លោក Donald Trump កាលពីថ្ងៃពុធ បានប្រាប់ដល់អគ្គមេធាវីរបស់គាត់ឲ្យបញ្ចប់ការស៊ើបអង្កេតដែលមានលក្ខណៈទ្រង់ទ្រាយខ្ពស់អំពីការជ្រៀតជ្រែករបស់រុស្ស៊ីក្នុងការបោះឆ្នោត ដែលមានជាប់ពាក់ព័ន្ធនឹងសមាជិកសំខាន់ៗនៃយុទ្ធនាការឃោសនាប្រធានាធិបតីរបស់គាត់។
នៅក្នុងការបង្ហោះ Twitter ដែលបង្កឲ្យមានការចោទប្រកាន់ភ្លាមៗថាលោក Trump កំពុងព្យាយាមរាំងស្ទះយុត្តិធម៌សាធារណៈនោះ, លោកប្រធានាធិបតីបានរិះគន់ការស៊ើបអង្កេតដែលដឹកនាំដោយរដ្ឋអាជ្ញាពិសេសលោក Robert Mueller ថាជា “ភាពអាម៉ាស់”។
លោក Trump បានថ្លែងថា “នេះជាស្ថានភាពដ៏គួរឲ្យភ័យខ្លាចហើយអគ្គមេធាវីលោក Jeff Sessions គួរតែបញ្ឈប់រឿងនេះភ្លាមមុនពេលវាបន្តធ្វើឲ្យប្រទេសរបស់យើងតានតឹនបន្ថែមទៀត”។
ជំនួយការនានាបានចេញមុខមកបំភ្លឺការលើកឡើងនេះដើម្បីកំណត់អំពីផលប៉ះពាល់។
អ្នកនាំពាក្យសេតវិមានលោកស្រី Sarah Sanders បានប្រាប់ក្រុមអ្នកយកព័ត៌មានថា “វាមិនមែនជាបញ្ជាទេ វាជាមតិយោបល់របស់លោកប្រធានាធិបតី”។ លោកស្រីបានបន្ថែមថា លោក Trump ចង់ឲ្យការស៊ើបអង្កេតនេះ “ឈានដល់ទីបញ្ចប់”។
ចំណែកមេធាវីរបស់គាត់គឺលោក Rudy Giuliani បានបន្ថែមថា “គាត់បានប្រើ Twitter ដើម្បីផ្តល់ជាមតិយោបល់។ គាត់បានប្រើពាក្យថា 'គួរតែ' គាត់មិនបានប្រើពាក្យ 'ត្រូវតែ’ ទេ”។
លោក Mueller ដែលជាអតីតប្រធាន FBI កំពុងស៊ើបអង្កេតថាតើយុទ្ធនាការរបស់លោក Trump បានទទួលជំនួយឬគាំទ្រពីប្រទេសរុស្ស៊ីក្នុងការរារាំងការបោះឆ្នោតប្រធានាធិបតីឆ្នាំ២០១៦ឬក៏ព្យាយាមលាក់បាំងការឃុបឃិតនេះដែរឬក៏អត់។
រហូតមកដល់ពេលនេះ គាត់បានដាក់ការចោទប្រកាន់មនុស្សរាប់សិបនាក់រាប់បញ្ចូលទាំងអ្នកដែលសង្ស័យថាជាពួក Hacker រុស្សីផងដែរនិងទទួលបានការសារភាពកំហុសពីសំណាក់ជំនួយការរបស់លោក Trump យ៉ាងតិចបីនាក់ដែលត្រូវបានចោទប្រកាន់ពីបទឃុបឃិតនិងនិយាយកុហកដល់អ្នកស៊ើបអង្កេត៕ AFP
Source: Kampuchea Thmey Daily
0 Comments