លី​គ​កំពូល​កម្ពុជា ​៖ ​ក្រុម​ណាហ្គា​វើ​ល អង្គ​រថា​យ​ហ្គឺ​រ និង​អាស៊ី​អឺរ៉ុប សុទ្ធតែ​រកបាន​៣​ពិន្ទុ​ដូចគ្នា​នៅ​សប្ដាហ៍​ទី​១៧

​ក្រុមបាល់ទាត់​ណាហ្គា​វើ​ល អង្គ​រថា​យ​ហ្គឺ​រ និង​ក្រុម​អាស៊ី​អឺរ៉ុប សុទ្ធតែ​រកបាន​ជ័យជម្នះ​ដូចគ្នា​ប្រចាំ​សប្ដាហ៍​ទី​១៧ នៃ​ពានរង្វាន់​លី​គ​កំពូល​កម្ពុជា Metfone Cambodian League 2018 នៅ​ល្ងាច​ថ្ងៃ​សៅរ៍ ទី​១១ ខែសីហា ឆ្នាំ​២០១៨​។

​ចំពោះ​ក្រុម​ណាហ្គា​វើ​ល បាន​យកឈ្នះ​លើ​ក្រុម​ម្ចាស់ផ្ទះ​វេ​ស្ទើ​ន​ភ្នំពេញ ៣​ទល់​០ លើ​ទីលាន​កីឡដ្ឋាន​វេ​ស្ទើ​ន​។ កីឡាករ​ជប៉ុន Inui Tatsuro បា​នរក​គ្រាប់​បាល់​នាំ​មុខមុន​នៅ​នាទី​៣៩ ខណៈ​កីឡាករ​កូរ៉េខាងត្បូង Sung Chihoon បា​នរក​គ្រាប់​បាល់​ទី​២​នៅ​នាទី​៦០ និង​កីឡាករ Bisan George បាន​រក​គ្រាប់​បាល់​ទី​៣​នៅ​នាទី​៩០ មុន​ចប់​ការប្រកួត​។



​ចំណែក​ក្រុម​អង្គ​រថា​យ​ហ្គឺ​រ វិញ​បាន​យកឈ្នះ​លើ​ក្រុម​អគ្គស្នងការដ្ឋាន​នគរ​បាល​ជាតិ ដោយ​លទ្ធផល​៣​ទល់​១ លើ​ទីលាន​កីឡដ្ឋាន​ខេត្តសៀមរាប​។ កីឡាករ តាំង សុភ័ក្ត្រ បា​នរក​គ្រាប់​បាល់​ឲ្យ​អង្គ​រថា​យ​ហ្គឺ​រ នាំមុខ​មុន​នៅ​នាទី​២៥ ហើយ​កីឡាករ​ជប៉ុន Sugiyama Joichiro បា​នរក​គ្រាប់​បាល់​ទី​២​នៅ​នាទី​៥០ និង​កីឡាករ ពៅ ភា​រិ​ទ្ធិ បា​នរក​គ្រាប់​បាល់​ទី​៣​នៅ​នាទី​៦៣​។ កីឡាករ នួន បូរី បា​នរក​គ្រាប់​បាល់​វាយបក​ឱ្យ​ក្រុម​អគ្គស្នងការដ្ឋាន​នគរ​បាល​ជាតិ វិញ​នៅ​នាទី​៧៨​។



គូ​ចុងក្រោយ​ក្រុម​ម្ចាស់ផ្ទះ​ព្រះខ័ន​រាជ​ស្វាយរៀង បាន​ប្រកួត​ចាញ់​ក្រុម​អាស៊ី​អឺរ៉ុប ៦​ទល់​១ លើ​ទីលាន​កីឡដ្ឋាន​ខេត្តស្វាយរៀង​។ កីឡាករ ម៉ាត់ ហូ​សាន់ បា​នរក​គ្រាប់​បាល់​បើកឆាក​ឲ្យ​ក្រុម​ភ្ញៀវ​អាស៊ី​អឺរ៉ុប នៅ​នាទី​៩​និង​៤៦ ខណៈ​កីឡា​ករនី​ហ្ស​រី​យ៉ា Momoh Degule បា​នរក​គ្រាប់​បាល់​បន្ថែម​នៅ​នាទី​៦៦ កីឡាករ ប៊ិន ឧ​ត្ត​ម រកបាន​គ្រាប់​បាល់​ទី​៤​នៅ​នាទី​៧០ និង​កីឡាករ Privat រក​គ្រាប់​បាល់​បន្ត​២​គ្រាប់​នៅ​នាទី​៧៤​និង​៩០+៥​។ ចំណែក​១​គ្រាប់​វាយបក​របស់​ក្រុមព្រះ​ខ័ន​រាជ​ស្វាយរៀង រកបាន​ដោយ​កីឡាករ​ជប៉ុន Ishikawa Ryota​។



​ចំណែក​ប្រកួត​ផ្សេងទៀត​ប្រចាំ​សប្ដាហ៍​ទី​១៧ នេះ​ត្រូវ​បន្ត​ប្រកួត​នៅ​ថ្ងៃអាទិត្យ ទី​១២ ខែសីហា ឆ្នាំ​២០១៨ ទៀត​ដោយ​ក្រុម​សូល​ទី​ឡូ​អង្គរ ប៉ះ​ក្រុម​ក្រសួងការពារជាតិ វេលា​ម៉ោង​៣និង៣០​នាទី ​លើ​ទីលាន​កីឡដ្ឋាន​ខេត្តសៀមរាប មាន​ផ្សាយ​ផ្ទាល់​តាម​ប៉ុស្តិ៍ BTV News​ហើយ​ក្រុម​បឹងកេត ប៉ះ​ក្រុម​វិសាខា នៅ​ម៉ោង​៦​ល្ងាច​លើ​ទីលាន​ពហុ​កីឡដ្ឋាន​ជាតិ មាន​ផ្សាយ​ផ្ទាល់​តាម​ប៉ុស្តិ៍ BTV News ដែរ​និង​ក្រុម​អគ្គីសនី​កម្ពុជា ទទួល​ក្រុម​ភ្នំពេញ​ក្រោ​ន នៅ​ម៉ោង​៣​រសៀល​លើ​ទីលាន​កីឡដ្ឋាន​អគ្គីសនី​កម្ពុជា មាន​ផ្សាយផ្ទាល់​តាមទំព័រ​ហ្វេសប៊ុក​របស់​ CNCC៕

   

Source: Kampuchea Thmey Daily