អ្នកប្រដាល់ថៃ Ou Ronou ដែលឡើងមកសងសឹក រឿង សារ័ត្ន អ្នកប្រដាល់ក្លិបកងពលតូចទ័ពឆត្រយោង៩១១ នៅលើសង្វៀនCarabaoរបស់SEA-TV កាកលពីរសៀលថ្ងៃទី១១ ខែសីហា ឆ្នាំ២០១៨ នោះ បានបន្តចាញ់ដោយពិន្ទុម្តងទៀត។ ពីរនាក់នេះ ប្រកួតគ្នាក្នុងប្រភេទទម្ងន់ ៦៥ គីឡូក្រាម។
រឿង សារ័ត្ន ឈ្នះ Ou Ronou ទាំងប្រផុតប្រផើយ ក្នុងពេលដែលអាជ្ញាកណ្ដាលលោកម៉ាក់សាមឿន បានព្រមាន Ou Ronou ឲ្យប្រកួតម្តងជាពីរដងនោះ។
Ou Ronou គេជាជើងខ្លាំងមួយរូប ធ្លាប់មកប្រកួតពីរដងហើយ ដែលលើកទី១វាយស្មើជាមួយយុគ យក្សគីល អ្នកប្រដាល់ក្លិបកងចក្ររាជសីហ៍មានរិទ្ធកាលពីថ្ងៃទី០៨មេសា២០១៨ និងលើកទី២ ថ្ងៃទី១៧មិថុនា២០១៨ Ou Ronou វាយចាញ់រឿង សារ័ត្នដោយពិន្ទុ។
យ៉ាងណា ប៉ះជាមួយរឿង សារ័ត្ន Ou Ronou ពិតជាពិបាកវាយដោយសារតែសារ័ត្ន មិនទុកឪកាសអោយបញ្ចេញកណ្តាប់ដៃឬជើងទាត់មុននោះទេ ពោលគឺក្នុងការប្រកួតគ្នា៥ទឹកនោះ រឿង សារ័ត្ន ចូលវាយ Ou Ronou មុនជានិច្ច ដែលធ្វើអោយគេមានប្រៀបឈ្នះលើអ្នកប្រដាល់ថៃនេះ។
អ្នកប្រដាល់វ័យក្មេង ហ៊ឹម សេរី ក្លិបតាព្រហ្មមានជ័យ បានប្រកួតឈ្នះ អ្នកប្រដាល់ថៃ Sing Dam ដោយពិន្ទុយ៉ាងវេទនា ក្នុងការជួបគ្នាទម្ងន់៥១គីឡូក្រាម។
ហ៊ឹម សេរី គេឈ្នះ Sing Dam ដោយកណ្តាប់ដៃក្នុងការប្រកួតទឹកចុងក្រោយនោះ ។ ជាមួយនឹងការឈ្នះនេះ ហ៊ឹម សេរី ក៏ចង់ដួលដោយសារជើងទាត់កាត់របស់ Sing Dam ដែលទាត់ចូលឆ្អឹងជំនីគេពេញៗនោះដែរ ។ក្រោយបញ្ចប់ការប្រកួត ហ៊ឹម សេរីអង្គុយសំកុកចង់កន្លះម៉ោង ទើបអាចស្រួលដង្ហើមវិញ៕
ធន់ចាន់តាក់ឈ្នះ Yoth Phit ឯនន់ ជំនិត ឈ្នះ Naser
ធន់ ចាន់តាក់ អ្នកប្រដាល់សមាគមកីឡាក្រសួងការពារជាតិ ដែលត្រូវគេផ្គូផ្គងអោយជួបប្រកួតជាមួយអ្នកប្រដាល់ថៃ Yoth Phit ក្នុងទម្ងន់៦៣,៥០០ គ.ក្រនោះ បានផ្តួល Yoth Phit អោយបោះបង់ការប្រកួតក្នុងទឹកទី៤ កាលពីរសៀលថ្ងៃទី១១សីហា២០១៨ នៅលើសង្វៀនGanzberg SEATV ។
ចាន់តាក់ បានវាយ Yoth Phit អោយអាជ្ញាកណ្តាលរាប់៨ក្នុងទឹកទី៤ ហើយបន្ទាប់មកគេ(Yoth Phit ) គេក៏បោះបង់ការប្រកួត ដោយសារឈឺកដៃស្តាំ ដែលបណ្តាលមកពីការទាត់ត្រូវរបស់ធន់ ចាន់តាក់នោះ។
ចំណែក នន់ ជំនិត អ្នកប្រដាល់ក្លិបស្វាយរលំឫទ្ធីជ័យ ដែលជាជើងខ្លាំងជើងចាស់របស់កម្ពុជា បានប្រកួតឈ្នះអ្នកប្រដាល់ជនជាតិបារាំង Naser ដោយពិន្ទុ បន្ទាប់ពីវាយគ្នា៥ទឹកពេញនោះ ។ពួកគេពីរនាក់នេះ ប្រកួតគ្នាក្នុងប្រភេទទម្ងន់៧១ គីឡូក្រាម។
នន់ជំនិត ឈ្នះ Naser ដោយវេទនា ក្នុងពេលការប្រកួតក្នុងទឹកទី១ ជំនិតត្រូវ Naser ដាល់ត្រូវមុខដួល ត្រូវអាជ្ញាកណ្តាលរាប់៨ម្តងនោះ។ ទោះជាយ៉ាងនេះក្តី នន់ ជំនិត គេគ្មានញញើតខ្លាច Naser អ្វីបន្តិចណាឡើយ គឺនៅតែសម្រុកចូលវាយអ្នកប្រដាល់បារាំងរូបនោះរហូតទទួលបានជ័យជម្នះដោយពិន្ទុ ។ គេមានកណ្តាប់ដៃល្អ វាយចេញចូលរហ័ស ហើយស្នៀតទាត់និងជង្គង់ កែង ក៏ល្អថែមទៀត ។ ក្នុងកំនត់ត្រាប្រកួតចំនួន៧៤លើកជំនិតវាយឈ្នះ៥៧លើក ចាញ់១៥លើក និងស្មើ០២លើកប៉ុណ្ណោះ៕
Source: Kampuchea Thmey Daily
0 Comments