ក្រុមបាល់ទាត់ណាហ្គាវើល បានគ្រងតំណែងជើងឯកលីគកំពូលកម្ពុជាឆ្នាំ២០១៨ ដែលខកខានជា៩ឆ្នាំមកនេះ ខណៈ លោក មាស ចាន់ណា ដែលជាគ្រូបង្វឹកបានសម្ដែងនូវការសប្បាយចិត្តជាខ្លាំង តែលោកថាជោគជ័យនេះ គឺកើតចេញពីជាការខិតខំប្រឹងប្រែងរបស់កីឡាករម្នាក់ៗនិងសកម្មភាពសាមគ្គីក្នុងក្រុមខ្ពស់។
គ្រូបង្វឹកកាន់អាជ្ញាប័ណ្ណ AFC A-License រូបនេះបានលើកឡើងថា «ផ្ដើមចេញពីកីឡាករម្នាក់ៗ ដោយខ្ញុំឃើញឆន្ទៈរបស់ពួកគាត់ម្នាក់ៗ គាត់ប្រឹងប្រែងខ្លាំង ។ ដូច្នេះពួកគាត់ជាកត្ដាសំខាន់ រួមផ្សំជាមួយអ្នកពីក្រោយខ្ញុំ ដូចជាគ្រូជំនួយ កីឡាករបម្រុងទាំងអស់ ដែលគោរពវិន័យបានល្អ ធ្វើឲ្យយើងមានឱកាសឈ្នះថ្ងៃនេះ។ បើទាក់ទងខ្លួនខ្ញុំផ្ទាល់ ខ្ញុំគិតថា វាមិនច្រើនទេ ទៅលើក្រុមទាំងមូល ខ្ញុំគិតថា កីឡាករច្រើនជាង ដែលធ្វើឲ្យយើងជោគជ័យ។ ចឹងយើងនឹងរក្សាកីឡាករច្រើន ដើម្បីបន្ដទទួលបានលទ្ធផលល្អនាឆ្នាំក្រោយ ក៏ដូចជាត្រៀមប្រកួតក្នុងពាន AF Cup 2019 ជាដើម»។
ពានរង្វាន់លីគកំពូលកម្ពុជា នៅសល់១ប្រកួតទៀតនឹងបញ្ចប់រដូវកាលរបស់ខ្លួនហើយ ខណៈក្រុមណាហ្គាវើល ជាម្ចាស់ជើងឯក ក្រោយមាន៥៣ពិន្ទុច្រើនជាងក្រុមលេខ២បឹងកេត៤៩ពិន្ទុ ពោលគឺមានគម្លាតគ្នារហូតដល់ទៅ៤ពិន្ទុ។ បើមើលក្នុងសកម្មភាពប្រកួត២១លើកមកនេះក្រុមណាហ្គាវើល អាចរកបានជ័យជម្នះរបស់ដល់១៧លើក ហើយស្មើគ្នាបាន២លើកនិងធ្លាប់បរាជ័យ២លើក។ មិនតែប៉ុណ្ណោះណាហ្គាវើល ជាក្រុមដែលអាចទាត់បញ្ចូលទីគូប្រកួតបានច្រើនជាងគេគិតត្រឹមពេលនេះពោលគឺបំប៉ោងសំណាញ់គេបាន៦០គ្រាប់ ហើយរបូតគ្រាប់បាល់វិញតែ១៥គ្រាប់ប៉ុណ្ណោះ។
ងាកទៅមើលប្រវត្តិសាស្ត្រវិញក្រុមណាហ្គាវើល ធ្លាប់ឈ្នះជើងឯកពានរង្វាន់លីគកំពូលកម្ពុជា ចំនួន២លើកដែរគឺនៅឆ្នាំ២០០៧និង២០០៩។ គិតត្រឹមដឹកនាំក្រុមណាហ្គាវើល ពីឆ្នាំ២០១៥ មកលោក មាស ចាន់ណា តែងតែបង្ហាញថា ក្រុមខ្លួនជាបេក្ខជនមួយដែលមិនអាចរំលងបានក្នុងការប្រជែងយកជើងឯក។ ជាក់ស្តែងគឺឆ្នាំ២០១៥ ទទួលបានជើងឯករងលីគកំពូលកម្ពុជា ក្រោយចាញ់បឹងកេត នៅវគ្គផ្តាច់ព្រ័ត្រដោយបាល់ប៉េណាំងទីកាត់សេចក្តី៣ទល់២ និងជើងឯករងពានរង្វាន់សម្តេចតេជោ ក្រោយចាញ់ព្រះខ័នរាជស្វាយរៀង។ ឆ្នាំ២០១៦ ណាហ្គាវើល ឈរចំណាត់ថ្នាក់លេខ៣ព្រមទាំងមានឱកាសទៅលេងវគ្គជម្រុះបឋមនៃពានរង្វាន់ AFC Cup 2017 ផងដែរ។ ឆ្នាំ២០១៧ ណាហ្គាវើល បានត្រឹមលេខ៣ក្រោយចាញ់ក្រសួងការពារជាតិ នៅវគ្គជម្រុះលីគកំពូលកម្ពុជា ខណៈពានរង្វាន់សម្តេចតេជោ ក្រុមនេះបានត្រឹមជើងឯករងក្រោយចាញ់ព្រះខ័នរាជស្វាយរៀង នៅវគ្គផ្តាច់ព្រ័ត្រ។
បើក្រឡេកមើលលទ្ធផលកាលពីរដូវកាលចាស់របស់ក្រុមណាហ្គាវើល បានបញ្ចប់ទៅដោយក្នុងរដូវកាលលីគកំពូលកម្ពុជា ឈរចំណាត់ថ្នាក់លេខ៤ ក្នុងចំណោមសមាជិកទាំង១២ក្រុម ខណៈកីឡាករជនជាតិរ្វ៉ាន់ដា Kipson ឈ្នះស្បែកជើងមាសប្រចាំរដូវកាលក្នុងនាមជាអ្នករកគ្រាប់បាល់បញ្ចូលទីបានច្រើនជាងគេ។ ចំណែកក្នុងពានរង្វាន់សម្តេចតេជោ ហ៊ុន សែន វិញ ណាហ្គាវើលបានត្រឹមជើងឯករងក្រោយចាញ់ក្រុមព្រះខ័នរាជស្វាយរៀង នៅវគ្គផ្ដាច់ព្រ័ត្រ៕
Source: Kampuchea Thmey Daily
0 Comments