រដ្ឋាភិបាលចិន ផ្តល់រថយន្ត ម៉ូតូ និងឧបករណ៍អេឡិចត្រូនិក ដែលមានតម្លៃ២,៥លានដុល្លារ សម្រាប់ការធ្វើជំរឿននៅកម្ពុជា

ភ្នំពេញ ៖ រដ្ឋាភិបាលនៃសាធារណរដ្ឋប្រជាមានិតចិន បានផ្តល់ជំនួយជារថយន្តចំនួន៥២គ្រឿង ម៉ូតូ៣០០គ្រឿង និងឧបករណ៍អេឡិចត្រូនិកជាច្រើនគ្រឿង ដែលមានតម្លៃសរុបប្រមាណ ២,៥លានដុល្លារ ដើម្បីបម្រើដល់ការធ្វើជំរឿននៅកម្ពុជា ដែលនឹងធ្វើឡើងនៅឆ្នាំ២០១៩ខាងមុខនេះ ហើយពិធីប្រគល់ និងទទួលបានធ្វើឡើងនៅក្រសួងមហាផ្ទៃ កាលពីព្រឹកថ្ងៃទី២៦ ខែកញ្ញា ឆ្នាំ២០១៨។

យោងតាមរបាយការណ៍ដែលបង្ហាញក្នុងពិធីប្រកាសគណៈកម្មាធិការជំរឿនទូទៅប្រជាជនរាជធានី-ខេត្ត និងប្រគល់ទទួលសម្ភារៈជំរឿន ដែលជាជំនួយរបស់សាធារណរដ្ឋប្រជាមានិតចិនបានបង្ហាញថា សម្ភារៈដែលជាជំនួយរបស់ចិននេះរួមមាន៖ រថយន្ត៥២គ្រឿង ម៉ូតូ៣០០គ្រឿង កុំព្យូទ័រលើតុ៤៥០គ្រឿង កុំព្យូទ័រយួរដៃ៥០គ្រឿង ម៉ាស៊ីនបោះពុម្ពឯកសារ៣០គ្រឿង ម៉ាស៊ីនបញ្ចាំង Slide ៣០គ្រឿង ម៉ាស៊ីនថតចម្លង១០គ្រឿង Tablet ២០០គ្រឿង និងម៉ាស៊ីន Server។

តំណាងឯកអគ្គរដ្ឋទូតចិនប្រចាំនៅកម្ពុជា លោក លី អាន ដែលបានចូលរួមក្នុងពិធីនោះ បានថ្លែងថា ការធ្វើជំរឿនប្រជាជននេះ គឺមានសារៈសំខាន់ណាស់ចំពោះការស្វែងយល់ពីស្ថានភាពនៃការអភិវឌ្ឍប្រទេសជាតិ និងការចងក្រងគោលនយោបាយនៃការអភិវឌ្ឍសេដ្ឋកិច្ចសង្គម ក៏ដូចជាបញ្ហាពាក់ព័ន្ធនឹងជីវភាពរបស់ប្រពលរដ្ឋ។ លោកបញ្ជាក់ថា ជំនួយរបស់ចិននៅពេលនេះ នឹងជាចំណែកមួយជួយឲ្យការធ្វើជំរឿនរបស់រាជរដ្ឋាភិបាលកម្ពុជា បានដំណើរការដោយភាពល្អប្រសើរ និងទទួលបានជោគជ័យ។

ចំណែកទេសរដ្ឋមន្ដ្រី ឆាយ ថន បានបង្ហាញនូវការជឿជាក់ថា រថយន្ដ ម៉ូតូ និងសម្ភារជំរឿនដ៏ច្រើនសន្ធឹកសន្ធាប់នេះ នឹងជួយដល់មន្ដ្រីជំរឿន មានលទ្ធភាពចាត់ចែងគ្រប់គ្រងការងារត្រួតពិនិត្យ តាមដានការប្រមូលទិន្នន័យតាមមូលដ្ឋាន ការដឹកជញ្ជូនឯកសារ ព្រមទាំងការកែច្នៃ និងការវាយបញ្ចូលទិន្នន័យក្នុងកុំព្យូទ័រ ការថតចម្លងឯកសារជំរឿនជាដើម។ ជាមួយគ្នានោះ លោកទេសរដ្ឋមន្ដ្រី ក៏បានសម្ដែងនូវការដឹកគុណដ៏ជ្រាលជ្រៅចំពោះប្រទេសចិន និងប្រជាជនចិន រាជរដ្ឋាភិបាល នៃសាធារណរដ្ឋប្រជាមានិតចិន ដែលតែងតែជួយឧបត្ថម្ភគាំទ្រដល់ប្រទេសកម្ពុជា ក្នុងការអភិវឌ្ឍលើគ្រប់វិស័យ។

សម្ភារៈទាំងអស់នេះមិនគ្រាន់តែប្រើប្រាស់សម្រាប់ការងារជំរឿនប្រជាជនប៉ុណ្ណោះទេ តែវានឹងបម្រើឲ្យការងារជំរឿន អង្កេតផ្សេងៗទៀតនៅពេលអនាគត មានដូចជា ជំរឿនកសិកម្ម ជំរឿនសេដ្ឋកិ្ចច ជារួម គឺបម្រើឲ្យការងារប្រព័ន្ធស្ថិតិជាតិទាំងមូល និងការងារផែនការទាំងថ្នាក់ជាតិ និងថ្នាក់ក្រោមជាតិ។

សូមបញ្ជាក់ថា កម្ពុជានឹងចាប់ផ្តើមធ្វើជំរឿនប្រជាជនលើកទី៣ នឹងចាប់ធ្វើពីថ្ងៃទី០៣ ដល់ថ្ងៃទី១៣ ខែមីនា ឆ្នាំ២០១៩។ ជំរឿននេះគ្រោងប្រើមន្ត្រីរហូតដល់ទៅ៤៧,០០០នាក់ និងគ្រោងចំណាយថវិកាប្រមាណ៨លានដុល្លារអាមេរិក ដែលជាថវិការបស់រាជរដ្ឋាភិបាល។ បើតាមការប៉ានស្មានប្រជាពលរដ្ឋនៅកម្ពុជាក្នុងឆ្នាំ២០១៩ អាចកើនឡើងរហូតដល់១៦លាននាក់៕