សៀមរាប ៖ ស្ត្រីរងគ្រោះក្នុងអំពើចាក់សោបង្ខាំង ពីសំណាក់ភរិយារបស់លោកអធិការនគរបាលស្រុកសូទ្រនិគម សម្រេចប្តឹងបន្តទៅសាលាឧទ្ធរណ៍ ក្រោយតុលាការសៀមរាប តម្កល់រឿងអត់ចាត់ការ។
បណ្តឹងឧទ្ធរណ៍របស់ឈ្មោះម៉ៅ ណែត ចុះថ្ងៃទី២៧ខែកញ្ញាឆ្នាំ២០១៨បញ្ជាក់ថា សុំប្តឹងឧទ្ធរណ៍ នឹងដីកាសម្រេចតម្កល់រឿងទុកឥតចាត់ការលេខ១១៨៩ចុះថ្ងៃទី១៣ ខែកញ្ញា ឆ្នាំ២០១៨។
សំណុំរឿងព្រហ្មទណ្ឌលេខ៣៩០ ចុះថ្ងៃទី៣០-០៣-២០១៨របស់អយ្យការអមសាលាដំបូងខេត្តសៀមរាប។សំណុំរឿងព្រហ្ម ទណ្ឌលេខ៤៧១ ចុះថ្ងៃទី២៧-០៤-២០១៨ របស់អយ្យការអមសាលាដំបូងខេត្តសៀមរាប។
ខ្លឹមសារបណ្តឹងបញ្ជាក់ថា នាងខ្ញុំយល់ឃើញថា មានភស្តុតាងគ្រប់គ្រាន់ដើម្បីចោទប្រកាន់ឈ្មោះផល មាលាផល ភេទស្រីនិងឈ្មោះណុប សារ៉ាក់ ភេទប្រុស។ ទីលំនៅភូមិដំដែកផ្សារ ឃុំដំដែក ស្រុកសូទ្រនិគមខេត្តសៀមរាបពីបទរំលោភលើកម្មសិទ្ធិឯកជន ប្រព្រឹត្តនៅភូមិបុស្ស ឃុំដំដែកស្រុកសូទ្រនិគមខេត្តសៀមរាបកាលពីថ្ងៃទី១៥ ខែកុម្ភៈ ឆ្នាំ២០១៨។ ផ្ទុយទៅវិញបែរជាតំណាងអយ្យការអមសាលាដំបូងខេត្ត សៀមរាបសម្រេចតម្កល់រឿងនេះ ទុកឥតចាត់ ការទៅវិញ។
សូមបញ្ជាក់ថា សំណុំរឿងព្រហ្មទណ្ឌមួយនេះ ក្មេងស្រីរងគ្រោះឈ្មោះម៉ៅ ណែត បានប្តឹងលោកណុប សារ៉ាក់ ជាអធិការនគរបាលស្រុកសូទ្រនិគម និងប្រពន្ធឈ្មោះផល មាលាផល ទៅតុលាការខេត្តសៀមរាប កាលពីថ្ងៃទី២៨ ខែមីនា ឆ្នាំ២០១៨។ ដោយចោទប្រកាន់ពីបទរំលោភលើកម្មសិទ្ធិឯកជន(ចាក់សោផ្ទះបង្ខាំង) ព្រមទាំងទាមទារសំណងជំងឺចិត្ត២០លានរៀលនិងឲ្យតុលាការផ្តន្ទាទោសផងដែរ។ ប៉ុន្តែនៅថ្ងៃទី១៣ខែកញ្ញាឆ្នាំ២០១៨ លោកថេង សំណាង តំណាងអយ្យការអមសាលាដំបូងខេត្ត សៀមរាប បានជូនដំណឹង សម្រេចតម្កល់សំណុំរឿងឥតចាត់ការ។
ម៉ៅ ណែត បញ្ជាក់ថា កាលពីថ្ងៃទី១៥ ខែកុម្ភៈ ឆ្នាំ២០១៨ ឈ្មោះផល មាលាផល បាននាំបក្ខពួក ទៅចាក់សោផ្ទះរបស់នាង មិនឲ្យរូបនាងចូលរស់នៅ ថែមទាំងគំរាមចាប់ដាក់គុកទៀតផង ដោយសាររឿងលុយ២លានរៀល។ ពេលនេះនាងសង្ឃឹម និងជឿជាក់ថា សាលាឧទ្ធរណ៍ និងបើកការស៊ើបអង្កេតហើយផ្តល់យុត្តិធម៌ដល់រូបនាង ជាក់ជាមិនខាន។
ទាក់ទិននឹងករណីនេះដែរ លោកណុប សារ៉ាក់ ជាអធិការនគរបាលស្រុកសូទ្រនិគម បានឲ្យដឹងនៅថ្ងៃទី២៧នេះថា លោកបានដឹងពីរឿងនេះហើយ គឺតុលាការខេត្តសៀមរាប តម្កល់រឿងអត់ចាត់ការ ព្រោះសំណុំរឿងនេះតុលាការរកភស្តុតាង មិនឃើញ។
ប្រភពបានឲ្យដឹងថា ករណីជម្លោះរវាងប្រពន្ធលោកអធិការនគរបាលសូទ្រនិគមនិងពលរដ្ឋក្នុងមូលដ្ឋានខាងលើ នៅមិនទាន់រកដំណោះស្រាយបាននៅឡើយ ខណៈម្នាក់ៗចង់បបង្ហាញសាច់ដុំរៀងៗខ្លួន៕
Source: Kampuchea Thmey Daily
0 Comments