ភ្នំពេញ ៖ សមត្ថកិច្ចនគរបាលខណ្ឌសែនសុខ បានចាប់ខ្លួនយុវជនម្នាក់ចោទពីបទសង្ស័យជាប់ពាក់ព័ន្ធជួញដូរថ្នាំញៀនល្មើសច្បាប់ បន្ទាប់ពីសមត្ថកិច្ចបានឆ្មក់ស្ទាក់ឃាត់ឆែកឆេរយុវជនខាងលើដែលកំពុងធ្វើដំណើរនៅវេលាម៉ោង៣រំលងអធ្រាត្រ ថ្ងៃទី២៧ ខែកញ្ញា ឆ្នាំ២០១៨ រកឃើញលាក់ទុកថ្នាំញៀនក្នុងហោប៉ៅខោ។
ឈ្មោះ ហុង យូរ៉ា ហៅជ្រូក ភេទប្រុស អាយុ៣០ឆ្នាំ ជាជនជាប់ចោទដែលត្រូវបានគេឃាត់ខ្លួនខាងលើ មានទីលំនៅភូមិត្នោតជ្រុំ សង្កាត់បឹងទំពុន ខណ្ឌមានជ័យ។
ប៉ូលិសបាននិយាយថា នៅមុនពេលកើតហេតុកម្លាំងយាមល្បាតរបស់នគរបាលខណ្ឌបានប្រទះឃើញជនសង្ស័យខាងលើកំពុងតែជិះម៉ូតូម្នាក់ឯង តាមផ្លូវលេខ២០០៤ក្នុងភូមិស្លែងរលើង នៅវេលាម៉ោង៣ទៀបភ្លឺឈានចូលថ្ងៃទី២៧ ខែកញ្ញា ឆ្នាំ២០១៨ ក្នុងទិសដៅពីកើតទៅលិច ដោយមានការសង្ស័យសមត្ថកិច្ចក៏បានដេញស្ទាក់ឃាត់ឆែកឆេរ រកឃើញថ្នាំញៀនចំនួនមួយកញ្ចប់ធំនៅក្នុងហោប៉ៅខោខាងស្តាំរបស់គេ ទើបចាប់ខ្លួនតែម្តងយកមកធ្វើការណែនាំ។
ជនសង្ស័យត្រូវបានសមត្ថកិច្ចត្រួតពិនិត្យទឹកនោមរកឃើញមានផ្ទុកនូវសារធាតុញៀនក្នុងផងដែរ ហើយថ្នាំញៀនដែលរកឃើញនេះគឺខ្លួនគេទិញមកសម្រាប់ប្រើផ្ទាល់ខ្លួន។
ប៉ូលិសខណ្ឌសែនសុខហាក់ដូចជាអសមត្ថភាពក្នុងការស្រាវជ្រាវតាមរកប្រភពមេខ្លោងធំរបស់គេ ដែលកន្លងមកចាប់បានច្រើននាក់ដែរជាអ្នកចែកចាយនិងជួញដូរ និង ប្រើប្រាស់តូចតាចប៉ុន្តែរកមេខ្លោងធំមិនដែលឃើញសោះ៕
Source: Kampuchea Thmey Daily
0 Comments