលង់ទឹកពិតប្រាកដមែន ហើយបានធ្វើកំណត់ហេតុប្រគល់សាកសពជូនគ្រួសារសពយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments