បន្ទាយមានជ័យ ៖ ជនសង្ស័យម្នាក់ត្រូវបានកម្លាំងអាវុធហត្ថក្រុងប៉ោយប៉ែតឃាត់ខ្លួនតាមពាក្យបណ្តឹងរបស់ឈ្មោះ ណុប ណាវី ភេទស្រី អាយុ៤៩ឆ្នាំ មុខរបរលក់ដូរ រស់នៅភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ក្នុងរឿងលក់ដីពីម្ចាស់មួយទៅម្ចាស់មួយនៅវេលាម៉ោង ៨ព្រឹក និង ថ្ងៃទី២៧ ខែកញ្ញា ឆ្នាំ២០១៨ នៅចំណុចភូមិសូរិយា សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យក្រោយពីឃាត់ខ្លួនរួចហើយជនសង្ស័យត្រូវបានលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបញ្ជូនមកទីបញ្ជាការកងរាជអាវុធហត្ថខេត្តដើម្បីសាកសួរបន្ត។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារយុត្តិធម៌បានប្រាប់អ្នកយកព័ត៌មានឲ្យដឹងថា ដោយបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យបានធ្វើការសាកសួរទើបដឹងជនសង្ស័យមានឈ្មោះ គង់ អ៊ី ហៅ អ៊ឹមសែងM5 ភេទប្រុស អាយុ ៤៩ឆ្នាំ មុខរបរ ឈ្មួញរកស៊ីទិញ-លក់ដី រស់នៅ ភូមិសូរិយា សង្កាត់និមិត្ត ក្រុងប៉ោយប៉ែត។
លោកវរសេនីយ៍ឯក ម៉ែន ភិរម្យ បានបញ្ជាក់ឲ្យដឹងទៀតថា នៅថ្ងៃកើតហេតុនោះ ជនសង្ស័យឈ្មោះ គង់ អ៊ី បាននាំឈ្មួញទិញ-លក់ដី ទៅពិនិត្យទីតាំងដី២កន្លែង ស្ថិតនៅភូមិសូរិយា សង្កាត់និមិត្ត និងភូមិអូរឫស្សី សង្កាត់ផ្សារកណ្តាល ក្រុងប៉ោយប៉ែត ចំនួន ៤៥ហិកតា នៅពេលនិយាយថ្លៃត្រូវគ្នាហើយ ឈ្មួញទិញ-លក់ដី បានទាមទារពិនិត្យមើលឯកសារពាក់ព័ន្ធដីខាងលើ ដើម្បីប្រគល់ប្រាក់កក់ចំនួន ៥០.០០០ដុល្លារលុះពេលចុះទៅពិនិត្យឯកសារដីរួចរាល់ហើយ ក៏បែកគ្នាទៅវិញរៀងៗខ្លួន។
ក្រោយមកទើបជនរងគ្រោះត្រូវបានគេផ្តល់ដំណឹងមកថា ជនសង្ស័យខាងលើ បានលក់ដីឲ្យឈ្មួញ ដែលជាដីកម្មសិទិ្ធរបស់ជនរងគ្រោះ និងដីកម្មសិទិ្ធរបស់ប្រជាពលរដ្ឋមួយចំនួនផ្សេងទៀត ទើបជនរងគ្រោះបាន មកដាក់ពាក្យបណ្តឹងនៅមូលដ្ឋានកងរាជអាវុធហត្ថក្រុងប៉ោយប៉ែតតែម្តង។
លោកវរសេនីយ៍ឯក ម៉ែន ភិរម្យ បានបញ្ជាក់ទៀតថា ជនសង្ស័យកន្លងមកធ្លាប់បានលួចលក់ដីអ្នកដទៃ ទៅឲ្យឈ្មួញរកស៊ីទិញ-លក់ដី ជាច្រើនលើកមកហើយផ្អែកលើចម្លើយសារភាពរបស់ជនសង្ស័យខាងលើ អាចត្រូវចោទពីបទប៉ុនប៉ងលក់អចលនទ្រព្យអ្នកដទៃកម្លាំងជំនាញបានកសាងសំណុំបញ្ជូនជនសង្ស័យ ទៅតុលាការ ដើម្បីចាត់ការទៅតាមនីតិវិធីច្បាប់៕
Source: Kampuchea Thmey Daily
0 Comments