ភ្នំពេញ ៖ បុរសជនជាតិស្បែកខ្មៅជាជនជាតិនីហ្សេរីយ៉ាចំនួន ១១នាក់ ត្រូវបានកម្លាំងនគរបាល ខណ្ឌចំការមនចាប់បញ្ជូនយកទៅ ប្រគល់អោយនគរបាលនៃការិយាល័យស៊ើបអង្កេត និង អនុវត្តន៍នីតិវិធីរាជធានីភ្នំពេញ ក្រោយពីពួកគេមានជម្លោះឈ្លោះគ្នា បង្កជាហិង្សាបណ្តាលម្នាក់រងរបួសដៃនៅក្នុងហាងមួយកន្លែងនៅខាងក្រោយ ផ្សារ សុវណ្ណារួចមកនោះ។
ហេតុការណ៍នេះដែរ បានបង្កការភ្ញាក់ផ្អើលកើតឡើងនៅវេលាម៉ោង៤និង១៥នាទីល្ងាច ថ្ងៃទី២៦ ខែកញ្ញា ឆ្នាំ២០១៨ នៅចំណុចភោជនីយដ្ឋាន អូប៊ីអេហ្សេ ផ្ទះលេខ T-៣៤ ផ្លូវតូប៉ាស់ (ក្រោយផ្សារសុវណ្ណា) ក្នុងសង្កាត់ ទំនប់ទឹក ខណ្ឌចំការមន។
តាមប្រភពព័ត៌មានពីនគរបាលបានប្រាប់ឲ្យដឹងថា មុនពេលកើតហេតុ ក្រុមបុរសជនជាតិស្បែកខ្មៅជាជនជាតិនីហ្សេរីយ៉ាទាំង១១នាក់ ក្នុងនោះមានស្ត្រីជនជាតិខ្មែរជាប្រពន្ធចំនួន ៤ ទៅ ៥នាក់ផងដែរ នាំគ្នាចូលទៅហូបអី និង ជួបជុំគ្នានៅក្នុង ហាងដែលមានយីហោអូប៊ីអេហ្សេ។ លុះបន្តិចក្រោយមក ក៏ស្រាប់តែមានក្រុមជនជាតិស្បែកខ្មៅចំនួន៣នាក់ ដោយម្ខាងមានគ្នាម្នាក់ និងម្ខាងទៀតមានគ្នា ២នាក់ បានឈ្លោះប្រកែកគ្នា និង ឈានទៅដល់ការវាយតប់គ្នានៅខាងក្នុង ហាងបង្កឲ្យមានការភ្ញាក់ផ្អើលកើតឡើងតែម្តង។
ប្រភពដដែលបានប្រាប់បន្តទៀតថា ក្រោយពេលកើតហេតុ ភ្លាមៗ នោះ កម្លាំងមានសមត្ថកិច្ចខណ្ឌចំការមនជាច្រើននាក់ បានចុះទៅដល់កន្លែងកើតហេតុ ដោយបានឃើញបុរស ជនជាតិ ស្បែក ខ្មៅម្នាក់មានស្នាមរបួសត្រង់បាតដៃម្ខាងហូរឈាមកក្លាក់ផងដែរ។ ភ្លាមនោះក៏បានធ្វើការចាប់ឃាត់ខ្លួនពួកគេយកទៅកាន់នគរបាលប៉ុស្តិ៍ទំនប់ទឹក ដើម្បីធ្វើការសាកសួរទើបដឹងថា ពួកគេឈ្លោះគ្នា ដោយសារតែការនិយាយដើមគ្នា ទើបបង្ករជា ជម្លោះ និង ប្រើកាំបិតវាយតប់គ្នាបង្កជារបួសស្នាមបែបនេះ។
ក្រោយពេលដែលកម្លាំងមានសមត្ថកិច្ចចាប់ឃាត់ខ្លួនបុរសជនជាតិនីហ្សេរីយ៉ាទាំង ១១នាក់ ដែលសុទ្ធតែមានប្រពន្ធខ្មែរ និងមានកូនតូចតាចផងដែរនោះ យកមកធ្វើការសាកសួរមិនឃើញមានឯកសារអ្វីគ្រប់គ្រាន់ក្នុងការចូលមករស់នៅក្នុង ប្រទេសកម្ពុជារបស់យើងនោះ ទើបសម្រេចបញ្ជូនពួកគេបន្តទៅប្រគល់ឲ្យនគរបាលការិយាល័យស៊ើបអង្កេត និង អនុវត្តន៍នីតិវិធីចាត់ការទៅតាមនីតិវិធី៕
Source: Kampuchea Thmey Daily
0 Comments