បន្ទាយមានជ័យ ៖ នៅព្រឹកថ្ងៃទី២៧ ខែកញ្ញា ឆ្នាំ២០១៨នេះ ប្រជាពលរដ្ឋនៅតាមដងផ្លូវ៧មករា និង នៅក្នុងភូមិពង្រមានការហួសចិត្តយ៉ាងខ្លាំងដោយសារបានឃើញក្រុមឡានដឹកដីនិងឡានក្រឡុកស៊ីម៉ងត៍បើកលឿនដូចហោះរហូតដល់ដាច់កាឡេជ្រុះនៅតាមផ្លូវមិនដឹងប្រជាពលរដ្ឋមានការក្តៅក្រហាយយ៉ាងខ្លាំងចំពោះក្រុមឡានដឹកដីនិងឡានក្រឡុកស៊ីម៉ងត៍ទាំងអស់នោះបើកលឿនដូចហោះ គ្មានការប្រុងប្រយ័ត្នក្នុងការបើកបុកមនុស្សស្លាប់នោះទេ។
ប្រជាពលរដ្ឋនៅតាមដងផ្លូវ៧មករា និងភូមិពង្រ បានប្រាប់អ្នកយកព័ត៌មានឲ្យដឹងថា ពួកគាត់មានការក្តៅក្រហាយក្នុងចិត្ត ហើយក៏ភិតភ័យយ៉ាងខ្លាំងដែរ ដោយសារក្រុមឡានធន់ធំៗពិសេសឡានដឹកដីមិនគ្របធ្វើឲ្យដីជ្រុះធ្លាក់តាមផ្លូវប៉ះចំអ្នកធ្វើដំណើរហើយបើកដោយគ្មានការទទួលខុសត្រូវ គិតតែផលប្រយោជន៍ផ្ទាល់ខ្លួនបើកដូចឡានប្រណាំងបើកប្រញាប់ដឹកដីយកទៅចាក់នៅតាមផ្ទះ ហើយប្រញាប់វិលត្រឡប់មកវិញដោយគ្មានការប្រុងប្រយ័ត្នទទួលខុសត្រូវក្នុងការបុកមនុស្សស្លាប់នោះទេ យ៉ាងច្រើនរត់ចោលឡាន ហើយឲ្យថៅកែចូលមកបញ្ចប់រឿងជាការស្រេចជនរងគ្រោះបានត្រឹមតែយំអោបសពតែប៉ុណ្ណោះ។
ប្រជាពលរដ្ឋបានបញ្ជាក់ទៀតថា ជាក់ស្តែងនៅថ្ងៃទី១៧នេះមានឡានដឹកដីមួយគ្រឿង បានបើកដាច់កាឡេ នៅមុខមន្ទីរមុខងារសាធារណៈ ហើយដុំដែកលោតពេញផ្លូវសំណាងណាស់មិនបណ្តាលឲ្យគ្រោះថ្នាក់ដល់អ្នកធ្វើដំណើរតាមផ្លូវជាតិស្របពេលនោះបើសិនជាសិស្សានុសិស្សចេញពីសាលារៀន វិញមិនដឹងថា មានសិស្សរងគ្រោះ ដល់ជីវិតប៉ុន្មាននាក់នោះទេ។
ក្នុងនោះប្រជាពលរដ្ឋបានធ្វើការសំណូមពរដល់នគរបាលសណ្ដាប់ធ្នាប់ និង អាជ្ញាធរក្រុង សូមចុះពិនិត្យ និងណែនាំដល់ក្រុមឡានដឹកដីនិងឡានក្រឡុកស៊ីម៉ងត៍ដែលចូលចិតបើកឡានលឿនដូចហោះតាមបណ្តាផ្លូវនេះផងជៀសវាង គ្រោះថ្នាក់កើតឡើង ដោយមានតែពាក្យចូលរួមសោកស្តាយ៕
Source: Kampuchea Thmey Daily
0 Comments