ក្រុម​ណាហ្គា​វើ​ល បន្ត​ឈរ​កំពូល​តារាង​លី​គ​កំពូល​កម្ពុជា ខណៈ​សល់​២​សប្តាហ៍​ទៀត​នឹង​បញ្ចប់​រដូវ​កាល​ហើយ

ក្រុមបាល់ទាត់​ណាហ្គា​វើ​ល បន្ត​ឈរ​នៅ​តំបន់​កំពូល​តារាង ខណៈ​ក្រុម​បាត​តារាង​វេ​ស្ទើ​ន​ភ្នំពេញ បន្ត​បរាជ័យ​ត្រឹម​សប្ដាហ៍​ទី​២០ នៃ​ពានរង្វាន់​លី​គ​កំពូល​កម្ពុជា (Metfone Cambodian League 2018) ក្រោម​ការរៀបចំ​ពី​សំណាក់​គណៈកម្មការ​ប្រកួត​បាល់ទាត់​ជាតិ​(CNCC) សេនាធិការ​របស់​សហព័ន្ធ​កីឡាបាល់ទាត់​កម្ពុជា​។



សរុប​លទ្ធផល​ប្រកួត​ប្រចាំ​សប្ដាហ៍​ទី​២០​នេះ​ឃើញថា​នៅ​ថ្ងៃ​សៅរ៍ ទី​១៥ ខែកញ្ញា ឆ្នាំ​២០១៨ ក្រុម​វិសាខា យកឈ្នះ​លើ​ក្រុម​អគ្គស្នងការដ្ឋាន​នគរ​បាល​ជាតិ ៤​ទល់​១ ហើយ​ក្រុម​ព្រះខ័ន​រាជ​ស្វាយរៀង ឈ្នះ​ក្រុម​សូល​ទី​ឡូ​អង្គរ ៥​ទល់​២ លើ​ទីលាន​កីឡដ្ឋាន AEU Sport Park ស្របពេល​ក្រុម​ណាហ្គា​វើ​ល ឈ្នះ​ក្រុម​ក្រសួងការពារជាតិ ២​ទល់​០ លើ​ទីលាន​ស្តា​ត​ចាស់​។ ចំណែក​នៅ​ថ្ងៃអាទិត្យ ទី​១៦ ខែកញ្ញា ឆ្នាំ​២០១៨ ក្រុម​វេ​ស្ទើ​ន​ភ្នំពេញ ចាញ់​អង្គ​រថា​យ​ហ្គឺ​រ ៣​ទល់​១ លើ​ទីលាន​កីឡដ្ឋាន​វេស្ទើ​ន ហើយ​ក្រុម​អាស៊ី​អឺរ៉ុប ឈ្នះ​ក្រុម​ភ្នំពេញ​ក្រោ​ន ៣​ទល់​២ លើ​ទីលាន​កីឡដ្ឋាន AEU Sport Park និង​ក្រុម​បឹងកេត ឈ្នះ​ក្រុម​អគ្គីសនី​កម្ពុជា ៥​ទល់​០​លើ​ទីលាន​ពហុ​កីឡដ្ឋាន​ជាតិ​។



ងាក​មក​មើល​ចំណាត់ថ្នាក់​បណ្តោះអាសន្ន​ប្រចាំ​សប្ដាហ៍​ទី​២០​នេះ​ឃើញថា​ ក្រុម​ណាហ្គា​វើ​ល ឡើងឈរ​កំពូល​តារាង មាន​៥០​ពិន្ទុ តាម​ពីក្រោយ​ដោយ​ក្រុម​លេខ​២ បឹងកេត​អែ​ហ្វ​ស៊ី មាន​៤៨​ពិន្ទុ ហើយ​ក្រុម​វិសាខា ឈរ​លេខ​៣ មាន​៤៥​ពិន្ទុ​។ ក្រុម​លេខ​៤​ក្រសួងការពារជាតិ មាន​៣៩​ពិ​ន្ទុ ខណៈ​ក្រុម​លេខ​៥ ភ្នំពេញ​ក្រោ​ន មាន​៣០​ពិន្ទុ ក្រុម​លេខ​៦ ព្រះខ័ន​រាជ​ស្វាយរៀង មាន​២៧ ក្រុម​លេខ​៧​អង្គ​រថា​យ​ហ្គឺ​រ មាន​២៦​ពិន្ទុ ក្រុម​លេខ​៨ អាស៊ី​អឺរ៉ុប មាន​២៦​ពិន្ទុ​ដែរ ក្រុម​លេខ​៩​ក្រុម​អគ្គស្នងការដ្ឋាន​នគរ​បាល​ជាតិ មាន​២៤​ពិន្ទុ​ហើយ​ក្រុម​លេខ​១០ សូល​ទី​ឡូ​អង្គរ មាន​១៦​ពិន្ទុ ស្របពេល​ក្រុម​អគ្គីសនី​កម្ពុជា ឈរ​លេខ​១១​មាន​៩​ពិន្ទុ និង​ក្រុម​វេ​ស្ទើ​ន​ភ្នំពេញ ឈរ​លេខ​១២ មាន​១​ពិន្ទុ​។

