យន្តហោះ​ផលិត​អំឡុង​សង្គ្រាមលោកលើកទីពីរ​ធ្លាក់ចូល​ភ្នំ​ស្វី​ស​សម្លាប់​មនុស្ស​២០​នាក់

ប៉ូលិស​បាន​និយាយ​កាលពី​ថ្ងៃអាទិត្យ​ថា មនុស្ស​ចំនួន​២០​នាក់​ បាន​ស្លាប់​ បន្ទាប់ពី​យន្តហោះ​ផលិត​អំឡុង​សង្គ្រាមលោកលើកទីពីរ​មួយគ្រឿង​ បាន​ធ្លាក់ចូល​តំបន់ភ្នំ​ស្វី​ស​កាលពី​ចុង​សប្ដាហ៍​។​
​
អ្នកនាំពាក្យ​ប៉ូលិស​លោកស្រី Anita Senti បាន​ប្រាប់​សន្និសីទកាសែត​មួយ​ថា “​មាន​បុរស​១១​នាក់​និង​ស្ត្រី​៩​នាក់​ជិះ​ក្នុងនោះ​រួមទាំង​ប្ដី​ប្រពន្ធ​ជនជាតិ​អូទ្រីស​និង​កូនប្រុស​របស់​ពួកគេ​ផងដែរ​”​។​
​យន្ដហោះ Junker JU52 HB-HOT ផលិត​នៅ​អាល្លឺម៉ង់​ក្នុង​ឆ្នាំ​១៩៣៩​និង​ត្រូវបាន​គេ​ដាក់​ងារ​ឲ្យ​ថា “Iron Annie”​។ គឺជា​យន្តហោះ​ប្រមូលផ្តុំ​។​
​
លោកស្រី Senti បាន​និយាយថា វា​បាន​ធ្លាក់ចូល​ភ្នំ Piz Segnas ដែលជា​កំពូលភ្នំ​មាន​កម្ពស់ ៣,០០០​ម៉ែត្រ​នៅ​ភាគ​ខាងកើត​នៃ​ប្រទេស​កាលពី​ថ្ងៃ​សៅរ៍​។​
​
យោងតាម​កាសែត​អាល្លឺម៉ង់ Blick បាន​ឲ្យ​ដឹងថា ជើងហោះហើរ​នេះ​បាន​ហោះ​ចេញពី​តំបន់ Ticino នៅ​ភាគខាងត្បូង​នៃ​ប្រទេស​ហើយនឹង​ត្រូវ​ចុះចត​នៅ​ព្រលានយន្តហោះ​យោធា Duebendorf ក្បែរ​ទីក្រុង Zurich នៅ​រសៀល​ថ្ងៃ​សៅរ៍​។​
​
របាយការណ៍​របស់​ប្រទេស​ស្វី​សបាន​និយាយថា អ្នកដំណើរ​កំពុង​វិល​ត្រឡប់​មកពី Locarno វិញ​ដែលជា​កន្លែង​ឈប់សម្រាក​មួយ​នៅ​ភាគខាងត្បូង​ប្រទេស​ស្វី​ស​លើ​បឹង Maggiore​។​
​
លោក Andreas Tobler មេបញ្ជាការ​ប៉ូលិស​តំបន់ Grisons បាន​និយាយថា គ្មាន​សង្ឃឹម​ទេ​ថា​នឹង​ស្វែងរក​នរណាម្នាក់​ដែល​នៅរស់​។​
​ការស៊ើបអង្កេត​មួយ​បានចាប់ផ្តើម​ដើម្បី​រក​មូលហេតុ​នៃ​គ្រោះថ្នាក់​នេះ​។​
​
ដោយសារតែ​យន្តហោះ​ប្រភេទ​ប្រមូលផ្តុំ​មិន​ត្រូវបាន​បំពាក់​ជាមួយ “​ប្រអប់​ខ្មៅ​” ដើម្បី​ថត​ទិន្នន័យ​យន្តហោះ​និង​ថត​សំឡេង​នោះ​, ក្រុម​អ្នកស៊ើប​អង្កេត​ត្រូវ​ពឹង​ផ្អែកលើ​សាក្សី​ឃើញ​ផ្ទាល់​ភ្នែក​និង​ការវិភាគ​នៃ​កំទេចកំទី​។​
​
លោក Daniel Knech នៃ​សេវា​ស៊ើបអង្កេត​សុវត្ថិភាព​ស្វី​ស SESE បាន​និយាយថា អាកាសយានិក​មិនមាន​ពេលវេលា​ដើម្បី​បញ្ជូន​សញ្ញា​បន្ទាន់​នោះទេ​។ លោក​និយាយថា លក្ខខណ្ឌ​អាកាសធាតុ​ដ៏​ក្តៅ​មិនបាន​រួមចំណែក​ដល់​ការធ្លាក់​យន្តហោះ​នេះ​ទេ​។​
​
ទីភ្នាក់ងារសារព័ត៌មាន ATS បាន​រាយការណ៍​ថា យន្ដហោះ​នេះ​គឺជា​កម្មសិទ្ធិ​របស់​ក្រុមហ៊ុន​អាកាសចរណ៍ JU-Air ដែលជា​ក្រុមហ៊ុន​មួយ​មាន​ទំនាក់ទំនង​ជាមួយ​កង​ទ័ពអាកាស​ស្វី​ស​។​
​
លោក Kurt Waldmeier អគ្គនាយក​ក្រុមហ៊ុន JU-Air បាន​ប្រាប់​អ្នកយកព័ត៌មាន​ថា យន្តហោះ​នេះ​បាន​ឆ្លងកាត់​ការត្រួតពិនិត្យ​ថែរក្សា​កាលពី​ខែកក្កដា​។​
​
គួរ​បញ្ជាក់ថា នៅក្នុង​ការធ្លាក់​យន្តហោះ​មួយទៀត​នៅ​ប្រទេស​ស្វី​សកាល​ពីថ្ងៃ​សៅរ៍ យន្តហោះ​ទេសចរណ៍​ដែល​ដឹក​ប្តី​ប្រពន្ធ​មួយគូ​និង​កូនតូច​ពីរ​នាក់​បាន​ធ្លាក់ចូល​ក្នុងព្រៃ​មួយ​នៅ​ទីប្រជុំជន Nidwald ហើយ​ភ្លាមៗ​នោះ​ស្រាប់តែ​ឆាបឆេះ​។ គ្មាន​អ្នក​នៅរស់​ត្រូវបាន​គេ​រកឃើញ​ទេ​៕ AFP
​
​

Source: Kampuchea Thmey Daily