កម្ពុជា​នឹងធ្វើ​ជា​ម្ចាស់ផ្ទះ​ការប្រកួត​បាល់ទាត់​ពានរង្វាន់ AFF Suzuki Cup 2018​មុនគេ​ក្នុង​តំបន់​អាស៊ាន

ភ្នំពេញ ​៖ ​កម្ពុជា​នឹង​ធ្វើ​ជា​ម្ចាស់ផ្ទះ​ការប្រកួត​បាល់ទាត់​ពានរង្វាន់ AFF Suzuki Cup 2018​មុនគេ​ក្នុងចំណោម​ប្រ ទេស​អាស៊ាន​ដែល​ចាប់ផ្តើម​បើក​ការប្រកួត​បើកឆាក​នៅ​រាជធានី​ភ្នំពេញ​ដោយ​ត្រូវ​ប៉ះ​ជាមួយ​ប្រទេស​ម៉ាឡេស៊ី​នៅ​ថ្ងៃទី​៨ ខែ វិច្ឆិកា ឆ្នាំ​២០១៨​ខាងមុខនេះ​។

នេះ​បើ​តាម​ការ​ចាប់​ឆ្នោត​ជ្រើសរើស​ពូ​ល​សម្រាប់ AFF Suzuki Cup 2018 ដែល​បាន​ធ្វើឡើង​កាលពី​ថ្ងៃទី​៥ ខែឧសភា ឆ្នាំ​២០១៨​នៅ​ប្រទេស​ឥណ្ឌូនេស៊ី​កន្លងទៅ​។

បន្ទាប់​មក​ទៀត​កម្ពុជា​នឹង​ត្រូវ​ធ្វើដំណើរ​ទៅកាន់​ទីក្រុង បាងកក​(​ថៃ​) ហាណូយ​(​វៀតណាម​) ហ្សា​ការ​តា​(​ឥណ្ឌូនេស៊ី​) ម៉ានីល​(​ហ្វីលីពីន​) និង​យ៉ាង​ហ្គួ​ន​(​មី​យ៉ាន់​ម៉ា​)​ដើម្បី​បន្តដំណើរ​នៃ​ការប្រកួត​ពាន​ប្រចាំ​តំបន់​អាស៊ាន​នេះ។

គួរ​បញ្ជាក់​ថា ​AFF Suzuki Cup​គឺជា​ការប្រកួត​ដណ្តើម​ជើងឯក​បាល់ទាត់​អាស៊ីអាគ្នេយ៍​ជា​រៀងរាល់​២​ឆ្នាំ​ម្តង​ ដែល​រៀបចំ​ដោយ​សហព័ន្ធ​បាល់ទាត់​អាស៊ាន​(AFF)​និង​មានការ​ទទួលស្គាល់​ពី​ហ្វីហ្វា​(FIFA)​។

ប្រទេស​ដែល​ចូលរួម​លេង​ក្នុង AFF Suzuki Cup 2018 មាន​ចំនួន​១០​ប្រទេស​ចែកចេញជា​២​ពូ​ល​កឺ ពូ​ល​A មាន​កម្ពុជា វៀតណាម ម៉ាឡេស៊ី ឡាវ និង​មី​យ៉ាន់​ម៉ា ចំណែក​ពូ​ល​B​មាន ថៃ​(​ក្រុម​ការពារ​តំណែង​ជើងឯក​) ឥណ្ឌូនេស៊ី ហ្វីលីពីន សិង្ហ​បុរី និង​ទី​ម័​រ​ខាងកើត​។​ ក្រុម​ជម្រើសជាតិ​ទាំង​១០​ប្រទេស​នេះ នឹង​ប្រកួត​ដណ្តើម​តំណែង AFF Suzuki Cup​នេះ ចាប់ពី​ថ្ងៃទី​៨​ខែ​៨ ខែវិច្ឆិកា​ដល់​១៥​ខែធ្នូ​ឆ្នាំ​២០១៨​។​ការប្រកួត​នឹង​ចេញដំណើរ​ពី​រាជធានី​ភ្នំពេញ​។

លោក ណូ​ប៊ុ​យ​អូ គី​ដូ​កូ​រ៉ូ នាយក​ក្រុមហ៊ុន​ខេ​ម​បូ​ឌា​ស៊ុយ​ហ្ស៊ុ​យ​គី​ម៉ូ​ទ័​រ បាន​ថ្លែង​នៅក្នុង​ពិធី​ប្រកាស AFF Suzuki Cup 2018 កាលពី​រសៀល​ថ្ងៃទី​១៥ ខែកញ្ញា ឆ្នាំ​២០១៨​នៅ​ផ្សារ​ទំនើប​អ៊ី​អន​ម៉​ល​ភ្នំពេញ​ឲ្យ​ដឹង​ថា ​ក្រុមហ៊ុន ស៊ុយ​ហ្ស៊ុ​យ​គី បាន​ឧបត្ថម្ភ AFF Suzuki Cup តាំងពី​ឆ្នាំ​២០០៨​មក ក្នុង​គោលបំណង​លើកស្ទួយ​វិស័យ​កីឡា​ហើយ​នៅ​ឆ្នាំនេះ​ គឺជា​ឆ្នាំ​គម្រប់​ខួប​១០​ឆ្នាំ​ នៃ​ការឧបត្ថម្ភ​របស់​ស៊ុយ​ហ្ស៊ុ​យ​គី​ដល់​AFF Suzuki Cup​នេះ ​លោក​បាន​បន្ត​ថា ​នេះ​គឺជា​លើក​ទី​១​ហើយ ដែល AFF Suzuki Cup​នឹង​ត្រូវ​ធ្វើឡើង​ក្នុង​ប្រទេស​កម្ពុជា​ហើយ​លោក​សង្ឃឹមថា​ ក្រុម​ជម្រើសជាតិ​កម្ពុជា​ដែល​បង្វឹក​ដោយ​លោក​ហុងដា​នឹង​ទទួល​បាន​លទ្ធផល​ល្អ​ក្នុង​ការ​ប្រកួត​។

នៅក្នុង​ពិធី​ប្រកាស AFF Suzuki Cup 2018​ក៏​មាន​ការចូលរួម​ពី​អតីត​ប្រធាន​ក្រុម​ជម្រើសជាតិ​កម្ពុជា និង​បច្ចុប្បន្ន​ជា​គ្រូ​ជំនួយ​ជម្រើសជាតិ​លោក អ៊ុង កន​យ៉ា​និត្យ កីឡាករ​យុវជន​ឆ្នើមៗ រួម​ជាមួយ​លោក ឧកញ៉ា ស៊ីវ ថៃ អគ្គនាយក​ក្រុមហ៊ុន OMC ផងដែរ​។

លោក អ៊ុង កន​យ៉ា​និត្យ​និង​កីឡាករ​សុទ្ធតែ​បាន​អះអាង​ថា ​ក្រុម​ជំរើសជាតិ​បាន​ត្រៀម​រួចហើយ​ក្នុង​ការ​ប្រកួត​ជាមួយនឹង​ម៉ាឡេស៊ី​នៅក្នុង​កម្មវិធី​ការប្រកួត​បាល់ទាត់​ពាន​រង្វាន់ AFF Suzuki Cup 2018​ខាងមុខនេះ៕

Source: Kampuchea Thmey Daily