​ពានរង្វាន់​លី​គ​កំពូល​កម្ពុជា រដូវ​កាល​នេះ​ប្រើប្រាស់​រូបមន្ត​ប្រកួត​សន្សំ​ពិន្ទុ​វិលជុំ​ចំនួន​២​ជើងមាន​២២​សប្ដាហ៍ ដើម្បី​ស្វែងរក​ក្រុម​ខ្លាំង​ដែលមាន​ពិន្ទុ​ច្រើនជាងគេ​ដណ្តើម​ជើងឯក​ប្រចាំឆ្នាំ​។ ការប្រកួត​ចាប់ផ្តើម​ពីថ្ងៃ​ទី​៣​ខែមីនា ដល់​ថ្ងៃទី​៣០​ខែកញ្ញា ឆ្នាំ​២០១៨ ដែលមាន​សមាជិក​ចំនួន​១២​ក្រុម​។ ក្រុម​ជើងឯក​នឹង​ទទួលបាន​កៅអី​ទៅ​ចូលរួម​ប្រកួត​ក្នុង​ពានរង្វាន់ AFC Cup 2019, ពានរង្វាន់ Mekong Club Championship ជាដើម​។



សម្រាប់​ប្រកួត​បន្ទាប់​សប្ដាហ៍​ទី​២១ នឹងធ្វើ​ឡើង​នៅ​ចុង​សប្ដាហ៍​នេះ​ដោយនៅ​ថ្ងៃ​សៅរ៍ ទី​២២​ខែកញ្ញា ឆ្នាំ​២០១៨ ក្រុម​ក្រុម​អគ្គស្នងការដ្ឋាន​នគរ​បាល​ជាតិ ជួប​ក្រុម​អាស៊ី​អឺរ៉ុប នៅវេលា​ម៉ោង​៦​ល្ងាច​លើ​ទីលាន​ពហុ​កីឡដ្ឋាន​ជាតិ ខណៈ​ក្រុម​សូល​ទី​ឡូ​អង្គរ ទទួល​ក្រុម​អគ្គីសនី​កម្ពុជា នៅ​ម៉ោង​៣:៣០​នាទី​រសៀល​លើ​ទីលាន​កីឡដ្ឋាន​ខេត្តសៀមរាប និង​ក្រុម​ក្រសួងការពារជាតិ ប៉ះ​ក្រុម​ព្រះខ័ន​រាជ​ស្វាយរៀង នៅ​ម៉ោង​៦​ល្ងាច​លើ​ទីលាន​ស្តា​ត​ចាស់​។ ចំណែក​នៅ​ថ្ងៃអាទិត្យ ទី​២៣​ខែកញ្ញា ឆ្នាំ​២០១៨​វិញ​ក្រុម​ភ្នំពេញ​ក្រោ​ន ប៉ះ​វេ​ស្ទើ​ន​ភ្នំពេញ នៅ​ម៉ោង​៦​ល្ងាច​លើ​ទីលាន​កីឡដ្ឋាន RSN Stadium ហើយ​ក្រុម​អង្គ​រថា​យ​ហ្គឺ​រ ជួប​ក្រុម​បឹងកេត នៅ​ម៉ោង​៣:៣០​នាទី​រសៀល​លើ​ទីលាន​កីឡដ្ឋាន​ខេត្ត​សៀ​រាប និង​ក្រុម​វិសាខា ប៉ះ​ណាហ្គា​វើ​ល នៅ​ម៉ោង​៦​ល្ងាច​លើ​ទីលាន​កីឡដ្ឋាន​ស្តា​ត​ចាស់​៕

Source: Kampuchea Thmey Daily