អ្នកប្រដាល់ ផល សោភ័ណ្ឌ ក្លិបតាឡីដំរីមានរិទ្ធ បានផ្តួលអ្នកប្រដាល់ថៃ Famichhai ក្នុងទឹកទី២ ក្នុងការជួបប្រកួតលើសង្វៀនបាយ័នស្ទឹងមានជ័យ កាលពីយប់ថ្ងៃអាទិត្យទី១២ ខែសីហា ឆ្នាំ២០១៨។
ផល សោភ័ណ្ឌ ជើងខ្លាំងរបស់កម្ពុជា បានប្រើពេលមិនដល់២ទឹកនោះទេ ផ្តួលអ្នកប្រដាល់ថៃFamichhai អោយសន្លប់លែងក្រោក ដោយការប្រើកែងវាយទៅលើគុម្ពថ្គាមឆ្វេងរបស់Famichhaiឲ្យដួលដេកលើរេញ មិនអាចបន្តការប្រកួតទៀតបាន។
Famechhai កាលពីពេលកន្លងមក ធ្លាប់មកប្រកួតនៅស្រុកខ្មែរប៉ុន្មានលើកហើយ ដែលក្នុងនោះ គេធ្លាប់ជួបប្រកួតជាមួយឃីម ឌីម៉ា ចាន់ ស៊ីណាត ឃីម បូរ៉ា....ជាដើម ។ ប៉ុន្តែលើកនេះ ប៉ះចំជើងខ្លាំងផល សោភ័ណ្ឌ គេស៊ូមិនបានពីរទឹកពេញផងទេ។
ចំណែក អ្នកប្រដាល់ស្រករក្រោយកម្ពុជា ព្រឿង សុជាតិ សមាគមកីឡាប្រដាល់ក្រសួងការពារជាតិ គេបានវាយចាញ់អ្នកប្រដាល់ថៃ Rithaira ដែលជាជើងខ្លាំងនិងជាជើងចាស់នៅស្រុកថៃដោយពិន្ទុ បន្ទាប់ពីប្រកួតគ្នាយ៉ាងស្វិតស្វាញ៥ទឹកពេញនោះ។
ព្រឿង សុជាតិ ចាញ់ថៃត្រង់កម្ពស់ទាបជាង និងចាញ់ទិចនិចរបស់ Rithaira ដែលធ្វើអោយពិបាកចូលវាយ និងត្រូវថៃវាយដួលអាជ្ញាកណ្តាលរាប់៨ពីរដងក្នុងទឹកទី៣នោះ។តែយ៉ាងណា ព្រឿង សុជាតិ អាចទប់ជាមួយអ្នកប្រដាល់ថៃរូបនេះ បានប្រាំទឹកពេញដែរ និងចាញ់ត្រឹមពិន្ទុប៉ុណ្ណោះ ។
ចំពោះការប្រកួតលក្ខណះម៉ារ៉ាតុងកាលពីល្ងៃថ្ងៃទី១១សីហាវិញ ជីឆៃលី អ្នកប្រដាល់ក្លិបមជ្ឈមណ្ឌលកីឡាខ.ភ.ម បានឈ្នះពានរង្វាន់ប្រាក់លានរបស់ទូរទស្សន៍បាយ័ន ក្នុងប្រភេទទម្ងន់៥៤គីឡូក្រាម។
ចាន់ ចំរើន អ្នកប្រដាល់ក្លិបនិរោធមានជ័យ បានវាយឈ្នះ ម៉ន សាម៉េត អ្នកប្រដាល់ក្លិបការិយាល័យទី៥ កងទ័ពជើងគោកដោយពិន្ទុ ក្នុងការជួបប្រកួតគ្នាទម្ងន់៦០គីឡូក្រាម ។
ដោយឡែក ជី ឆៃលី ក្នុងការប្រកួតជម្រុះដំបូង គេបានផ្តួលវ៉ន វ៉ុន អ្នកប្រដាល់ក្លិបអេភូថងកីឡាអោយសន្លប់ក្នុងទឹកទី១ប៉ុណ្ណោះ ដែលធ្វើអោយឆៃលីឡើងទៅជួបជុន សាវុធ អ្នកប្រដាល់ក្លិបកុសលកីឡា ក្នុងវគ្គផ្តាច់ព្រ័ត្រ ។
ជុន សាវុធ ក្នុងការប្រកួតជម្រុះលើកដំបូង គេបានវាយឈ្នះសំណាង សម្បត្តិ អ្នកប្រដាល់ក្លិបកងចក្ររាជសីហ៍មានរិទ្ធដោយពិន្ទុ ។ តែសាវុធ ពេលមកប៉ះជាមួយជី ឆៃលី គេទៅមិនរួចជាមួយឆៃលីឡើយ ។
ស៊ូ វណ្ណះ អ្នកប្រដាល់ក្លិបនាគរាជមានជ័យ បានប្រកួតឈ្នះហួន សុខនីម អ្នកប្រដាល់ក្លិបមហិទ្ធរិទ្ធតាដំបងដែកដោយពិន្ទុ ដែលធ្វើអោយគេសម្រេចគោលបំណងក្នុងការសងសឹកនោះ៕
Source: Kampuchea Thmey Daily
0 Comments