វី​ង​ និង​អាល់​មិន​គ្រុប​ ចាប់​ដៃគូ​សហការ​គ្នា​ផ្តល់​ការទូទាត់​មិន​ប្រើ​សាច់ប្រាក់​សំរាប់​អតិថិជន​

​ភ្នំពេញ ៖ ខណៈដែល​បណ្តា​ហាង​អាជីវកម្ម​របស់ខ្លួន​ទទួលបាន​ការគាំទ្រ​យ៉ាង​ធំធេង​ពី​ភ្ញៀវ​ជាតិ​និង​អន្តរជាតិ​ក្រុមហ៊ុន​អាល់​មិន​គ្រុប កាលពី​ថ្ងៃទី​៤ ​ខែសីហា​ ឆ្នាំ​២០១៨ បាន​ចុះហត្ថលេខា​លើ​អនុស្សរណៈ​នៃ​ការយោគយល់​គ្នា​ជាមួយ​ធនាគារ​វី​ង​(​ខេ​ម​បូ​ឌា​)​លីមីត​ធី​ត ដើម្បី​ផ្តល់ជូន​អតិថិជន​នូវ​បទពិសោធន៍​ទូទាត់​ដោយ​មិន​ប្រើ​សាច់ប្រាក់​នៅក្នុង​ព្រះរាជាណាចក្រ​កម្ពុជា។

ភាពជា​ដៃគូ​នេះ​នឹង​នាំមក​នូវ​ការដាក់​ឲ្យ​ប្រើប្រាស់​សេវាកម្ម​ទូទាត់​ប្រាក់​តាម​អន​ឡាញ និង​ស្គេ​ន​កូដ​QR​ដែល​ហៅថា​”WingPay” និង​ការទទួល​ទូទាត់​តាមរយៈ​កម្មវិធី​ទូទាត់​ប្រា​ក់លើ​ទូរ​សព្ទ័​ដៃ​ធំៗ​ចំនួន​ពីរ​របស់​ប្រទេស​ចិន​គឺ​”Ali Pay “ និង​” We Chat Pay” ដែល​ផ្តល់ជូន​ដោយ​វី​ង នៅ​បណ្តា​ហាង​របស់​ក្រុមហ៊ុន​អាល់​មិន​គ្រុប​១៧​កន្លែង​នៅ​កម្ពុជា​។​

លោក លូ ម៉េង អគ្គនាយក​ក្រុមហ៊ុន​អាល់​មិន​គ្រុប បាន​បញ្ជាក់ថា អតិថិជន​តែងតែ​ធ្វើការ​សួរនាំ​ទៅកាន់​ក្រុមការងារ​របស់លោក ដើម្បី​ដឹងថា​ពួកគាត់​អាចធ្វើ​ការទូទាត់​ប្រាក់​ដោយ​ស្គេ​ន​កូដ​QR​កម្មវិធី​Ali Pay ឬ We Chat Pay​បានដែរ​ឬទេ​។​ដោយ​មើលឃើញ​មាន​សំនើរ​ជាច្រើន​ពី​អតិថិជន ក្រុមហ៊ុន​អាល់​មិន​គ្រុប​ក៏​សម្រេចចិត្ត​ជ្រើស​រើសយក​វី​ង ជា​ដៃគូ​សហការ​ដើម្បី​ផ្តល់​សេវា​កម្មនេះ​ដោយហេតុថា ក្រុមហ៊ុន​បាន​មើលឃើញ​នូវ​បទពិសោធន៍​ជាច្រើន​ឆ្នាំ​របស់​ធនាគារ​មួយ​នេះ​ក្នុង​ការផ្តល់សេវា​ទូទាត់​ដោយ​មិន​ប្រើ​សាច់ប្រាក់​នៅក្នុង​ប្រទេស​ក​ម្ពុ​ជា​។​លោក ម៉េង​បាន​បន្តថា វា​គឺជា​ការតាំង​ចិត្ត​របស់​ក្រុមហ៊ុន​អាល់​មិន​គ្រុប ក្នុងការ​ផ្តល់ជូន​នូវ​សេវាកម្ម​ដែល​ប្រកបដោយ​ភាព​ច្នៃប្រឌិត ដោយ​រួមបញ្ចូល​ចាប់ពី​សេវាកម្ម​ម្ហូបអាហារ និង​បដិសណ្ឋារកិច្ច រហូតដល់​បទពិសោធ​ន៍​នៃ​ការទូទាត់​ប្រាក់​ដែល​រហ័ស ងាយស្រួល​និង​មាន​សុវត្ថិភាព​។​បន្ទាប់ពី​ការដាក់​ឲ្យ​ប្រើប្រាស់​នូវ​សេវា​កម្មនេះ យើង​សង្ឃឹមថានឹង​ទទួលបាន​លទ្ធផល​ជា​វិជ្ជមាន​ពី​អតិថិជន ជាពិសេស​ភ្ញៀវ​ទេសចរណ៍​រាប់ម៉ឺន​នាក់​ដែល​មកលេង​ព្រះរាជាណាចក្រ​កម្ពុជា​។​

