ភ្នំពេញ ៖ សមាគមសម្ព័ន្ធខ្មែរ-ចិននៅកម្ពុជានាំយកថវិកាជិត២០ម៉ឺនដុល្លារអាមេរិកឧបត្ថម្ភដល់មូលនិធិគន្ធបុប្ផាកម្ពុជាដើម្បីជួយទ្រទ្រង់សកម្មភាពរបស់មន្ទីរពេទ្យគន្ធបុប្ផាក្នុងការជួយសង្គ្រោះដល់កុមារកម្ពុជាជាបន្តទៀត។
ពិធីប្រគល់ថវិកានេះបានប្រព្រឹត្តិទៅកាលពីព្រឹកថ្ងៃទី ១៧ ខែ កញ្ញា ឆ្នាំ ២០១៨នៅទីស្តីការក្រសួងសេដ្ឋកិច្ច និងហិរញ្ញវត្ថុក្រោមអធិបតីភាពពី លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៃ “មូលនិធិគន្ធបុប្ផាកម្ពុជា” និងតំណាងសមាគមសម្ព័ន្ធខែ្មរ-ចិននៅកម្ពុជា ដែលដឹកនាំដោយលោកឧកញ៉ា ពុង ឃាវសែ ប្រធានក្រុមហ៊ុនវិនិយោគទុនអណិកជនកម្ពុជា (OCIC) និងជាប្រធានសមាគម សម្ព័ន្ធខែ្មរ-ចិននៅកម្ពុជា និងសមាជិកតំណាងសមាគមសម្ព័ន្ធខែ្មរ-ចិននៅកម្ពុជា ជាច្រើនរូប។
នេះគឺជាលើកទី ២ ហើយ ដែលសមាគមសម្ព័ន្ធខ្មែរ-ចិននៅកម្ពុជា បានប្រមូលវិភាគទាន សប្បុរសធម៌ ជូនមូលនិធិគន្ធបុប្ផាកម្ពុជាសរុបទឹកប្រាក់ប្រមាណ ១៩៨,១៦៤.០៩៥ ដុល្លារសហរដ្ឋអាមេរិក ក្នុងនោះ មានប្រាក់រៀលចំនួន ៨៨,៧១៦,៥៤០ រៀល និងប្រាក់ដុល្លារអាមេរិក ចំនួន ១៧៥,៩៨៤.៩៦ ដុល្លារ ខណៈ លើកទី ១ សមាគមសម្ព័ន្ធខ្មែរ-ចិននៅកម្ពុជា បានចលនាបំផុសផ្សព្វផ្សាយ និងលើកទឹកចិត្តដល់សមាជិកកាលពីថ្ងៃទី 0៤ ខែ កក្កដា ឆ្នាំ ២០១៨ ដោយបានប្រមូលវិភាគទានសប្បុរសជនជូនមូលនិធិគន្ធបុប្ផាកម្ពុជាបានប្រមាណ ៥៥ ម៉ឺនដុល្លារសហរដ្ឋអាមេរិក ក្នុងនោះ ប្រាក់រៀលចំនួន ២១៧,៤៩២,៨០០ រៀល និងប្រាក់ដុល្លារអាមេរិកចំនួន ៥០២,១៨០ ដុល្លារ។
ដោយឡែកវិភាគទានសប្បុរសធម៌លើកទី២នេះ បានមកពីសប្បុរសជននានារួមមានក្រុមហ៊ុនសមាគមបុគ្គលិកក្រុមហ៊ុន កម្មកររោងចក្រ លោកគ្រូ-អ្នកគ្រូ សិស្សានុសិស្ស បរិច្ចាគសម្រាប់ ខែ កក្កដា មានចំនួន ១១,១៣៩ នាក់ និងខែ សី ហា មានចំនួន ៧,៨១៣ នាក់ បានថវិកាចំនួន ៨៨,៧១៦,៥៤០ រៀល និង ៣៩,០៧៦.៥០ ដុល្លារអាមេរិកនិងស មាគមមិត្តភាពសភាពាណិជ្ជកម្ម ហ្វូ ជាន នៅកម្ពុជា បានបរិច្ចាគថវិកាចំនួន ១៣៦,៩០៨.៤៦ ដុល្លារ អាមេរិក។
ការជួយឧបត្ថម្ភដល់មន្ទីរពេទ្យគន្ធបុប្ផានេះធ្វើឡើងតាមទៅតាមការអំពាវនាវរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងការលើកទឹកចិត្តរបស់លោកអគ្គបណ្ឌិតសភាចារ្យឧបនាយករដ្ឋមន្ត្រី និងជាប្រធានក្រុមប្រឹក្សាបរ-ធនបាលនៃ “មូលនិធិគន្ធបុប្ផាកម្ពុជា” ក្នុងការបន្តជួយបំផុសចលនាផ្សព្វផ្សាយ និងលើកទឹកចិត្តក្នុងការផ្តល់វិភាគទានសប្បុរសធម៌។
នៅក្នុងឱកាសនោះ លោកឧកញ៉ា ពុង ឃាវសែ តំណាងឲ្យសមាគមសម្ព័ន្ធខ្មែរ-ចិននៅកម្ពុជាបានសូមចូលរួមរំលែកទុក្ខយ៉ាងក្រៀមក្រំ និងសោកស្តាយជាទីបំផុត ចំពោះមរណភាពរបស់លោកវេជ្ជបណ្ឌិត សាស្ត្រាចារ្យ Beat Richner ស្ថាបនិកមន្ទីរពេទ្យគន្ធបុប្ផា កាលពីថ្ងៃទី០៩ ខែកញ្ញា ឆ្នាំ២០១៨ នៅប្រទេសស្វីស។
លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី បានមានប្រសាសន៍ថាក្នុងនាមប្រធានក្រុមប្រឹក្សាបរ-ធនបាលនៃមូលនិធិគន្ធបុប្ផាកម្ពុជា បានថ្លែងអំណរគុណជាថ្មីម្តងទៀត ដល់សមាគមសម្ព័ន្ធខ្មែរ-ចិននៅកម្ពុជា ដែលគាំទ្រ និងបានជួយផ្សព្វផ្សាយបំផុសចលនាចូលរួមផ្តល់វិភាគទានសប្បុរសធម៌ដល់មូលនិធិគន្ធបុប្ផាកម្ពុជា និងបានថ្លែងនូវអំណរគុណយ៉ាងជ្រាលជ្រៅផងដែរចំពោះការចូលរួមរំលែកទុក្ខដ៏ក្រៀមក្រំ និងសោកស្តាយបំផុតចំពោះមរណភាពរបស់លោកវេជ្ជបណ្ឌិតសាស្ត្រាចារ្យ Beat Richner ដែលលោកវេជ្ជបណ្ឌិតសាស្ត្រាចារ្យបានលះបង់ទាំងកម្លាំងកាយ កម្លាំងចិត្តស្ទើរតែពេញមួយជីវិត ដើម្បីភាពញញឹមរបស់កុមារកម្ពុជា៕
Source: Kampuchea Thmey Daily
0 Comments