យោងតាមរបាយការណ៍ស៊ើបអង្កេតមួយ ដែលចេញផ្សាយកាលពីថ្ងៃសុក្របានឲ្យដឹងថា នៅក្នុងរយៈពេលប៉ុន្មានខែមុនពេលបាញ់រះលើហ្វូងមនុស្សក្នុងការប្រគំតន្ត្រីនៅទីក្រុង Las Vegas, លោក Stephen Paddock បានបំផ្លាញប្រាក់ជាង១.៥លានដុល្លារដើម្បីទទួលបានកាំភ្លើង និងប្រែប្រួលហើយបានឃ្លាតឆ្ងាយពីមិត្តស្រីនិងក្រុមគ្រួសាររបស់គាត់។
ជាមួយនឹងការលាតត្រដាងទាំងនេះ ប៉ូលិសបានប្រកាសថា ពួកគេបានបិទការស៊ើបអង្កេតរយៈពេល១០ខែរបស់ពួកគេដោយគ្មានចម្លើយច្បាស់លាស់ថាតើហេតុអ្វីបានជាលោក Paddock បានប្រមូលអាវុធហើយធ្វើការបាញ់ប្រហារដ៏ធំបំផុតក្នុងប្រវត្តិសាស្ត្រអាមេរិកសម័យទំនើប។
តម្រួតតំបន់ Clark County លោក Joe Lombardo បាននិយាយថា “តាមការសន្មតគឺថា លោក Stephen Paddock គឺជាបុរសម្នាក់ដែលគេមិនជឿថា សកម្មភាពរបស់គាត់អាចនាំទៅដល់ការវាយប្រហារថ្ងៃទី១ខែតុលាដោយគ្មានការសង្ស័យណាមួយ។ ការសម្ភាសន៍ជាមួយវេជ្ជបណ្ឌិតរបស់គាត់បានបង្ហាញពីសញ្ញានៃសតិដែលមានបញ្ហាប៉ុន្តែមិនមានឥរិយាបថដែលបង្ករឲ្យមានការអំពាវនាវដល់មន្ត្រីអនុវត្តច្បាប់នោះទេ”។
លោក Laddardo បានប្រាប់ក្រុមអ្នកសារព័ត៌មានថា លោក Paddock មិនបានបន្សល់ទុកលិខិតឬសូម្បីតែកំណត់ចំណាំណាមួយដើម្បីឆ្លើយសំនួរអំពីបំណងរបស់គាត់សម្រាប់ការសម្លាប់រង្គាលដែលបានសម្លាប់មនុស្ស៥៨នាក់និងរងរបួសជាង៨០០នាក់ទេ។
លោក Lombardo បាននិយាយថា FBI ត្រូវបានគេរំពឹងថានឹងចេញផ្សាយរបាយការណ៍ស៊ើបអង្កេតចុងក្រោយរបស់ខ្លួនដែលរួមមានទាំងប្រវត្តិបញ្ហាផ្លូវចិត្តរបស់ជនប្រដាប់អាវុធផងដែរនៅចុងឆ្នាំនេះ។
មន្ត្រីប៉ូលិស Jerry MacDonald ដែលជាអ្នកស៊ើបអង្កេតសំខាន់មួយរូបក្នុងករណីនេះបាននិយាយថា ការវាយតម្លៃរបស់ FBI អាចជួយបំភ្លឺបន្ថែមពីបុគ្គលិកលក្ខណៈរបស់លោក Paddock និងអ្វីដែលជំរុញគាត់ប៉ុន្តែខ្ញុំមិនដឹងថាតើពួកគេអាចផ្តល់ហេតុផលអ្វីនោះទេ។
របាយការណ៍មួយបានឲ្យដឹងថា បងប្រុសម្នាក់ក្នុងចំណោមបងប្រុសរបស់លោក Paddock បានប្រាប់ក្រុមអ្នកស៊ើបអង្កេតថា គាត់ជឿថាខ្មាន់កាំភ្លើងរូបនេះមានជំងឺផ្លូវចិត្តនិងមានការភ័យស្លន់ស្លោហើយឆ្កួតៗ។ វេជ្ជបណ្ឌិតជឿថា គាត់អាចមានជំងឺបាត់បង់ស្មារតី។
