ភ្នំពេញ ៖ លទ្ធផលបណ្តោះអាសន្ន នៃការបោះឆ្នោតជាតិជ្រើសតាំងតំណាងរាស្ត្រ នីតិកាលទី០៦ ឆ្នាំ២០១៨ ត្រូវបានប្រកាសហើយនាព្រឹកថ្ងៃទី១១ ខែសីហា ឆ្នាំ២០១៨នេះ ដោយគណៈកម្មាធិការជាតិរៀបចំការបោះឆ្នោត (គ.ជ.ប) ក្នុងនោះគណបក្សដែលទទួលបានសំឡេងនាំមុខគេ គឺគណបក្សប្រជាជនកម្ពុជា ដែលទទួលបានរហូតដល់៤.៨៨៩.១១៣សំឡេង។
តាមលទ្ធផលនោះ គណបក្សនយោបាយ ដែលបានចូលរួមប្រកួតប្រជែងចំនួន២០នោះ គណបក្ស “គណបក្សខ្មែររួបរួមជាតិ” លេខរៀងទី១ ទទួលបានសំឡេងគាំទ្រ៩៩.៣៧៧សំឡេង , គណបក្ស “គណបក្សមាតុភូមិយើង” លេខរៀងទី២ទទួលបានសំឡេងគាំទ្រ៩.១៧៤សំឡេង, គណបក្ស “គណបក្សពន្លឺថ្មី” លេខរៀងទី៣ ទទួលបានសំឡេងគាំទ្រ១៣.៥០៩សំឡេង, គណបក្ស “សញ្ជាតិកម្ពុជា” លេខរៀងទី៤ ទទួលបានសំឡេងគាំទ្រ៤៥.៣៧០សំឡេង, គណបក្ស “ខ្មែរក្រោក” លេខរៀងទី៥ ទទួលបានសំឡេងគាំទ្រ២២.០០២សំឡេង, គណបក្ស “សំបុកឃ្មុំសង្គមប្រជាធិបតេយ្យ” លេខរៀងទី៦ ទទួលបានសំឡេងគាំទ្រ៥៦.០២៤សំឡេង, គណបក្ស “ប្រជាធិបតេយ្យមូលដ្ឋាន” លេខរៀងទី៧ ទទួលបានសំឡេងគាំទ្រ៧០.៥៦៧សំឡេង, គណបក្ស “ខ្មែរសាធារណរដ្ឋប្រជាធិបតេយ្យ” លេខរៀងទី៨ ទទួលបានសំឡេងគាំទ្រ៨.៥៩១សំឡេង, គណបក្ស “រស្មីខេមរា” លេខរៀងទី៩ ទទួលបានសំឡេងគាំទ្រ៤.២១២សំឡេង, គណបក្ស “សម្ព័ន្ធដើម្បីប្រជាធិបតេយ្យ” លេខរៀងទី១០ ទទួលបានសំឡេងគាំទ្រ៣០៩.៣៦៤សំឡេង, គណបក្ស “ខ្មែរសាធារណរដ្ឋ” លេខរៀងទី១១ ទទួលបានសំឡេងគាំទ្រ៤១.៦៣១សំឡេង, គណបក្ស “ខ្មែរឈប់ក្រ” លេខរៀងទី១២ ទទួលបានសំឡេងគាំទ្រ៥៥.២៩៨សំឡេង, គណបក្ស “ហ៊្វុនស៊ិនប៉ិច” លេខរៀងទី១៣ ទទួលបានសំឡេងគាំទ្រ៣៧៤.៥១០សំឡេង, គណបក្ស “ខ្មែរអភិវឌ្ឍន៍សេដ្ឋកិច្ច” លេខរៀងទី១៤ ទទួលបានសំឡេងគាំទ្រ២៣.២៥៥សំឡេង, គណបក្ស “យុវជនកម្ពុជា” លេខរៀងទី១៥ ទទួលបានសំឡេងគាំទ្រ៣៩.៣៣៣សំឡេង, គណបក្ស “ធម្មាធិបតេយ្យ” លេខរៀងទី១៦ ទទួលបានសំឡេងគាំទ្រ២៩.០៦០សំឡេង, គណបក្ស “ឆន្ទះខ្មែរ” លេខរៀងទី១៧ ទទួលបានសំឡេងគាំទ្រ២១២.៨៦៩សំឡេង, គណបក្ស “ជនជាតិដើមប្រជាធិបតេយ្យកម្ពុជា” លេខរៀងទី១៨ ទទួលបានសំឡេងគាំទ្រ១០.១៩៧សំឡេង, គណបក្ស “ខ្មែរតែមួយ” លេខរៀងទី១៩ ទទួលបានសំឡេងគាំទ្រ៤៨.៧៨៥សំឡេង និងគណបក្ស “ប្រជាជនកម្ពុជា” លេខរៀងទី២០ ទទួលបានសំឡេងគាំទ្រ៤៨៨៩១១៣ សំឡេង។
តាមតួលេខ ដែលបង្ហាញដោយគណៈកម្មាធិការជាតិរៀបចំការបោះឆ្នោត (គ.ជ.ប) បានឱ្យដឹងដែរថា សន្លឹកឆ្នោតបានការមានចំនួន៦.៣៦២.២៤១ ហើយសន្លឹកឆ្នោតមិនបានការមានចំនួន៥៩៤៦៥៩ ចំណែកអ្នកចូលរួមបោះឆ្នោត មានចំនួន៦.៩៥៦.៩០០នាក់ ដែលស្មើនឹង៨៣,០២ភាគរយ នៃចំនួនប្រជាពលរដ្ឋ ដែលមានឈ្មោះនៅក្នុងបញ្ជីទាំងអស់។
ទោះជាយ៉ាងណា តាមលទ្ធផលបណ្តោះអាសន្ននេះ មិនទាន់ឃើញមានការបង្ហាញចំនួនអាសនៈនៅក្នុងរដ្ឋសភា ដែលគណបក្សនីមួយៗទទួលបាននៅឡើយទេ ប៉ុន្តែបើតាមការគណនាក្រៅផ្លូវការតាមរូបមន្ត ដែលកំណត់ដោយច្បាប់ស្តីពីការបោះឆ្នោតជ្រើសតាំងតំណាងរាស្ត្រនោះ គឺគណបក្សប្រជាជនកម្ពុជា អាចនឹងទទួលបានអាសនៈទាំងអស់តែម្តង។ តែយ៉ាងណាលទ្ធផលបណ្តោះអាសន្ននេះ គ.ជ.ប អនុញ្ញាតឲ្យគណបក្សផ្សេងៗ ដែលចូលរួមក្នុងការបោះឆ្នោត ដាក់ពាក្យប្តឹងតវ៉ាផងដែរ ប្រសិនបើជំទាស់ទៅនឹងការប្រកាសលទ្ធផលនេះ ហើយបើសិនមិនមានការប្តឹងជំទាស់ទេ លទ្ធផលផ្លូវការនឹងត្រូវប្រកាសនៅថ្ងៃទី១៥ ខែសីហា ឆ្នាំ២០១៨។
ទាក់ទងលទ្ធផលបណ្តោះអាសន្ននេះ គណបក្សឆន្ទៈខ្មែរបានប្រកាសគាំទ្រ និងបានអះអាងថា គណបក្សមានមោទនភាព និងសេចក្តីត្រេកអ ចំពោះលទ្ធផលបណ្តោះអាសន្ននៃការបោះឆ្នោតជាតិជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ ដែល គ.ជ.ប បានប្រកាសកាលពីព្រឹកថ្ងៃទី១១ ខែសីហា ឆ្នាំ២០១៨ ហើយក៏បានអគុណចំពោះសមាជិក និងអ្នកគាំទ្រឆន្ទៈខ្មែរ ដែលបានបូជាកម្លាំងកាយចិត្ត និងធនធាន ក្នុងបរិបទថ្មី នៃប្រទេសកម្ពុជា។
ចំណែកអ្នកស្រី ពោធិតី សាវត្ថី ប្រធានគណបក្សធម្មាធិបតេយ្យបានថ្លែងប្រាបកម្ពុជាថ្មីដែរថា គណបក្សធម្មាធិបតេយ្យមិនទាន់ទទួលស្គាល់លទ្ធផលបណ្តោះអាសន្ននៃបោះឆ្នោតនេះទេ ដោយសារថា មិនមានតម្លាភាព ហើយសូម្បីតែម្ចាស់ជំនួយ គឺជប៉ុន ក៏នៅតែមានភាពស្រពិចស្រពិលនៅឡើយ ដូច្នេះលទ្ធផលផ្លូវការ នឹងមានភាពសុក្រឹត្យជាងនេះ។
រីឯលោក គុជ លី អនុប្រធាន និងជាអ្នកនាំពាក្យគណបក្សខ្មែរតែមួយ ដែលមានលោក កែម រិទ្ធិសិដ្ឋ ប្អូនប្រុសលោក កែម ឡី ជាប្រធាននោះ បានអះអាងថា ជាលទ្ធផលបឋម ខ្មែរតែមួយ ទទួលបាន៥២៤០៧ តែការប្រកាសបណ្តោះអាសន្នកាលពីព្រឹកថ្ងៃទី១១ ខែសីហា បែរជាធ្លាក់ចុះមកនៅ៤៨.៧៨៥ ដូច្នេះបាត់អស់៣.៦២២ ។ លោកបញ្ជាក់ថា គណបក្សរង់ចាំមើលលទ្ធផលជាផ្លូវការបន្តទៀត ថាតើខុសគ្នាយ៉ាងណាទៀត។ ទោះជាយ៉ាងណា លោកអះអាងថា គណបក្សខ្មែរតែមួយ មិនមានគំរោងប្តឹងផ្តល់អីទេ។
ដោយឡែកឡែកគណបក្សសម្ព័ន្ធដើម្បីប្រជាធិបតេយ្យ (LDP) ដែលមានលោក ខឹម វាសនា ជាប្រធានអះអាងថា មិនទាន់យ៉ាងម៉េចទេ ដោយរង់ចាំប្រជុំសំរេចសិន នេះបើតាមការបញ្ជាក់ពីលោក ចិន ថុន អគ្គលេខាធិការគណបក្ស៕
Source: Kampuchea Thmey Daily
0 Comments