ក្រុមទាំង១០ប្រចាំពានរង្វាន់បាល់ទាត់លីគហ្វូតសាលឆ្នាំ២០១៨ (National Futsal League 2018) ដែលរៀបចំដោយសហព័ន្ធកីឡាបាល់ទាត់កម្ពុជា បានទាត់បាល់បំប៉ោងសំណាញ់ទីគ្នារហូតដល់៦៦គ្រាប់ប្រចាំវគ្គសន្សំពិន្ទុសប្ដាហ៍ទី១៨ ដែលជាចុងសប្ដាហ៍ចុងក្រោយ ស្របពេលដែលគណៈកម្មការបានរកឃើញក្រុមខ្លាំងជាងចំនួន៤ (Top4) មានឈ្មោះឡើងទៅវគ្គខ្វែងដណ្តើមជើងឯក។
លទ្ធផលសរុបប្រចាំសប្ដាហ៍ចុងក្រោយនេះឃើញថានៅថ្ងៃសៅរ៍ ទី០៤ ខែសីហា ឆ្នាំ២០១៨ ក្រុម Fan Sport FTចាញ់ក្រុមឱម៉ាល់ ៨ទល់៤ ខណៈស.ស.យ.ក កំចាយមារ ឈ្នះក្រុមអាណាចក្របៃតង ១១ទល់៨ និងក្រុមឆន្ទៈកីឡា ចាញ់ក្រុម Panda FC ៣ទល់២។ ចំណែកនៅថ្ងៃអាទិត្យ ទី០៥ ខែសីហា ឆ្នាំ២០១៨ វិញក្រុម Down Town Sport FC ឈ្នះក្រុម B.A United១៥ទល់៥និងក្រុម Home Sport FC ចាញ់ក្រុមយុវជន៧មករា ៧ទល់៣។
ងាកមកមើលតារាងចំណាត់ប្រចាំរដូវកាលវិញឃើញថាក្រុម Down Town Sport FCឈរលេខ១ មាន៤២ពិន្ទុ តាមពីក្រោយដោយក្រុម ស.ស.យ.ក កំចាយមារ ឈរលេខ២ មាន៣៩ពិន្ទុ ក្រុម Home Sport FCឈរលេខ៣ មាន៣៧ពិន្ទុ ក្រុមលេខ៤ ឱម៉ាល់ មាន៣៦ពិន្ទុ។ ក្រុមលេខ៥ Fan Sport FC មាន២៣ពិន្ទុ ហើយក្រុមលេខ៦ អាណាចក្របៃតង មាន២២ពិន្ទុ។ លេខ៧ Panda FC មាន២០ពិន្ទុ ហើយលេខ៨ ក្រុមយុវជន៧មករា មានមាន២០ពិន្ទុដូចគ្នា តែខុសត្រង់គ្រាប់បាល់ចំណេញ ហើយក្រុមឆន្ទៈកីឡា លេខ៩ មាន១៥ពិន្ទុ និងក្រុមB.A United លេខ១០ មាន៥ពិន្ទុ។
តាមការបែងចែកគូប្រកួតនៅវគ្គ៤ក្រុមចុងក្រោយ តម្រូវឲ្យក្រុមលេខ២ប៉ះក្រុមលេខ៣ និងក្រុមលេខ១ប៉ះក្រុមលេខ៤ ដើម្បីឡើងទៅលេងវគ្គផ្តាច់ព្រ័ត្រប្រជែងយកជើងឯកប្រចាំរដូវកាល។ ដូច្នេះវគ្គខ្វែងនេះនឹងធ្វើឡើងនៅថ្ងៃទី១១ ខែសីហា ឆ្នាំ២០១៨ ដោយក្រុមស.ស.យ.ក កំចាយមារ ប៉ះក្រុម Home Sport FC នៅម៉ោង៤ល្ងាចនិងក្រុម Down Town Sport FC ប៉ះក្រុមឱម៉ាល់ នៅម៉ោង៦ល្ងាច។ ក្រុមចាញ់ត្រូវប៉ះគ្នាក្នុងវគ្គចំណាត់ថ្នាក់លេខ៣និងក្រុមឈ្នះបន្តប៉ះគ្នាក្នុងវគ្គផ្តាច់ព្រ័ត្រដែរធ្វើឡើងនៅថ្ងៃទី១៨ខែសីហា ឆ្នាំ២០១៨។
ការប្រកួតលីគហ្វូតសាលជាលើកដំបូងនៅក្នុងស្រុកនេះធ្វើឡើងពីថ្ងៃទី០៣ ខែមីនា រហូតដល់ថ្ងៃទី២៨ ខែ កក្កដា ឆ្នាំ ២០១៨ ខណៈភាគច្រើនប្រកួតនៅថ្ងៃចុងសប្ដាហ៍ ដែលមានក្រុមជាសមាជិកចំនួន១០ក្រុមលើទីលាន ដឹប្លូស្ព័ត (The Blue Sport) ម្តុំទួលគោក។ ការប្រកួតមានរូបមន្តជាលក្ខណៈប្រកួតបែបលីគ តាមប្រព័ន្ធលីគ២ជុំ (វិលជុំសន្សំពិន្ទុ) ហើយក្រុមដែលមានពិន្ទុច្រើនជាងគេចំនួន៤ក្រុម (Top4) ត្រូវឡើងទៅប្រកួតគ្នាដណ្តើមជើងឯកប្រចាំរដូវកាល។ ក្រុមជើងឯកនឹងទទួលបានពានរង្វាន់១មេដាយមាសម្នាក់១និងប្រាក់រង្វាន់២០លានរៀលផងដែរ៕
Source: Kampuchea Thmey Daily
0 Comments