ក្រុង​មូ​ស្គូ​ ៖ ប្រតិ​ប​ត្ដិ​ការ​ដើម្បី​កម្ចាត់​ពួក​សកម្មប្រយុទ្ធ​នៅ​ខេត្ត​ភាគ​ខាងត្បូង​របស់​ប្រទេស​ស៊ី​រី​បានបញ្ចប់

យោធា​រុស្ស៊ី​បាន​និយាយថា កងកម្លាំង​រដ្ឋាភិបាល​ស៊ី​រី​និង​ក្រុម​សកម្មប្រយុទ្ធ​ដែល​បាន​សម្រេចចិត្ត​គាំទ្រ​ពួកគេ ​គឺ​បានទទួល​ជោគជ័យ​ក្នុងការ​កម្ចាត់​បក្ខពួក​ជី​ហាដ​និយម​ដែល​នៅ​សេសសល់​ក្នុង​ភាគ​និរតី​នៃ​ប្រទេស​ស៊ី​រី​។​
​
លោក​ឧត្ដមសេនីយ៍ឯក Sergey Rudskoy ប្រធាន​ប្រតិបត្តិការ​នៃ​អគ្គសេនាធិការ​រុស្ស៊ី​បាន​រាយការណ៍​កាលពី​ថ្ងៃ​ព្រហស្បតិ៍​ថា តំបន់ As-Suwayda, Daraa និង Quneitra ត្រូវបាន​រឹបអូស​ទាំងស្រុង​ដោយ​កងកម្លាំង​រដ្ឋាភិបាល​ស៊ី​រី​។ លោក​បាន​ហៅ​ប្រតិ​ប​ត្ដិ​ការដែល​កើតឡើង​អស់​រយៈពេល​មួយខែ​មកហើយ​នេះ​ថា “​តែមួយ​” ដោយ​ប្រកាសថា ចំណុច​ចុងក្រោយ​នៃ​ការតស៊ូ​របស់​ក្រុម​ភេរវកម្ម​រដ្ឋ​ឥស្លាម​នៅក្នុង​តំបន់ Quneitra ត្រូវបាន​លុកលុយ​។ អ្នក​ប្រយុទ្ធ​ឥស្លាម​និយម​ជាង​១៦០​នាក់​ត្រូវបាន​ចាប់​ជា​ចំណាប់ខ្មាំង​។​
​
ជ័យជំនះ​នេះ​បាន​កើតឡើង​បន្ទាប់ពី​ក្រុម​ប្រដាប់អាវុធ​ជាច្រើន​នៅក្នុង​តំបន់​នេះ​បានសម្រេច​ចិត្ត​ឈប់​ប្រយុទ្ធ​នឹង​រដ្ឋាភិបាល​ក្រុង​ដា​ម៉ាស​ហើយ​ចូលរួម​ជាមួយ​កងទ័ព​រដ្ឋាភិបាល​ដើម្បី​ប្រយុទ្ធ​ប្រឆាំងនឹង​ពួក​ជី​ហាដ​រ៉ាឌីកាល់​។ ក្រុម​ប្រដាប់អាវុធ​បានសម្រេច​ចិត្ត​បែបនេះ​បន្ទាប់ពី​ត្រូវបាន​បញ្ចុះបញ្ចូល​ដោយ​សំណើ​លើកលែងទោស​របស់​ប្រទេស​រុស្ស៊ី​។​
​
ក្រុម​ផ្សេងទៀត​ក៏ត្រូវ​បានផ្តល់​ជម្រើស​ផងដែរ​។​
​លោក Rudskoy បាន​និយាយថា “​ពួក​សកម្មប្រយុទ្ធ​ត្រូវបាន​ផ្តល់​ជម្រើស​ឲ្យ​ទទួលបាន​ការលើកលែង​ទោស​ហើយ​ត្រឡប់​ទៅរក​ជីវិត​ដោយ​សន្តិភាព​ឡើងវិញ​ឬ​នាំយក​ក្រុមគ្រួសារ​របស់​ពួកគេ​ហើយ​ធ្វើដំណើរ​ទៅ​តំបន់ Idlib​។ ភាគច្រើន​នៃ​សមាជិក​ក្រុម​ប្រដាប់អាវុធ​បានជ្រើសរើស​យក​ការ​ស្នាក់នៅ​ក្នុងភូមិ​និង​ទីប្រជុំជន​របស់​ពួកគេ​”​។​
​
លោក Rudskoy បាន​និយាយទៀតថា មនុស្ស​ជិត​១​ម៉ឺន​នាក់​ត្រូវបាន​គេ​ផ្តល់​ឲ្យ​នូវ​ការធ្វើដំណើរ​ដោយ​សេរី​ទៅ​តំបន់ Idlib រួមទាំង​អ្នក​ប្រយុទ្ធ​ជិត​៤,៣០០​នាក់​ផងដែរ​។ ក្រុម​បះបោរ​បាន​ចុះចាញ់​ដោយ​ប្រគល់​រថក្រោះ​ចំនួន​៣៩​គ្រឿង រថពាសដែក​២៩​គ្រឿង កាំភ្លើង​បាញ់​យន្តហោះ​៣៥​ដើម ជើង​ទម្រ​បាញ់​រ៉ុក្កែត​ចំនួន​១៧​និង​យានយន្ត​រាប់សិប​គ្រឿង​ទៀត​។​
​
លោក Rudskoy បាន​បញ្ជាក់ថា ការរីកចម្រើន​នេះ​ក៏​អនុញ្ញាត​ឲ្យ​ក្រុម​អ្នកសង្កេតការណ៍​អន្តរជាតិ​ដែល​ដកចេញ​កាលពី​ឆ្នាំ​២០១២​វិលត្រឡប់​ទៅកាន់​ព្រំដែន​រវាង​ស៊ី​រី​និង​តំបន់ Golan Heights ដែល​កាន់កាប់​ដោយ​អ៊ីស្រាអែល​វិញ​ផងដែរ​។​
​
ក្រុម​ឃ្លាំមើល​របស់​អង្គការសហប្រជាជាតិ​ ត្រូវ​បាន​ផ្តល់​ការការពារ​ដោយ​យោធា​រុស្ស៊ី​ដើម្បី​បំពេញបេសកកម្ម​របស់​ពួកគេ​។ កងទ័ព​រុស្ស៊ី​ក៏បាន​ចូលរួម​ផងដែរ​ក្នុង​ការជួយ​ដល់​ប្រជាពលរដ្ឋ​មូលដ្ឋាន​នៅក្នុង​តំបន់​ដែល​រំដោះ​បាន​ដូច​ជាការ​ចែកចាយ​ជំនួយ​មនុស្សធម៌​និង​ការ​ដោះ​គ្រឿងផ្ទុះ​។ កិច្ចខិតខំ​ប្រឹងប្រែង​នេះ​មានបំណង​ផ្តល់ឱកាស​ដល់​ជនភៀសខ្លួន​និង​អ្នក​ផ្លាស់​ទីលំនៅ​ក្នុងស្រុក​ឲ្យ​វិលត្រឡប់​ទៅផ្ទះ​របស់​ពួកគេ​វិញ​ក្នុងពេល​ឆាប់ៗ​៕ RT
​
​

Source: Kampuchea Thmey Daily