ភ្នំពេញ ៖ មន្ត្រីជាន់ខ្ពស់ក្រសួងការងារនិងបណ្តុះបណ្តាលវិជ្ជាជីវៈបានអំពាវនាវឲ្យនិយោជកទាំងអស់បើកទូលាយឲ្យក្រុមអធិការកិច្ចចុះត្រួតពិនិត្យតាមការដ្ឋានសំណង់ដើម្បីលើកកម្ពស់លក្ខខណ្ឌការងារដល់កម្មករនៅកន្លែងធ្វើការកាន់តែល្អប្រសើរ។
លោក ឡេង តុង ទីប្រឹក្សាអមក្រសួងការងារនិងបណ្តុះបណ្តាលវិជ្ជាជីវៈនិងជាប្រធាននាយកដ្ឋានពេទ្យការងារបានស្នើឲ្យឲ្យនិយោជកទាំងអស់បើកទូលាយឲ្យក្រុមអធិការកិច្ចចុះត្រួតពិនិត្យតាមការដ្ឋានសំណង់ និង បើកវគ្គបណ្តុះបណ្តាលដល់កម្មករឲ្យបានច្រើនថែមទៀតដើម្បីឲ្យពួកគេទទួលបាននូវចំណេះដឹងបន្ថែមទៀតទាក់ទងនឹងសុវត្ថិភាពការងារសំដៅឈានទៅកាត់បន្ថយគ្រោះថ្នាក់នៅកន្លែងការងារប្រកបដោយប្រសិទ្ធភាពខ្ពស់។
លោកបានមានប្រសាសន៍ថា ការបញ្ជ្រាបចំណេះដឹងដល់កម្មករសំណង់នេះមិនត្រឹមតែអាចកាត់បន្ថយគ្រោះថ្នាក់នៅកន្លែងការងារប៉ុណ្ណោះទេថែមទាំងជួយជំរុញឲ្យការងារឲ្យបានលឿនឆាប់រហ័សផងដែរ។
លោកបានបន្តថា បច្ចុប្បន្នវិស័យសំណង់កំពុងប្រឈមនឹងគ្រោះថ្នាក់យ៉ាងខ្លាំងដោយកម្មករត្រូវធ្វើការនៅតាមអគារខ្ពស់ៗនិងមានការលើកដាក់អីវ៉ាន់ធ្ងន់ៗហើយ កន្លងមកមានកម្មករមួយចំនួនរងរបួសហើយខ្លះទៀត មានគ្រោះថ្នាក់រហូតដល់អាយុជីវិតដោយសារតែធ្លាក់ពីលើអគារនិងសំណង់ផ្សេងៗ។
លោក ឡេង តុងបានបញ្ជាក់ថា «បញ្ហាប្រឈមមួយដែលលំបាកនោះគឺនិយោជកមួយចំនួនតូចមិនបានសហការល្អដោយមិនបានអនុញ្ញាតឲ្យមានការបណ្តុះបណ្តាលដល់កម្មករទេដោយសារគាត់ខ្លាចប៉ះពាល់ដល់ការងារពួកគាត់ តែបើសិនជាយើងបានបណ្តុះបណ្តាលដល់ពួកគាត់នឹងអាចកាត់បន្ថយគ្រោះថ្នាក់មានអត្រាខ្ពស់»។
លោកបណ្ឌិតអ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ធ្លាប់បានមានប្រសាសន៍ថា ក្រសួង នឹងបន្តខិតខំប្រឹងប្រែងជំរុញការអនុវត្តច្បាប់ និងលិខិតបទដ្ឋានគតិយុត្តិ ក៏ដូចជាគោលនយោបាយផ្សេងៗទៀតដើម្បីកាត់បន្ថយហានិភ័យគ្រោះថ្នាក់ការងារ ក្នុងវិស័យសំណង់ ក្នុងការធានាបាននូវសន្តិសុខ និងសុវត្ថិភាពការងារក្នុងវិស័យនេះ។
លោករដ្ឋមន្ត្រីបានបន្តថា វិស័យសំណង់នៅកម្ពុជាពិតជាមានសារៈសំខាន់ណាស់ ព្រោះវិស័យសំណង់ត្រូវបានចាត់ទុកជាវិស័យមួយ ដែលមានការអភិវឌ្ឍន៍យ៉ាងឆាប់រហ័ស និងជាសក្ដានុពលធំមួយសម្រាប់សេដ្ឋកិច្ចជាតិ និងបានស្រួបទាញនូវការវិនិយោគ ទាំងក្នុងនិងក្រៅប្រទេស ពិសេសកម្លាំងពលកម្មបម្រើលើវិស័យនេះកាន់តែច្រើនឡើងៗ ដែលទាមទារឲ្យមានការគិតគូរទៅលើលក្ខខណ្ឌការងាររបស់កម្មករ និយោជិត លើផ្នែក អនាម័យ សន្តិសុខ និងសុវត្ថិភាពការងារ។
លោក ស៊ីវ ផេង អគ្គលេខាធិការសមាគមអ្នកសាងសង់កម្ពុជាបានថ្លែងឲ្យដឹងថា ការអនុញាតិឲ្យក្រុមអធិការកិច្ចក្រសួងការងារចុះតាមការដ្ឋានសំណង់នេះពិតជាល្អប្រសើរ ព្រោះបានជួយឲ្យកម្មករដែលធ្វើការនៅតាមការដ្ឋានសំណង់ទទួលបានសុខភាពនិងសុវត្ថិភាពបានល្អ ខណៈបច្ចុប្បន្នវិស័យសំណង់កំពុងមានការរីកដុះដាលខ្លាំង។
យ៉ាងណាក៏ដោយ លោកបានជំរុញឲ្យអ្នកវិនិយោគត្រូវជួយការពារសុវត្តិភាពដល់កម្មករឲ្យបានល្អពិសេសត្រូវ បណ្តុះបណ្តាលដល់កម្មករជាមុនសិន មុនចូលធ្វើការដើម្បីឲ្យពួកគាត់បានយល់ដឹងពីរបៀបពាក់មួកសុវត្ថិភាព ស្រោមដៃ ស្រោមជើងនិងសុវត្ថិភាពការងារនៅអគារខ្ពស់ៗជាដើមសំដៅកាត់បន្ថយគ្រោះថ្នាក់ផ្សេងៗពេលអនុវត្តការងារផ្ទាល់នៅតាមការដ្ឋានសំណង់៕
Source: Kampuchea Thmey Daily
0 Comments