ក្រុមបាល់ទាត់យុវជនរបស់ក្លិបព្រះខ័នរាជស្វាយរៀង បានក្លាយជាក្រុមជើងឯកពានរង្វាន់បាល់ទាត់យុវជនកម្រិតអន្តរជាតិ U14 GFA Soriya International Tournament 2018 ដែលធ្វើឡើងនៅទីលានបាល់ទាត់ស្មៅសប្បនិមិត្ត AUPP Sport Club ក្នុងរាជធានីភ្នំពេញ នៅចុងសប្ដាហ៍ថ្មីៗនេះ ក្រោយយកឈ្នះលើក្រុមមកពីប្រទេសសឹង្ហបុរី នៅវគ្គផ្តាច់ព្រ័ត្រ។
ពានរង្វាន់អន្តរជាតិ U14 GFA Soriya Intertional Tournament 2018 ដែលរៀបចំឡើងដោយអង្គការGFA Soriya ក្រោមការគ្រប់គ្រងដោយកីឡាករជប៉ុន Takahito Ota ធ្លាប់ប្រកបអាជីពនៅលីគកំពូលកម្ពុជា ជាមួយក្រុមមួយចំនួនដូចជាភ្នំពេញក្រោន អគ្គស្នងការដ្ឋាននគរបាលជាតិ បៀលប្រាយ វេស្ទើនភ្នំពេញ ស៊ីម៉ាក់ ជាដើម។ នេះជាលើកទី៥ ហើយដែលពានរង្វាន់នេះលេចជារូបរាងឡើង ខណៈមានក្រុមចំនួន៨បានចូលរួមប្រកួតនៅថ្ងៃទី១៩ ខែសីហា ថ្មីៗនេះ។
ក្រោយចប់ការប្រកួតគេឃើញថា ក្រុមព្រះខ័នរាជស្វាយរៀង បានក្លាយជាម្ចាស់ជើងឯក ហើយក្រុមU14 GFA A (សឹង្ហបុរី) ជាក្រុមជើងឯករង ហើយក្រុមទ័ពជើងទឹក ឈរចំណាត់ថ្នាក់លេខ៣ ស្របពេលក្រុមយុវជនថ្នាលរបស់អគ្គស្នងការដ្ឋាននគរបាលជាតិ ឈរលេខ៤ ក្រុមយុវជនក្រសួងការពារជាតិ ឈរលេខ៥ ហើយក្រុមU14 សាលាបាល់ទាត់ជាតិរាជធានីភ្នំពេញ ឈរលេខ៦ ក្រុម U14 GFA (សឹង្ហបុរី) ឈរលេខ៧និងក្រុម GFA Soriya លេខ៨ចុងក្រោយគេ។
ពានរង្វាន់នេះ ធ្វើការប្រកួត២០នាទីសម្រាប់មួយការប្រកួតដោយលេងតទល់គ្នា៧ម្ខាង។ កាលពីឆ្នាំ២០១៥ និង២០១៦ ជើងឯកបានទៅក្រុមឆ្នាំ២០១៦ ក្រុមGFA A មកពីប្រទេសសិង្ហបុរី ដណ្តើមបានជើងឯក ចំនួន២ឆ្នាំជាប់គ្នា។ ក្រោយមានការវិវត្តន៍ខ្លាំងទើបពានរង្វាន់មានក្រុមមកពីក្រុមប្រទេសចូលរួម ខណៈបង្កើតដំបូងកាលពីឆ្នាំ២០១៤ មានតែក្រុមក្នុងស្រុកប៉ុណ្ណោះ។
តំណាងគណៈកម្មការរៀបចំការប្រកួតបានឲ្យដឹងថា មូលហេតុនៃការបង្កើតពានរង្វាន់នេះឡើងគឺដើម្បីបង្កើនការទំនាក់ទំនងរវាងកីឡាករទាំង ៨ ក្រុម ព្រមទាំងផ្លាស់ប្ដូរបទពិសោធន៍ ចំណេះដឹង ជំនាញ និង វប្បធម៌ រវាងគ្នានឹងគ្នាទៅវិញទៅមក៕
Source: Kampuchea Thmey Daily
0 Comments