ក្រុម​អង្គ​រថា​យ​ហ្គឺ​រ រៀបចំ​កម្មវិធី​ជួបជុំ​ប្រចាំឆ្នាំ​របស់​ក្លិប​ខ្លួន​នៅ​ខេត្តសៀមរាប

ក្រុមបាល់ទាត់​ខេ​ម​បូ​ឌា​ន​ថា​យ​ហ្គឺ​រ (Angkor Tiger FC) សមាជិក​ពានរង្វាន់​ជម្រើស​ជើងឯក​ជាតិ (Metfone Cambodian League) បានប្រកាស​ដល់​អ្នកគាំទ្រ​ថា​ក្លិប​នឹង​រៀបចំ​កម្មវិធី​ជួបជុំ​រវាង​ថ្នាក់ដឹកនាំ​ក្លិប កីឡាករ ម្ចាស់​ឧបត្ថម្ភ​និង​អ្នកគាំទ្រ ដែល​នឹង​ធ្វើឡើង​នៅ​ដំណាច់ខែ​នេះ​នៅលើ​ទឹកដី​ខេត្តសៀមរាប​។

កម្មវិធី​នេះ​មាន​ឈ្មោះថា Angkor Tiger Night ដែល​ជា​កម្មវិធី​ជួបជុំ​បំណាច់​ឆ្នាំ​រវាង​ក្រុម​គ្រួសារ​បាល់ទាត់​អង្គ​រថា​យ​ហ្គឺ​រ ទាំងអស់ (​លោក​ប្រធាន​ក្លឹប ក្រុមការងារ កីឡាករ អ្នកគាំទ្រ​) ដើម្បី​ជួបជុំ​រាំលេង​កម្សាន្ត និង​ថ្លែងអំណរគុណ​ដ៏​អ្នកគាំទ្រ​ទាំងអស់​ដែល​តែងតែ​គាំទ្រ​ដល់ ក្លឹប​បាល់ទាត់​អង្គ​រថា​យ​ហ្គឺ​រ ចាប់តាំងពី​ពួក​យើង​បាន​បង្កើត និង​ជាពិសេស​នៅពេលដែល​ក្លិប​បាន​ផ្លាស់​ប្តូរ​ទីតាំង​ទៅកាន់​ខេត្តសៀមរាប​។

កម្មវិធី​នេះ​រៀបចំ​នៅ​ថ្ងៃទី​៣០ ខែកញ្ញា ឆ្នាំ​២០១៨ វេលា​ម៉ោង ៧និង៣០ ដល់ ៩និង០០​យប់ នៅ​Palm Container Night Market (​ផ្លូវ​៦០) ព្រមទាំង​បើក​ឲ្យ​មហាជន​ចូលរួម​ដោយ​សេរី ខណៈ​អ្នក​ពាក់អាវ​ក្រុម​អង្គ​រថា​យ​ហ្គឺ​រ​ពណ៌​ទឹកក្រូច នឹង​ទទួលបាន​ភេសជ្ជ​ពិសារ​ដោយ​ឥត​ដែន​កំណត់​។ តំណាង​ក្លិប​មួយ​នេះ​បាន​លើក​ឡើង​ថា «​យើង​សង្ឃឹមថា​អ្នក​ទាំង​គ្នា នឹង​ទទួលបាន​ភាព​សប្បាយ​រីករាយ និង​ប្រែក្លាយ​ជា​រាត្រី​ជួបជុំ​ដ៏​ធំ​មួយ​ដែល​មិនអាច​បំភ្លេចបាន​»​។



ក្រុម​អង្គ​រថា​យ​ហ្គឺ​រ បាន​ប្តូរ​ឈ្មោះ​មកពី​ក្រុម​ត្រាយ​អាស៊ី​ភ្នំពេញ កាលពី​ចុងរដូវ​កាល​២០១៤ ហើយ​នៅ​រដូវ​កាល​២០១៥ គឺជា​កំណត់ត្រា​ល្អ​របស់​ក្លិប​ពោលគឺ អាច​ឡើង​ដល់​វគ្គ​៤​ក្រុម​ចុងក្រោយ​ទាំង​ពានរង្វាន់​សម្តេច ហ៊ុន សែន និង​ពានរង្វាន់​មិត្ត​ហ្វូ​ន​ខេ​ម​បូ​ឌា​ន​លី​ក ក្រោយ​ឈរ​ចំណាត់ថ្នាក់​លេខ​៣​ដូចគ្នា​។ ក្រុម​នេះ ទទួល​បាន​សិទ្ធិ​ប្រើប្រាស់​កីឡដ្ឋាន​ខេត្តសៀមរាប ពី​ក្រសួង​អប់រំ​យុវជន​និង​កីឡា កាលពី​រដូវ​កាល​ឆ្នាំ​២០១៧ កន្លង​ធ្វើជា​ទឹកដី​របស់ខ្លួន​រាល់​ការប្រកួត​នានា​។

លោក Akihiro Kato ប្រធាន​ក្លិប​អង្គ​រថា​យ​ហ្គឺ​រ ធ្លាប់បាន​បញ្ជាក់​ជុំ​អនាគត​របស់​ក្លិប​នៅ​ទឹកដី​ខេត្តសៀមរាប​ថា «​ខ្ញុំ​មាន​ហេតុផល​ពីរ​យ៉ាង ដោយ​ទី​១) គឺ​ចង់​ផ្ដល់​ទំនុកចិត្ត​ទៅលើ​សក្តានុពល​និង​ទេពកោសល្យ​របស់​ពួកគេ​ព្រោះ​ខ្ញុំ​គិតថា ពួកគេ​នឹង​អាច​ក្លាយទៅជា​និមិត្តរូប​បាល់ទាត់​កម្ពុជា​។ ចំណែក​ទី​២) វា​ជា​ផ្នែក​មួយ​នៃ​ផែនការ​របស់ខ្ញុំ ដែល​ចង់​បង្កើត​យុគមាស​សម្រាប់​អង្គ​រថា​យ​ហ្គឺ​រ ក្នុងពេល​៥​ទៅ​១០​ឆ្នាំ​ខាងមុខ​។ ខ្ញុំ​ដាក់​គោលដៅ​ឲ្យ​អង្គ​រថា​យ​ហ្គឺ​រ ក្លាយជា​ក្លិប​លេខ​១​ក្នុង​តំបន់​អាស៊ាន ហើយ​ខ្ញុំ​រំពឹងថា កីឡាករ​ទាំងអស់​នឹង​លះបង់​ខ្ពស់ ដើម្បី​សម្រេច​ទស្សន​វិស័យ​រប​ស់​យើង​។ អង្គ​រថា​យ​ហ្គឺ​រ ចង់​ក្លាយជា​និមិត្តរូប​នៃ​ក្ដី​សុ​បិ​ន្ត ក្ដី​សង្ឃឹម​និង​កម្លាំងចិត្ត សម្រាប់​ប្រជាពលរដ្ឋ​ខេត្តសៀមរាប ក៏ដូចជា​កម្ពុជា​ទាំងមូល​»៕

Source: Kampuchea Thmey Daily