ភ្នំពេញ ៖ លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានអញ្ជើញសម្ពោធដាក់ឲ្យប្រើប្រាស់ជាផ្លូវការអគារមជ្ឈមណ្ឌលផ្តល់ឈាម និងមន្ទីរពិសោធន៍ នៅមន្ទីរពេទ្យបង្អែកខេត្តតាកែវ ជាជំនួយរបស់បញ្ជាការដ្ឋានកងទ័ពសហរដ្ឋអាមេរិកប្រចាំតំបន់ប៉ាស៊ីហ្វិក។
ពិធីនោះមានការចូលរួមពីសំណាក់លោក Michael Newbill អនុប្រធានបេសកកម្មការទូតសហរដ្ឋអាមេរិក ប្រចាំនៅកម្ពុជា និងលោក អ៊ូច ភា អភិបាល នៃគណៈអភិបាលខេត្តតាកែវ បុគ្គលិកមន្ត្រីរាជការជាច្រើនទៀត។
តាមប្រភពព័ត៌មានពីនាយកដ្ឋានសហប្រតិបត្តិការអន្តរជាតិនៃក្រសួងសុខាភិបាល លោករដ្ឋមន្ត្រីបានលើកឡើងថា រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ ប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បាននឹងកំពុងខិតខំប្រឹងប្រែង មិនត្រឹមតែធ្វើឲ្យមណ្ឌលសុខភាព មន្ទីរពេទ្យបង្អែកកាន់តែខិតជិតទៅកៀកនឹងប្រជាជនប៉ុណ្ណោះទេ ថែមទាំងកំពុងតែជំរុញឱ្យបុគ្គលិកសុខាភិបាលមានជំនាញគ្រប់ផ្នែកទៀតផង។
លោករដ្ឋមន្ត្រី បានសម្តែងសេចក្តីសង្ឃឹមយ៉ាងមុតមាំថា អំណោយដ៏ថ្លៃថ្លាប្រកបដោយមនុស្សធម៌ ជាអគារមណ្ឌលផ្តល់ឈាម និងមន្ទីរពិសោធន៍នេះ ពិតជាអាចជួយសំរាលការលំបាកមួយកម្រិតថែមទៀតដល់ប្រជាជនយើង នៅតំបន់នេះ ជាពិសេសការស្វែងរកសេវាផ្តល់ឈាមកាន់តែទូលំទូលាយ ស្របតាមផែនការយុទ្ធសាស្ត្ររបស់ក្រសួងសុខាភិបាល។
លោករដ្ឋមន្ត្រី បានសម្តែងអំណរគុណដល់បញ្ជាការដ្ឋានកងទ័ពសហរដ្ឋអាមេរិកប្រចាំតំបន់ប៉ាស៊ីហ្វិក ដែលបានចំណាយថវិកាដ៏ច្រើន ក្នុងការកសាងអគារមណ្ឌលផ្តល់ឈាម និងមន្ទីរពិសោធន៍នេះ ដើម្បីជាគុណប្រយោជន៍ដល់ប្រជាជនកម្ពុជា ជាពិសេសប្រជាជនក្នុងខេត្តតាកែវ។
ជាមួយគ្នានេះដែរ លោករដ្ឋមន្ត្រី ក៏បានថ្លែងអំណរគុណដល់ លោកអភិបាលខេត្ត ព្រមទាំងមន្ត្រីរាជការគ្រប់ជាន់ថ្នាក់ក្នុងខេត្ត ដែលបានជួយឧបត្ថម្ភគាំទ្របង្កលក្ខណៈងាយស្រួលគ្រប់បែបយ៉ាង ធ្វើឲ្យវិស័យសុខាភិបាលក្នុងខេត្តតាកែវបានរីកចម្រើនគួរជាទីមោទនៈ និងបានកោតសរសើរចំពោះថ្នាក់ដឹកនាំ និងមន្ត្រីសុខាភិបាលគ្រប់ជាន់ថ្នាក់ ដែលបានខិតខំយកអស់កម្លាំងកាយ-ចិត្ត ពុះពាររាល់ឧបសគ្គសំរេចលទ្ធផលបានល្អប្រសើរក្នុងការការពារ និងព្យាបាលថែរក្សាសុខភាពប្រជាជន។
លោកអ៊ូច ភាអភិបាលខេត្ត បានមានប្រសាសន៍ថា អគារមណ្ឌលផ្តល់ឈាម និងមន្ទីរពិសោធន៍ នេះ ពិតជាបានចូលរួមចំណែកក្នុងការជួយសម្រួលទុក្ខលំបាកដល់ប្រជាពលរដ្ឋ ដើម្បីបំពេញបន្ថែមនូវសេវាសង្គ្រោះបន្ទាន់ ជូនប្រជាជននៅខេត្តតាកែវទាំងមូល និងនៅតំបន់ជុំវិញនេះ ដែលកំពុងមានការខ្វះខាតនូវសេវាទាំងនេះ។
លោក Michael Newbill អនុប្រធានបេសកកម្មការទូតសហរដ្ឋអាមេរិក ប្រចាំនៅកម្ពុជា បានសម្តែងការកោតសរសើរចំពោះមន្ត្រីសុខាភិបាលខេត្តតាកែវទាំងមូល ដែលបានខិតខំបំពេញការងារផ្តល់សេវាសុខភាពជូនប្រជាពលរដ្ឋ។
លោក Michael Newbill អនុប្រធានបេសកកម្មការទូត បានសង្កត់ធ្ងន់ថា ជំនួយរបស់ប្រជាជនអាមេរិក នូវអគារមណ្ឌលផ្តល់ឈាមថ្មីជូនដល់ប្រជាជនកម្ពុជានាថ្ងៃនេះ នឹងផ្តល់ជាប្រយោជន៍បន្ថែមទៀត ក្នុងការ ចូលរួមចំណែកដល់ការផ្តល់សេវាថែទាំសុខភាពប្រកបដោយប្រសិទ្ធភាព៕
Source: Kampuchea Thmey Daily
0 Comments