នៅថ្ងៃអង្គារ ប្រទេសអង់គ្លេសបានអំពាវនាវឲ្យសហភាពអឺរ៉ុប (EU) បង្កើនការដាក់ទណ្ឌកម្មប្រឆាំងនឹងប្រទេសរុស្ស៊ីដោយនិយាយថា ប្លុកមួយនេះត្រូវតែឈរជាមួយសហរដ្ឋអាមេរិកដែលបានវាយប្រហារទីក្រុងមូស្គូជាមួយនឹងការទប់ស្កាត់សេដ្ឋកិច្ចថ្មីនៅខែនេះ។
រដ្ឋមន្ត្រីការបរទេសអង់គ្លេសលោក Jeremy Hunt បាននិយាយថា ប្រធានាធិបតីរុស្ស៊ីលោក Vladimir Putin បានធ្វើឲ្យពិភពលោកក្លាយជា “កន្លែងកាន់តែគ្រោះថ្នាក់” ហើយថា បន្ទាប់ពីការវាយប្រហារដោយអាវុធគីមីនៅក្នុងប្រទេសអង់គ្លេស សហភាពអឺរ៉ុបគួរតែដាក់សម្ពាធបន្ថែមទៀតដើម្បីធានាឲ្យប្រទេសរុស្ស៊ីប្រកាន់ខ្ជាប់នូវច្បាប់អន្តរជាតិ។
លោក Hunt បានប្រាប់ទស្សនិកជននៅរដ្ឋធានីវ៉ាស៊ីនតោនក្នុងសុន្ទរកថាសំខាន់លើកដំបូងរបស់លោកចាប់តាំងពីការតែងតាំងរបស់លោកនៅក្នុងខែកក្កដាថា “ថ្ងៃនេះ ចក្រភពអង់គ្លេសស្នើសុំឲ្យសម្ព័ន្ធមិត្តរបស់ខ្លួនបន្តទៅមុខទៀតដោយអំពាវនាវឲ្យសហភាពអឺរ៉ុបធានាថា ការដាក់ទណ្ឌកម្មរបស់ខ្លួនប្រឆាំងនឹងប្រទេសរុស្ស៊ីគឺមានលក្ខណៈទូលំទូលាយហើយថា យើងត្រូវក្រោកឈរជាមួយសហរដ្ឋអាមេរិក”។
ចក្រភពអង់គ្លេស សហភាពអឺរ៉ុបនិងសហរដ្ឋអាមេរិកបានស្តីបន្ទោសប្រទេសរុស្ស៊ីចំពោះការវាយប្រហារដោយសារធាតុបំផ្លាញសរសៃប្រសាទប្រឆាំងនឹងអតីតចារកម្មរបស់រុស្ស៊ីនៅទីក្រុង Salisbury នៃប្រទេសអង់គ្លេសកាលពីដើមឆ្នាំនេះ។ ប៉ុន្តែវិមានក្រឹមឡាំងបដិសេធការចូលរួម។
កាលពីដើមខែនេះ សហរដ្ឋអាមេរិកបានលើកឡើងអំពីឧប្បត្តិហេតុនៅទីក្រុង Salisbury ដើម្បីដាក់ទណ្ឌកម្មប្រឆាំងនឹងប្រទេសរុស្ស៊ី។ វាបានសន្យាថា នឹងមានវិធានការបន្ថែមទៀតលុះត្រាតែរុស្ស៊ីផ្តល់នូវការធានាដែលអាចជឿជាក់បានថា ខ្លួននឹងលែងប្រើអាវុធគីមីទៀតហើយ។
ចក្រភពអង់គ្លេសកំពុងត្រៀមខ្លួនចាកចេញពីសហភាពអឺរ៉ុបនៅឆ្នាំក្រោយប៉ុន្តែគោលនយោបាយដាក់ទណ្ឌកម្មរបស់ខ្លួនកំពុងត្រូវបានកំណត់នៅទីក្រុងប្រ៊ុសសែល។ នាពេលថ្មីៗនេះ សហភាពអឺរ៉ុបបានឯកភាពដាក់ទណ្ឌកម្មជាថ្មីប្រឆាំងនឹងរុស្ស៊ីទាក់ទងនឹងការកាត់យកឧបទ្វីប Crimea និងសកម្មភាពនៅក្នុងតំបន់នេះ។
លោក Hunt ដែលបានកាន់តំណែងជំនួសលោក Boris Johnson ជារដ្ឋមន្ត្រីក្រសួងការបរទេសអង់គ្លេសកាលពីខែកក្កដាគឺនឹងជួបជាមួយរដ្ឋមន្ត្រីការបរទេសអាមេរិកលោក Mike Pompeo និងមន្ត្រីអាមេរិកដទៃទៀតនៅថ្ងៃពុធហើយនឹងថ្លែងទៅកាន់ក្រុមប្រឹក្សាសន្តិសុខអង្គការសហប្រជាជាតិនៅថ្ងៃព្រហស្បតិ៍៕ REUTERS
Source: Kampuchea Thmey Daily
0 Comments