ភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ បានបង្ហាញឈ្មោះទីភ្នាក់ងារជ្រើសរើសពលករស្របច្បាប់ទៅធ្វើការនៅបរទេស ខណៈបច្ចុប្បន្ននេះមានពលករខ្មែរធ្វើការនៅបរទេសប្រមាណ១លាន២សែននាក់។
យោងតាមសេចក្តីប្រកាសព័ត៌មានរបស់ក្រសួងការងារនិងបណ្តុះបណ្តាលវិជ្ជាជីវៈបានឲ្យដឹងថា ដើម្បីការពារផលប្រយោជន៍ដល់ប្រជាខ្មែរ ដែលមានបំណងចង់ទៅធ្វើការនៅបរទេសដោយស្របច្បាប់ ឬ ការធ្វើចំណាកស្រុកដោយសុវត្ថិភាព ក្រសួងការងារ និងបណ្ដុះបណ្ដាលវិជ្ជាជីវៈបានប្រ កាសឈ្មោះទីភ្នាក់ងារ ឯកជន ដែលទទួលការអនុញ្ញាតពីក្រសួងក្នុងការជ្រើសរើស បណ្ដុះបណ្ដាល បញ្ជូន និងគ្រប់គ្រងពលករខ្មែរទៅធ្វើការនៅបរទេស។
បច្ចុប្បន្នកម្ពុជាបានបញ្ជូនពលករទៅធ្វើការនៅក្រៅប្រទេសមានចំនួន៧ប្រទេសក្នុងនោះរួមមានប្រទេសថៃ ម៉ាឡេស៊ី កូរ៉េខាងត្បូង សឹង្ហបុរី ជប៉ុន កាតានិងកូវ៉ែត។
សេចក្តីប្រកាសព័ត៌មានដដែលបានបន្តទៀតថា ក្រសួងមានទីភ្នាក់ងារជ្រើសរើសឯកជនដែលមានសិទ្ធិឲ្យធ្វើការជ្រើសបណ្តុះបណ្តាលបញ្ជូន និង គ្រប់គ្រងពលករខ្មែរទៅធ្វើការនៅរដ្ឋគូវ៉ែតចំនួន២៩ ប្រទេសថៃចំនួន៧០ក្រុមហ៊ុន សឹង្ហបុរីចំនួន២០ក្រុមហ៊ុន ម៉ាឡេស៊ីចំនួន៦៦ក្រុមហ៊ុន ប្រទេសកាតាចំនួន២៩ក្រុមហ៊ុន ប្រទេសជប៉ុនចំនួន៨៨ក្រុមហ៊ុននិងរដ្ឋបាលពិសេសហុងកុងចំនួន៨ក្រុមហ៊ុន។
ជាមួយគ្នានេះ ក្រសួងបានអំពាវនាវដល់សាធារណជនត្រូវប្រុងប្រយ័ត្នចំពោះជនខិលខូច ជនឆ្លៀតឱកាស ជាពិសេសក្រុមហ៊ុន ឬអង្គការមួយចំនួនដែលមិនមានឈ្មោះក្នុងបញ្ជីឈ្មោះរបស់ក្រសួង។ ប្រសិនបើបានជួបករណីនេះ គេអាចផ្ដល់ព័ត៌មានមកនាយកដ្ឋានមុខរបរ និងហត្ថពលកម្មនៃក្រសួងការងារ និងបណ្ដុះបណ្ដាលវិជ្ជាជីវៈ តាមរយៈទូរសព្ទលេខ ០២៣ ៨៨០ ៤៧៤ ឬ ០១១ ៨៩៨ ៩១២ ឬ ០៩៨ ៧៦៥ ៤១១ ឬទាក់ទងដោយផ្ទាល់ទៅមន្ទីរការងារ និងបណ្ដុះបណ្ដាលវិជ្ជាជីវៈរាជធានី ខេត្តទាំង២៥។
គួរបញ្ជាក់ថា បច្ចុប្បន្ននេះមានពលករខ្មែរធ្វើការនៅក្រៅប្រទេសប្រមាណ១លាន២សែននាក់ក្នុងនោះពលករជាង១លាន៥ម៉ឺននាក់ ធ្វើការនៅប្រទេសថៃហើយក្រៅពីនេះមាននៅប្រទេសកូរ៉េ ម៉ាឡេស៊ី សឹង្ហបុរី ហុងកុងនិងប្រទេសជប៉ុនដោយក្នុងមួយឆ្នាំៗពួកគេបានផ្ញើលុយត្រឡប់មកស្រុកកំណើតវិញប្រមាណជាង២ពាន់លានដុល្លាអាមេរិក ដែលជួយធ្វើឲ្យជីវភាពរស់នៅរបស់ក្រុមគ្រួសារមានភាពធូរធារឡើងៗពិសេសបានចូលរួមចំណែកក្នុងការអភិវឌ្ឍន៍សេដ្ឋកិច្ចជាតិផងដែរ៕
Source: Kampuchea Thmey Daily
0 Comments