នៅក្នុង​ពិធី​ចុះ​អនុស្សរណៈ​នៃ​ការយោគយល់​គ្នា លោក ចូ​ចូ ម៉ា​ឡូ​ឡូ​ស អគ្គនាយក​ធនាគារ​ឯក​ទេស​វី​ង បាន​ប្រាប់​ឲ្យ​ដឹងថា​វី​ង​យល់ច្បាស់​ពី​តំរូវការ​របស់​ដៃគូ​អាជីវកម្ម​របស់ខ្លួន ក្នុងការ​ផ្តល់ជូន​អតិថិជន​នូវ​បទពិសោធន៍​ទូទាត់​ដោយ​មិន​ប្រើ​សាច់ប្រាក់​នៅ​កម្ពុជា ។​ការដាក់​ឲ្យ​ប្រើប្រាស់​នូវ​សេវាកម្ម​”WingPay, “ Ali Pay និង We Chat Pay”​នឹង​ឆ្លើយតប​តំរូវការ​នេះ​និង​បង្ហាញ​ប្រាប់​ពិភពលោក​ឲ្យ​បានដឹងថា​ប្រទេស​កម្ពុជា​កំពុង​ខិត​កាន់តែ​ជិត និង​ក្លាយជា​សង្គម​មួយ​ដែលមាន​ប្រព​ន្ធ័​អេកូ​នៃ​ការទូទាត់​ដោយ​មិន​ប្រើ​សាច់ប្រាក់​។​
លោក ម៉ា​ឡូ​ឡូ​ស បន្តថា ជា​ផ្នែក​មួយ​នៃ​ប្រព​ន្ធ័​ប្រមូល​សាច់ប្រាក់​ប្រកបដោយ​ភាព​ច្នៃប្រឌិត អតិថិជន​ដែលមាន​កម្មវិធី​ស្មា​ត​ហ្វូ​ន​វី​ង កម្មវិធី​Ali Pay​ឬ​កម្មវិធី​WeChat អាច​ប្រើ​ទូរ​សព្ទ័​របស់​ពួកគាត់​ដើម្បី​ស្គេ​ន​កូដ​QR នៅ​បណ្តា​ហាង​របស់​ក្រុមហ៊ុន​អាល់​មិន​គ្រុប ដើម្បី​ធ្វើការ​ទូទាត់​ប្រាក់​ដោយ​ចំណាយពេល​ត្រឹមតែ​ប៉ុន្មាន​វិនាទី​ប៉ុណ្ណោះ​។​

Wing Pay ជា​សេវា​ទូទាត់​ដោយ​មិន​ប្រើប្រាស់​សាច់ប្រាក់​របស់​វី​ង ដែល​ធ្វើឡើង​ដោយ​ស្គេ​ន​កូដ​QR ។​វា​ជា​មុខងារ​មួយ​ក្នុងចំណោម​មុខងារ​ដែលមាន​អត្ថប្រយោជន៍​ជាច្រើន​នៅលើ​កម្មវិធី​ស្មា​ត​ហ្វូ​ន​វី​ង ដែល​អនុញ្ញាត​ឲ្យ​អតិថិជន​អាចធ្វើ​ប្រតិបត្តិ​ការទូទាត់​ប្រាក់​ជាច្រើន​ដោយ​គ្រាន់តែ​ចុច​លើ​ទូរ​សព្ទ័​របស់​ពួកគេ ។​លើសពីនេះ​ទៀត កម្មវិធី​ស្មា​ត​ហ្វូ​ន​វី​ង​អនុញ្ញាត​ឲ្យ​អតិថិជន​ធ្វើ​ប្រតិបត្តិការ​ដូចជា​បង់​វិក្កយបត្រ បញ្ចូល​ទឹកប្រាក់​ទូរ​សព្ទ័ ផ្ទេរប្រាក់ ទិញ​ទំនិញ​តាម​អន​ឡាញ​ជាដើម​៕
​

Source: Kampuchea Thmey Daily