មិត្តស្រីរបស់ Paddock បាននិយាយថា គាត់ស្រាប់តែឈប់ស្រលាញ់ហើយតែងតែត្អូញត្អែរពីការឈឺ។ នាង Marilou Danley បានប្រាប់អ្នកស៊ើបអង្កេតថា គាត់បាននិយាយថា គ្រូពេទ្យមិនអាចព្យាបាលគាត់បានទេប៉ុន្តែបានប្រាប់គាត់ថា គាត់មាន “អតុល្យភាពគីមី”។
លោក Lombardo និយាយទៀតថា នៅក្នុងរបាយការណ៍ចុងក្រោយរបស់ខ្លួនដែលបានចេញផ្សាយកាលពីថ្ងៃសុក្រ នាយកដ្ឋានប៉ូលិសក្រុង Las Vegas បានរកឃើញថា លោក Paddock បានធ្វើសកម្មភាពតែម្នាក់ឯងគត់ហើយគ្មាននរណាម្នាក់ត្រូវបានចោទប្រកាន់នោះទេ។
កាលពីដើមឆ្នាំនេះ រដ្ឋអាជ្ញាអាមេរិកបានចោទប្រកាន់បុរស Arizona ម្នាក់ដែលត្រូវបានគេចោទប្រកាន់ថាបានលក់គ្រាប់កាំភ្លើងខុសច្បាប់ដែលរកឃើញនៅក្នុងបន្ទប់របស់ Paddock នៅសណ្ឋាគារ Mandalay Bay ។
របាយការណ៍នេះបានរួមបញ្ចូលនូវសេចក្ដីសង្ខេបនៃគណនីធនាគារចំនួន១៤របស់លោក Paddock ដែលសរុបជាទឹកប្រាក់ចំនួន២.១លានដុល្លារក្នុងខែកញ្ញាឆ្នាំ២០១៥។ ពីរឆ្នាំក្រោយមក ចំនួននេះបានធ្លាក់ដល់៥៣០,០០០ដុល្លារ។ លោក Lombardo បាននិយាយថា “គាត់មិនដែលទទួលបានជោគជ័យក្នុងការលេងល្បែងស៊ីសងដូចកាលពីឆ្នាំមុនទេ”។
ក្រុមអ្នកស៊ើបអង្កេតបាននិយាយថា លោក Paddock បានចំណាយប្រាក់ជាង៦០០,០០០ដុល្លារទៅលើកាស៊ីណូនិងជាង១៧០,០០០ដុល្លារសម្រាប់ក្រុមហ៊ុនកាតឥណទាន។ ការវិភាគនេះបាននិយាយថា គាត់ក៏បានចំណាយប្រាក់ជិត៩៥,០០០ដុល្លារនៅក្នុងការទិញដែលទាក់ទងនឹងអាវុធផងដែរ។
យ៉ាងណាក្តី របាយការណ៍នេះមិនបានផ្តល់ព័ត៌មានផ្សេងទៀតអំពីការទិញនៅកាស៊ីណូទេ។
យោងតាមរបាយការណ៍បានឲ្យដឹងថាលោក Paddock បានទិញកាំភ្លើងជាច្រើនដើមនៅចន្លោះឆ្នាំ២០១៦ដល់ឆ្នាំ២០១៧។ នាង Danley បានប្រាប់ក្រុមអ្នកស៊ើបអង្កេតថា នាងបានកត់សម្គាល់ឃើញថាគាត់បានទិញគ្រាប់កាំភ្លើងជាច្រើនប៉ុន្តែគាត់បានច្រានចោលក្តីព្រួយបារម្ភរបស់នាងដោយនិយាយថាវាមានតម្លៃថោកបើទិញជាដុំ។
គួរបញ្ជាក់ថា របាយការណ៍កាលពីថ្ងៃសុក្រគឺបានរៀបរាប់លម្អិតបន្ថែមទៀតអំពីការធ្វើផែនការដ៏ល្អិតល្អន់របស់លោក Paddock រួមទាំងការឆែកមើលយុទ្ធសាស្ត្ររបស់ SWAT, ជួលបន្ទប់សណ្ឋាគារផ្សេងទៀតដែលអាចមើលឃើញការប្រគំតន្ត្រីនិងការស៊ើបអង្កេតគោលដៅដែលអាចមាននៅក្នុងទីក្រុងយ៉ាងហោចណាស់បួនផងដែរ៕ AP
Source: Kampuchea Thmey Daily
0 Comments