ភ្នំពេញ ៖ ក្រុមការងារជំនាញរបស់គណៈកម្មាធិការជាតិរៀបចំការបោះឆ្នោត (គ.ជ.ប) កាលពីរសៀល ថ្ងៃទី០៤ ខែសីហា ឆ្នាំ២០១៨ បានរៀបចំត្រួតពិនិត្យ ផ្ទៀងផ្ទាត់ និងបូកសរុបលទ្ធផល នៃការបោះឆ្នោតជ្រើសតាំងតំណាងរាស្ត្រ នីតិកាលទី៦ ដើម្បីឈានទៅចេញផ្សាយលទ្ធផលបណ្តោះអាសន្ននៅថ្ងៃទី១១ ខែកញ្ញា ឆ្នាំ២០១៨ ខាងមុខ។
ការត្រួតពិនិត្យ ផ្ទៀងផ្ទាត់នេះ ធ្វើឡើងនៅសាលសន្និសីទរបស់ គ.ជ.ប ហើយត្រូវបានចាត់តាំងជា៤ក្រុមធំៗរួមមាន ទី១, ក្រុមសម្របសម្រួលថ្នាក់កណ្តាល ទី២, ក្រុមទទួលសម្ភារៈ ឯកសារបោះឆ្នោត ទី៣, ក្រុមកំណត់បែងចែកអាសនៈ និងទី០៤, ក្រុមត្រួតពិនិត្យលទ្ធផលឡើងវិញ ហើយក្រុមត្រួតពិនិត្យលទ្ធផលឡើងវិញ ត្រូវបានបែងចែកជា៥ ក្រុមតូចទៀត ដើម្បីជួយបំពេញការងារឲ្យកាន់តែមានប្រសិទ្ធភាព។
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត គ.ជ.ប បានថ្លែងប្រាប់កម្ពុជាថ្មីកាលពីរសៀលថ្ងៃទី៤ ខែសីហា ឆ្នាំ២០១៨ថា ការផ្ទៀងផ្ទាត់ គឺជាតួនាទី និងការទទួលខុសត្រូវរបស់ គ.ជ.ប ហើយការផ្ទៀងផ្ទាត់នេះ ធ្វើឡើងតាមអ្វីដែល គ.ជ.ប បានធ្វើកន្លងមក ពីព្រោះ គ.ជ.ប ត្រូវចេញលទ្ធផលបណ្តោះអាសន្ននៅថ្ងៃទី១១ ខែសីហា ឆ្នាំ២០១៨ ខាងមុខ ដូច្នេះបើការចេញផ្សាយលទ្ធផលបណ្ដោះអាសន្ននោះ ដោយមិនមានការផ្ទៀងផ្ទាត់ត្រឹមត្រូវ អាចនឹងមានបញ្ហាខ្លះកើតឡើង ក្រោយការចេញផ្សាយលទ្ធផលនេះ។
តាមលោក ហង្ស ពុទ្ធា ការផ្ទៀងផ្ទាត់នេះ ធ្វើឡើងតាំងពីតួលេខនៅតាមការិយាល័យ ដែលបានរាប់ភ្លាមៗនៅការិយាល័យ ហើយបិទផ្សាយនៅមុខការិយាល័យ។ លោកបញ្ជាក់ថា កន្លងមកមន្ត្រីរបស់ គ.ជ.ប នៅថ្នាក់ឃុំ សង្កាត់ រាជធានី ខេត្ត បានធ្វើការផ្ទៀងផ្ទាត់រួចហើយ ប៉ុន្តែនេះ គឺជាការផ្ទៀងផ្ទាត់ ដែលធ្វើឡើងដោយ គ.ជ.ប ដូច្នេះការផ្ទៀងផ្ទាត់នេះ ក្រៅពីការផ្ទៀងផ្ទាត់តាមរយៈកុំព្យូទ័រ ក៏មានការផ្ទៀងផ្ទាត់ដោយដៃផងដែរ។
បើតាមលោក ហង្ស ពុទ្ធា ការផ្ទៀងផ្ទាត់នេះ មិនអាចកំណត់ពេលបញ្ចប់បានទេ។ ពីព្រោះការផ្ទៀងផ្ទាត់នេះ ធ្វើឲ្យត្រឹមត្រូវ និងមានតម្លាភាពជាទីបំផុត។
