ភ្នំពេញ ៖ ឈ្មោះ ឡាយ សុជាតិ និងប្រពន្ធឈ្មោះ អុប សុភា បានដាក់ពាក្យបណ្តឹងកាលពីថ្ងៃទី ២៤ ខែមេសា ឆ្នាំ២០១៨ ជូន ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ ស្នើសុំចាត់មន្ត្រីជំនាញបើកការស៊ើបអង្កេត និងអធិការកិច្ចលើវិញ្ញាបនបត្រសំគាល់ម្ចាស់អចលនវត្ថុលេខ 17100103-4989 ចុះថ្ងៃទី៣ ខែសីហា ឆ្នាំ២០១៧ ចេញដោយមន្ទីររៀបចំដែនដីនគរូបនីយកម្មសំណង់ និងសុរិយោដីខេត្តសៀមរាប។
បន្ទាប់មកក្រសួងរៀបចំដែនដី ក៏បានចេញលិខិតលេខ 14-18 ដនស/អសដក ចុះថ្ងៃទី 13 ខែមិថុនា ឆ្នាំ២០១៨ ដោយលោក លឹម វ៉ាន់ រដ្ឋលេខាធិការក្រសួងជម្រាបទៅអភិបាលខេត្តសៀមរាប ពិនិត្យនិងដោះស្រាយ។ ប៉ុន្តែមិនត្រូវបានចៅហ្វាយខេត្តសៀមរាបយកភ្នែកមើលឡើយ បែរជាបណ្តោយអោយក្រុមហ៊ុន លី អ៊ុំអេង យកកងកម្លាំងទៅហ៊ុមព័ទ្ធរបងលើដីប្រជាពលរដ្ឋស្លូតត្រង់ដែលគ្នារស់នៅស្របច្បាប់ប្រកប អាជីវកម្មរាប់សិបឆ្នាំមកហើយអស់រលីង។
យោងតាមឯកសារពាក់ព័ន្ធមួយចំនួនដែលយើងទទួលបានបញ្ជាក់ថា កាលពីអំឡុងឆ្នាំ២០១០ ឈ្មោះ ឡាយ សុជាតិនិងប្រពន្ធអុប សុភា បានទិញដីធ្វើអាជីវកម្មមួយកន្លែងស្ថិតនៅផ្សាររាត្រីអង្គរឃ្យូងយូ ទំហំ ៥៥ ម៉ែត្រ x ៧៥ ម៉ែត្រ ពីឈ្មោះ ចិត្ត សុធា អ្នកគ្រប់គ្រងដីធ្វើអាជីវកម្ម ដើម្បីបើកមុខរបររកស៊ី។ បន្ទាប់ពីផ្តិតមេដៃ លក់ទិញរួចបានប្រគល់ប្រាក់ថ្លៃទិញដីអោយម្ចាស់ដីរួចរាល់។ ឈ្មោះ ឡាយ សុជាតិនិងប្រពន្ធឈ្មោះអុប សុភា ក៏បានដាក់ពាក្យស្នើសុំប្រកបអាជីវកម្មដាក់រទេះភ្លើងក្មេងជិះកំសាន្ត ទោងយោលក្មេងជិះលេងកំសាន្ត ផ្ទះកូនបាល់កូនក្មេង គប់ប៉េងប៉ោង ថាសហោះ ជិះកូនទា និងឡានបុកគ្នា ពីអាជ្ញាធរខេត្តក៏ដូចជាមន្ទីរជំនាញតាំងពីឆ្នាំ២០១០ ដោយមានលិខិតអនុញ្ញាតគ្រប់ជ្រុងជ្រោយទាំងអស់ ។ តាំងពីចាប់ផ្តើមបើកអាជីវកម្ម រហូតមកដល់សព្វថ្ងៃគឺពុំដែលមានការរំខានពីបុគ្គលណាមួយនោះទេ។
បន្ទាប់មកនៅក្នុងអំឡុងឆ្នាំ២០១៧ ស្រាប់តែឈ្មោះ លី អ៊ុំអេង បានបញ្ជាគេអោយយកគ្រឿងចក្រ មកឈូសឆាយចាក់ដីរំលោភលើដីលំនៅដ្ឋាន និងដីដំណាំហូបផ្លែដូចជា ខ្នុរ ស្វាយ ល្ហុង ព្រីង និងចេក របស់ឈ្មោះ ឡាយ សុជាតិ និងឈ្មោះ អុប សុភា អស់ស្ទើរទាំងស្រុង។ ឃើញដូច្នេះឈ្មោះ ឡាយ សុជាតិ និងភរិយា ក៏បានប្តឹងទៅអាជ្ញាធរគ្រប់ជាន់ថ្នាក់ អោយជួយរកយុត្តិធម៌ ហើយក៏មានការប្រជុំដោះស្រាយជាហូរហែ តាំងពីថ្នាក់សង្កាត់ ក្រុង រហូតដល់ខេត្ត ប៉ុន្តែពុំទទួលបានលទ្ធផលនៅឡើយ។ បែរជានៅរសៀលថ្ងៃទី២៥ ខែកញ្ញា ឆ្នាំ ២០១៨ លោកស្រី លី អ៊ុំអេងនិងបក្ខពួកបាននាំកងកម្លាំងប៉ូលិស ប៉េអឹម បានយករបងស័ង្កសី មកហ៊ុមព័ទ្ធលើដីធ្វើអាជីវកម្មរបស់ឈ្មោះ ឡាយ សុជាតិ និងប្រពន្ធឈ្មោះ អុប សុភា ទាំងអស់ ដោយមិនអនុញ្ញាតអោយចូលយកសូម្បីតែសំភារៈធ្វើអាជីវកម្មដែលដាក់នៅលើដីនោះចេញឡើយ។
តាមសម្តីប្រជាពលរដ្ឋដែលឃើញហេតុការណ៍ពេលដែលកម្លាំងមានសមត្ថកិច្ចចុះមកបិទរបងព័ទ្ធជុំវិញដីធ្វើអាជីវកម្មរបស់ឈ្មោះ ឡាយ សុជាតិ បាននិយាយទាំងខឹងសម្បាថា អាងតែពួកវាយកអំណាចមានលុយ ចង់ធ្វើអីក៏បានដែរកងកម្លាំងប៉ូលិស ប៉េអឹម សម្រាប់ជួយរក្សាសន្តិសុខ ជូនប្រជាពលរដ្ឋបែរជាយកមកប្រើប្រាស់សម្រាប់រំលោភបំពានយកដីប្រជាពលរដ្ឋទន់ខ្សោយទៅវិញ។
ជាក់ស្តែងដូចយើងឃើញនឹងភ្នែក ហើយបើយើងឈ្នះក្តី ហើយចង់មកយកដីនេះ គួរតែទុកអោយគ្នាអ្នកចាញ់ក្តីរុះរើសំភារៈរបស់របរគ្នាចេញសិនទៅកុំលេងលបៗយករបងមកព័ទ្ធយកឆៅៗអញ្ចឹងតើត្រង់ណាភាពយុត្តិធម៌? ខ្មែរដូចគ្នាសោះគួរតែយោគយល់ខ្លះទៅលោកអើយ។
ដោយឡែក លោកស្រី អុប សុភា បាននិយាយទាំងទឹកភ្នែកថា តុលាការគួរតែបើកការស៊ើបអង្កេតការលួចចេញប្លង់កម្មសិទ្ធិដីដែល ឈ្មោះ លី អ៊ុំអេង យកមកដាក់ជាភស្តុតាងក្នុងសំណុំរឿងសិនទៅមុន នឹងសម្រេចអោយមានការចាញ់ឈ្នះ ថា តើមន្ទីររៀបចំដែនដីខេត្តសៀមរាបចេញប័ណ្ណហ្នឹងស្របច្បាប់ដែរ ឬអត់? តើមានអាជ្ញាធរពាក់ព័ន្ធ ឬអ្នកជាប់ព្រំផ្តិតមេដៃដឹងឮដែរឬអត់? កុំចេះតែចេញៗយកទៅអោយតុលាការ ធ្វើជាសំអាងយ៉ាងអញ្ចឹងងាប់ប្រជាពលរដ្ឋស្លូតត្រង់អស់ហើយ។
ជាចុងក្រោយតាមរយៈអ្នកសារព័ត៌មាន លោកស្រី អុប សុភា សំណូមពរដល់ប្រមុខរាជរដ្ឋាភិបាល មេត្តាជួយរកយុត្តិធម៌ដល់គ្រួសាររបស់គាត់ផង។
ដោយឡែក លោកស្រី លី អ៊ុំអេង អ្នកសារព័ត៌មានយើងពុំអាចទំនាក់ទំនងសុំការបកស្រាយបានទេ នៅថ្ងៃទី២៦ ខែកញ្ញា នេះ ដោយពុំស្គាល់លេខទូរស័ព្ទ យើងរង់ចាំទទួលការបកស្រាយពន្យល់គ្រប់ភាគីពាក់ព័ន្ធគ្រប់ពេល៕
Source: Kampuchea Thmey Daily
0 Comments