អតីត​ក្រុម​ជម្រើសជាតិ​កម្ពុជា ២​រូប​តំណាង​ឲ្យ​ប្រទេស​បារាំង ត្រៀម​ទៅ​ប្រកួត​ពានរង្វាន់​ក្រៅផ្លូវការ​មួយ​នៅ​ប្រទេស​អេ​ស្ប៉ា​ញ

អតីត​កីឡាករ​ជម្រើសជាតិ​កម្ពុជា ពីរ​រូប ដែល​បាត់​មុខ​មួយ​មួយ​រយៈ​ពី​វិស័យ​បាល់ទាត់​នៅ​កម្ពុជា នឹង​ចូលរួម​ប្រកួត​ក្នុង​ពានរង្វាន់​មួយ​នៅ​ប្រទេស​អេ​ស្ប៉ា​ញ ឈ្មោះថា Football 7 European Club Championship ដែល​ពួកគេ​នឹង​តំណាង​ឲ្យ​ប្រទេស​បារាំង​។ អតីត​កីឡាករ​ជម្រើសជាតិ​កម្ពុជា ២​នាក់​នោះ​គឺ វ៉ា សុថន (​វ៉ា ខ្វី​នទី​ន​)​និង កុក បូរី​ស​។

កីឡាករ​ទាំង​២​នាក់​នេះ ​ក៏​ធ្លាប់​ប្រកប​អាជីព​នៅ​ក្លិប​ភ្នំពេញ​ក្រោ​ន ផង​ដែរ ខណៈ​រូបគេ​បាន​ត្រឡប់​ទៅ​នៅ​ប្រទេស​បារាំង​វិញ​កាលពី​ប៉ុន្មាន​ឆ្នាំ​ចុងក្រោយ​នេះ​។ ក្រៅពី​កីឡាករ​ទាំង​២​គេ​ឃើញ​មាន​អតីត​កីឡាករ​ក្លិប​ភ្នំពេញ​ក្រោ​ន មួយរូប​ទៀត​គឺ ដា​នី ស្រី និង​អតីត​កីឡាករ​ព្រះខ័ន​រាជ David Quadrao ក៏​ស្ថិតនៅ​ក្រុម​ជាមួយគ្នា​ដែល​នឹង​ចូល​រួម​ពានរង្វាន់​មួយ​នេះ​។ ក្រុម​មួយ​នេះ​មាន​ឈ្មោះថា Athletic Club 92​។

ក្រុម​ដែល​ហៅ​កាត់​ថា AC 92 នេះ​មាន​សមាជិក​ដូចជា​Quadrao David (​ប្រធាន​ក្រុម​), វ៉ា សុថន​,Outaleb Nait Julien, Clerc David, កុក បូរី​ស​, Khelaifa Zoheir, Sniber Saad, Yann Morel, Srey Danny​។ ចំណែកឯ​ថ្នាក់ដឹកនាំ​ក្រុម​មាន​លោក​Irani Alex និង​លោក Zenou Remi​។

ពានរង្វាន់ Football 7 European Club Championship រៀបចំឡើង​ដោយ​International Football 7 Federation​។ តាម​គម្រោង​ពានរង្វាន់​នេះ​រៀបចំឡើង​ទីក្រុង Barcelona ប្រទេស​អេ​ស្ប៉ា​ញ ចាប់ពី​ថ្ងៃទី​១៤ ដល់​១៦ ខែកញ្ញា ឆ្នាំ​២០១៨​ខាងមុខនេះ​។ ក្រុម​ដែល​ឈ្នះ​ជើងឯក​នឹង​ទទួល​បាន​កៅអី​ទៅលេង​ក្នុង​ពានរង្វាន់ World Club Championship ដែល​ត្រូវ​ឡើង​នៅ​ប្រទេស​ប្រេ​ស៊ី​ល ក្នុង​ខែធ្នូ ខាងមុខ​។

គួរ​រំលឹក​ថា កុក បូរី​ស បាន​បាន​រួមរស់​ជាមួយ​ក្លិប​ជើងឯក​លី​គ ៦​សម័យកាល ភ្នំពេញ​ក្រោ​ន រយៈពេល​៥​ឆ្នាំ គឺ​ចន្លោះ​ឆ្នាំ​២០១២ ដល់​២០១៧ ព្រមទាំង​ធ្លាប់​ជួយ​ក្រុម​លើក​ពាន​លី​ក ២​ដង​ស្ថិត​ក្នុង​រដូវ​កាល​២០១៤ និង​២០១៥​។ ចំណែកឯ វ៉ា សុខ​ថន វិញ ចូលរួម​ជាមួយ​ភ្នំពេញ​ក្រោ​ន ១​រដូវ​កាល​ប៉ុណ្ណោះ​គឺ​នៅ​ឆ្នាំ​២០១៥​។ អ្នក​ទាំងពីរ ធ្លាប់​បង្ហាញខ្លួន​ឲ្យ​ក្រុម​ជម្រើសជាតិ​កម្ពុជា​ដូចគ្នា ដោយ​ក្នុងនោះ​សុខ​ថន ធ្លាប់​បង្ហាញខ្លួន​បាន ៦​ប្រកួត ស៊ុត​ចូល​ទី​បាន ១​គ្រាប់ រីឯ កុក បូរី​ស វិញ​បង្ហាញខ្លួន​បាន ២​ប្រកួត​ប៉ុណ្ណោះ ខណៈដែល​រូបគេ បាន​បដិសេធ​មិន​ចូលរួម​ក្រុម​ជម្រើសជាតិ​ប៉ុន្មាន​លើកចុងក្រោយ​៕

Source: Kampuchea Thmey Daily