ចំពោះបញ្ហាដោះស្រាយពាក្យបណ្ដឹង ដែលប្ដឹងដោយគណបក្សនយោបាយ ក្រោយការបោះឆ្នោតជ្រើសតាំងតំណាងរាស្ត្រ នីតិកាលទី៦នោះ លោក ហង្ស ពុទ្ធា បានបញ្ជាក់ថា គ.ជ.ប កំពុងរង់ចាំតួលេខនៃដំណោះស្រាយ ពីព្រោះនៅថ្នាក់ឃុំ សង្កាត់ ក៏បានដោះស្រាយខ្លះ នៅថ្នាក់រាជធានី ខេត្ត ក៏បានដោះស្រាយជាបន្តបន្ទាប់ផងដែរ ហើយបណ្ដឹងដែលបានឡើងមកដល់គ.ជ.ប ក៏កំពុងដោះស្រាយជាបណ្តើរៗផងដែរ តែអ្វីដែលត្រូវពិចារណាឲ្យម៉ត់ចត់នោះ គឺត្រូវពិនិត្យទៅលើទិដ្ឋភាពច្បាប់ ដឹងប្រភពព័ត៌មានឲ្យជាក់លាក់ ដើម្បីឲ្យដំណោះស្រាយនោះ ទទួលយកបានទាំងអស់គ្នា។
សូមបញ្ជាក់ថា ដំណើរការបោះឆ្នោតជ្រើសតាំងតំណាងរាស្ដ្រ នីតិកាលទី៦ ឆ្នាំ២០១៨ បានប្រព្រឹត្តិទៅកាលពីថ្ងៃទី២៩ ខែកក្កដា ឆ្នាំ២០១៨ ដោយមានគណបក្សនយោបាយចំនួន២០ បានចូលរួម ហើយជាលទ្ធផល មានប្រជាពលរដ្ឋកម្ពុជាបានអញ្ជើញទៅបោះឆ្នោតចំនួន៦.៩៤៦.១៦៤នាក់ ដែលស្មើនឹង៨២,៨៩ ភាគរយ នៃចំនួនអ្នកមានឈ្មោះក្នុងបញ្ជីបោះឆ្នោតសរុប៨.៣៨០.២១៧នាក់។ ក្រោយការបោះឆ្នោតភ្លាម អ្នកសង្កេតការណ៍ជាតិ អន្តរជាតិបានវាយតម្លៃថា ដំណើរការបោះឆ្នោតជ្រើសតាំងតំណាងរាស្ត្រ នីតិកាលទី៦ បានបញ្ចប់ក្រោមបរិយាកាសល្អ រលូន ត្រឹមត្រូវ សេរី និងយុត្តិធម៌ និងមានការគោរពច្បាប់ គោរពសិទ្ធិមនុស្ស គ្មានការបង្ខិតបង្ខំ គ្មានហិង្សា គ្មានការភ័យខ្លាច គ្មានការលក់ដូរសន្លឹកឆ្នោត ស្ងប់ស្ងាត់ មានសណ្ដាប់ធ្នាប់ល្អ។
ទន្ទឹមនិងការសាទរចំពោះលទ្ធផលនេះ ក៏នៅមានបណ្តឹងមួយចំនួនផងដែរ ដែលធ្វើឡើងដោយតំណាងគណបក្សនយោបាយ ដែលបានចូលរួមប្រកួតប្រជែង ហើយតបើតាម គ.ជ.ប គិតត្រឹមថ្ងៃទី០១ ខែសីហា ឆ្នាំ២០១៨ ទទួលបាន២៥២៥បណ្តឹង។ ក្នុងនោះ គណបក្សប្រជាជនកម្ពុជាមានចំនួន៣បណ្តឹង គណបក្សសម្ព័ន្ធដើម្បីប្រជាធិបតេយ្យចំនួន២៥២០បណ្តឹង និងគណបក្សប្រជាធិបតេយ្យមូលដ្ឋានចំនួន២បណ្តឹង។
ក្នុងចំណោមពាក្យបណ្តឹងទាំងនោះ បណ្តឹងសុំឲ្យផ្តន្ទាទោសមានចំនួន៣៤បណ្តឹង បណ្តឹងពាក់ព័ន្ធ និងការបោះឆ្នោត និងរាប់សន្លឹកឆ្នោតមានចំនួន២៤៩១ ហើយជាលទ្ធផលនៃការដោះស្រាយ គឺបដិសេធចំនួន១៨៦៩បណ្តឹង, ផ្សះផ្សាសះជាចំនួន២០បណ្តឹង, ផ្សះផ្សាមិនសះជាចំនួន១បណ្តឹង, លិខិតជូនដំណឹងចំនួន១បណ្តឹង, ចារបដិសេធចំនួន៩២បណ្តឹង, ដើមបណ្តឹងសុំដកពាក្យបណ្តឹងចំនួន២៦បណ្តឹង ហើយកំពុងដោះស្រាយមានចំនួន៥១៦បណ្តឹង៕
Source: Kampuchea Thmey Daily
0 Comments