បាត់ដំបង ៖ ជនរងគ្រោះម្នាក់ ដែលមាននាទីជាបុគ្គលិករដ្ឋបាល ក្នុងបុរីកុមារកំព្រាបាត់ដំបង១ បានស្លាប់យ៉ាងអាណោចអាធ័ម នៅក្នុងទឹកប្រឡាយ ដែលគេសង្ស័យថា ជនរងគ្រោះ អាចជិះម៉ូតូក្នុងល្បឿនលឿន និងអាចមានសារធាតុអាល់កុលផងដែរ ទើបធ្វើអោយជ្រុលធ្លាក់ទៅក្នុងប្រឡាយ ស្លាប់តែម្តង ។
ការប្រទះឃើញសពនេះ គឺនៅវេលាម៉ោង ៦ និង ២០ នាទី ព្រឹក ថ្ងៃទី ៤ ខែសីហា ឆ្នាំ ២០១៨ នៅចំណុចប្រឡាយ (ចំការសំរោង) ខាងជើងបូរីកុមារកំព្រាបាត់ដំបង១ ស្ថិត ក្នុងក្រុមទី២៩ ភូមិចំការសំរោង២ សង្កាត់ចំការសំរោង ក្រុងបាត់ដំបង ខេត្តបាត់ដំបង។
សពជនរងគ្រោះត្រូវបានគេស្គាល់ថាឈ្មោះ ជឿត យ៉ាត ភេទប្រុស អាយុ៣០ឆ្នាំ មុខរបរ បុគ្គលិករដ្ឋបាលបុរីកុមារកំព្រា បាត់ដំបង១ និងមានទីលំនៅ ភូមិប៉ោយស្នួល ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ ដោយគេបានប្រើប្រាស់ម៉ូតូ១ គ្រឿង ម៉ាកវ៉េវ (WAVE) ពណ៌ក្រហម ពាក់ស្លាកលេខ បន្ទាយមានជ័យ 1D-4127 ដោយការបើកបរនេះ អាចក្នុងល្បឿនមួយយ៉ាងលឿន បានធ្វើអោយជ្រុលធ្លាក់ទៅក្នុងប្រឡាយ និងទំនងជាបោកក្បាលទៅនឹងលូស្ពាន ដោយសារតែស្ពានត្រង់កន្លែងនេះ មិនមានចម្រឹង និងមិនមានស្លាកសញ្ញាអោយអ្នកធ្វើដំណើរបានដឹងនោះឡើយ។
មន្ត្រីចរាចរណ៍មួយរូប ក៏ដូចជាការិយាល័យបច្ចេកទេស និងកោសល្យវិច័យ បានសន្និដ្ឋានថា បុរសរងគ្រោះអាចមានជាតិសុរាក្នុងខ្លួនផង ទើបអាចបង្កអោយគ្រោះថ្នាក់ ដោយសារល្បឿនលឿនបែបនេះ បច្ចុប្បន្នសពបុរសរងគ្រោះខាងលើត្រូវបានកំលាំង ការិយាល័យនគរបាលចរាចរណ៍ផ្លូវគោកខេត្ត ដឹកយកទៅតម្កល់ទុកនៅក្នុងវត្តគរ ហើយក៏បានប្រគល់ទៅអោយ ក្រុមគ្រួសារ សាច់ញាតិ ហើយ ដើម្បីនាំយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments