ពានរង្វាន់លីគកំពូលកម្ពុជា (Metfone Cambodian League 2018) ក្រោមការរៀបចំពីសំណាក់គណៈកម្មការប្រកួតបាល់ទាត់ជាតិ (CNCC) សេនាធិការរបស់សហព័ន្ធកីឡាបាល់ទាត់កម្ពុជា នឹងធ្វើដំណើរដល់សប្ដាហ៍២២របស់ខ្លួននៅចុងសប្ដាហ៍នេះដែលមានការប្រកួតសរុបចំនួន៦គូ ព្រមទាំងមានផ្សាយផ្ទាល់គ្រប់ការប្រកួតទាំងអស់ គឺកើតចេញពីការចាប់ដៃគ្នារវាងទូរទស្សន៍ BTV New, គណៈកម្មការប្រកួតបាល់ទាត់ជាតិ (CNCC) និងសារព័ត៌មានកម្ពុជា។
កម្មវិធីប្រកួតសរុបប្រចាំសប្ដាហ៍ទី២២នេះនៅថ្ងៃសៅរ៍ ទី២៩ ខែកញ្ញា ឆ្នាំ២០១៨ ក្រុមណាហ្គាវើល ប៉ះក្រុមអគ្គស្នងការដ្ឋាននគរបាលជាតិ នៅវេលាម៉ោង៦ល្ងាចលើទីលានពហុកីឡដ្ឋានជាតិ មានផ្សាយផ្ទាល់តាមប៉ុស្តិ៍ BTV News ខណៈក្រុមអគ្គីសនីកម្ពុជា ជួបក្រុមក្រសួងការពារជាតិ នៅម៉ោង៣រសៀលលើទីលានកីឡដ្ឋានអគ្គីសនីកម្ពុជា ហ្វេសប៊ុករបស់កម្ពុជាថ្មី និងក្រុមវេស្ទើនភ្នំពេញ ប៉ះក្រុមអាស៊ីអឺរ៉ុប នៅម៉ោង៣រសៀលលើទីលានកីឡដ្ឋានវេស្ទើន មានផ្សាយផ្ទាល់តាមយូធូបរបស់ CNCC។
ចំណែកនៅថ្ងៃអាទិត្យ ទី៣០ខែកញ្ញា ឆ្នាំ២០១៨ វិញក្រុមព្រះខ័នរាជស្វាយរៀង ប៉ះក្រុមវិសាខា នៅម៉ោង៦ល្ងាចលើទីលានកីឡដ្ឋានខេត្តស្វាយរៀង មានផ្សាយផ្ទាល់តាមប៉ុស្តិ៍ BTV News ខណៈក្រុមបឹងកេតជួបភ្នំពេញក្រោន នៅវេលាម៉ោង៦ល្ងាចដូចគ្នាលើទីលានពហុកីឡដ្ឋានជាតិ មានផ្សាយផ្ទាល់តាម CNCC និងក្រុមសូលទីឡូអង្គរ ប៉ះក្រុមអង្គរថាយហ្គឺរ នៅវេលាម៉ោង៣និង៣០នាទីលើទីលានកីឡដ្ឋានខេត្តសៀមរាប មានផ្សាយផ្ទាល់តាមហ្វេសប៊ុកកម្ពុជាថ្មី។
សម្រាប់តារាងចំណាត់ថ្នាក់ឃើញបណ្តោះអាសន្នប្រចាំសប្ដាហ៍ទី២១នេះឃើញថា ក្រុមណាហ្គាវើល ឡើងឈរកំពូលតារាង មាន៥៣ពិន្ទុ តាមពីក្រោយដោយក្រុមលេខ២ បឹងកេតអែហ្វស៊ី មាន៤៩ពិន្ទុ ហើយក្រុមវិសាខា ឈរលេខ៣ មាន៤៥ពិន្ទុ។ ក្រុមលេខ៤ក្រសួងការពារជាតិ មាន៣៩ពិន្ទ ខណៈក្រុមលេខ៥ ភ្នំពេញក្រោន មាន៣៣ពិន្ទុ ក្រុមលេខ៦ ព្រះខ័នរាជស្វាយរៀង មាន៣០ពិន្ទុ ក្រុមលេខ៧អង្គរថាយហ្គឺរ មាន២៧ពិន្ទុ ក្រុមលេខ៨ អាស៊ីអឺរ៉ុប មាន២៧ពិន្ទុដែរ ក្រុមលេខ៩ក្រុមអគ្គស្នងការដ្ឋាននគរបាលជាតិ មាន២៤ពិន្ទុហើយក្រុមលេខ១០ សូលទីឡូអង្គរ មាន១៩ពិន្ទុ ស្របពេលក្រុមអគ្គីសនីកម្ពុជា ឈរលេខ១១មាន៩ពិន្ទុ និងក្រុមវេស្ទើនភ្នំពេញ ឈរលេខ១២ មាន១ពិន្ទុ។
ពានរង្វាន់លីគកំពូលកម្ពុជា នៅសល់១ប្រកួតទៀតនឹងបញ្ចប់រដូវកាលរបស់ខ្លួនហើយ ខណៈក្រុមណាហ្គាវើល ជាម្ចាស់ជើងឯក ក្រោយមានពិន្ទុច្រើនជាងក្រុមលេខ២បឹងកេត រហូតដល់ទៅ៤ពិន្ទុ។
ពានរង្វាន់លីគកំពូលកម្ពុជា រដូវកាលនេះប្រើប្រាស់រូបមន្តប្រកួតសន្សំពិន្ទុវិលជុំចំនួន២ជើងមាន២២សប្ដាហ៍ ដើម្បីស្វែងរកក្រុមខ្លាំងដែលមានពិន្ទុច្រើនជាងគេដណ្តើមជើងឯកប្រចាំឆ្នាំ។ ការប្រកួតចាប់ផ្តើមពីថ្ងៃទី៣ខែមីនា ដល់ថ្ងៃទី៣០ខែកញ្ញា ឆ្នាំ២០១៨ ដែលមានសមាជិកចំនួន១២ក្រុម។ ក្រុមជើងឯកនឹងទទួលបានកៅអីទៅចូលរួមប្រកួតក្នុងពានរង្វាន់ AFC Cup 2019, ពានរង្វាន់ Mekong Club Championship ជាដើម៕
Source: Kampuchea Thmey Daily
0 Comments