នៅថ្ងៃចន្ទ ប្រទេសអ៊ីរ៉ង់ បានតវ៉ាប្រឆាំងនឹងទណ្ឌកម្មថ្មីដែលដាក់ដោយសហរដ្ឋអាមេរិក ខណៈជម្លោះផ្លូវច្បាប់ដ៏ជូរចត់មួយរវាងក្រុងតេរ៉ង់ និងក្រុងវ៉ាស៊ីនតោនចាប់ផ្តើមនៅមុខតុលាការជាន់ខ្ពស់របស់អង្គការសហប្រជាជាតិ។
ប្រធានាធិបតីសហរដ្ឋអាមេរិកលោក Donald Trump បានដាក់ទណ្ឌកម្មដ៏តឹងតែងជាឯកតោភាគីទៅលើប្រទេសអ៊ីរ៉ង់កាលពីបីសប្តាហ៍មុនដោយនាំមកនូវផលប៉ះពាល់ដ៏ធ្ងន់ធ្ងរបន្ទាប់ពីទណ្ឌកម្មត្រូវបានដកចេញក្រោមកិច្ចព្រមព្រៀងឆ្នាំ២០១៥។
វិធានការជុំទី២នឹងចូលជាធរមាននៅដើមខែវិចិ្ឆកាដោយផ្តោតលើវិស័យប្រេងនិងថាមពលដ៏មានតម្លៃរបស់ប្រទេសអ៊ីរ៉ង់។
ក្រុងតេរ៉ង់បានដាក់ពាក្យបណ្តឹងរបស់ខ្លួននៅចំពោះមុខតុលាការយុត្តិធម៌អន្តរជាតិកាលពីចុងខែកក្កដាដោយអំពាវនាវដល់ចៅក្រមដែលមានមូលដ្ឋាននៅទីក្រុងឡាអេមួយនេះឲ្យបញ្ជាដកទណ្ឌកម្មភ្លាមៗដែលខ្លួននិយាយថានឹងបង្កឲ្យមានការរើសអើងដែលមិនអាចផ្សះផ្សារបាន។
រដ្ឋាភិបាលក្រុងតេរ៉ង់បានបន្ថែមថា សហរដ្ឋអាមេរិកគ្មានសិទ្ធិដើម្បីដាក់ទណ្ឌកម្មបែបនេះឡើងវិញនោះទេខណៈពេលដែលខ្លួនទាមទារសំណងខូចខាត។
ប្រទេសអ៊ីរ៉ង់បានអះអាងថា ការដាក់ឡើងវិញនូវការពិន័យនានាដែលបានលើកលែងក្រោមកិច្ចព្រមព្រៀងជាប្រវត្តិសាស្ត្រឆ្នាំ២០១៥ក្នុងគោលបំណងទប់ស្កាត់មហិច្ឆតានុយក្លេអ៊ែររបស់ក្រុងតេរ៉ង់គឺបានរំលោភលើសន្ធិសញ្ញាដែលមានអាយុកាលរាប់ទសវត្សរ៍មួយដែលបានចុះហត្ថលេខារវាងប្រទេសទាំងពីរក្នុងឆ្នាំ១៩៥៥។
តុលាការយុត្តិធម៌អន្តរជាតិ (ICJ) ដែលត្រូវបានបង្កើតឡើងនៅឆ្នាំ១៩៤៦ដើម្បីដោះស្រាយទំនាស់រវាងប្រទេសនានាគឺត្រូវបានគេរំពឹងថានឹងចំណាយពេលពីរបីខែដើម្បីសម្រេចថាតើត្រូវផ្តល់តាមសំណើរបស់ទីក្រុងតេរ៉ង់សម្រាប់សេចក្ដីសម្រេចបណ្ដោះអាសន្នដែរឬអត់ប៉ុន្ដែការសម្រេចចុងក្រោយក្នុងករណីនេះអាចនឹងចំណាយពេលប៉ុន្មានឆ្នាំទៀត។
លោក Trump បានហៅកិច្ចព្រមព្រៀងឆ្នាំ២០១៥រវាងអ៊ីរ៉ង់និងសមាជិកអចិន្ត្រៃយ៍ចំនួន៥នៃក្រុមប្រឹក្សាសន្តិសុខអង្គការសហប្រជាជាតិក៏ដូចជាប្រទេសអាល្លឺម៉ង់ថាជា “កិច្ចព្រមព្រៀងដ៏អាក្រក់តែម្ខាងដែលបរាជ័យក្នុងការសម្រេចបាននូវគោលដៅជាមូលដ្ឋាននៃការរាំងខ្ទប់ផ្លូវទៅកាន់គ្រាប់បែកនុយក្លេអ៊ែររបស់អ៊ីរ៉ង់”៕ AFP
Source: Kampuchea Thmey Daily
0 Comments