ភ្នំពេញ ៖ ជនរងគ្រោះពីរនាក់ប្តី ប្រពន្ធជិះម៉ូតូឌុបគ្នាគេចជង្ហុកបានជ្រុលទៅបុកគូថរថយន្តកូរ៉េមួយគ្រឿង ដែលកំពុងចតស្ងៀមនៅលើចិញ្ចើមផ្លូវ បណ្តាលឲ្យរងរបួសធ្ងន់ទាំង២នាក់តែម្តង កាលពីវេលាម៉ោង៤និង៣០នាទីល្ងាច ថ្ងៃទី១២ ខែសីហា ឆ្នាំ២០១៨ ស្ថិតនៅតាមផ្លូវជាតិលេខ៣ ភូមិក្រាំងដូនទៃ សង្កាត់ចោមចៅ២ ខណ្ឌពោធិ៍សែនជ័យ ហើយម្ចាស់បើកគេចចេញពីកន្លែងកើតហេតុបាត់ កុំឲ្យប៉ូលីសមកទាន់នាំវែងឆ្ងាយ។
តាមប្រភពនៅកន្លែងបានឲ្យដឹងថា មុនកើតហេតុជនរងគ្រោះ២នាក់ប្តីប្រពន្ធជិះម៉ូតូ ម៉ាកហុងដាឌ្រីមសេ១២៥ ស៊េរីឆ្នាំ២០១៦ ពណ៌ខ្មៅ ពាក់ស្លាកលេខភ្នំពេញ 1FZ-2076 បើកបរដោយប្តីឈ្មោះ សែម សុធីភេទប្រុស អាយុ៤៦ឆ្នាំ មានទីលំនៅភូមិរកាអារ ឃុំរកាអារ ស្រុកកងមាសខេត្តកំពង់ចាមជិះពីត្បូងទៅជើង លុះដល់ចំណុចកើតហេតុគេចពីជង្ហុកជ្រុលទៅបុកគូទរថយន្តកូរ៉េមួយគ្រឿងចតទុកចោលចិញ្ចើមផ្លូវ បណ្តាលឲ្យដួលរងរបួសធ្ងន់២នាក់ប្ដីប្រពន្ធ។ ឃើញសភាពមិនស្រួល ម្ចាស់រថយន្តបើកយករថយន្តគេចទៅបាត់កុំឲ្យប៉ូលិសមកទាន់ ទុកឲ្យជនរងគ្រោះទាំង២នាក់ដេកចុកននៀលលើផ្លូវជាតិ។
ជនរងគ្រោះទាំង២នាក់ប្តីប្រពន្ធ ត្រូវបានប្រជាពលរដ្ឋហៅរថយន្តសង្គ្រោះរបស់អង្គភាព៧១១ដឹកយកទៅសង្គ្រោះនៅមន្ទីរពេទ្យព្រះកុសុមៈ រីឯម៉ូតូសមត្ថកិច្ចយកទៅរក្សាទុកជូនជនរងគ្រោះនៅប៉ុស្តិ៍ចោមចៅ២៕
Source: Kampuchea Thmey Daily
0 Comments