ស្វាយរៀង ៖ មានករណីឃាតកម្មដឹកសពបុរសម្នាក់តាមរថយន្តយកមកផ្លុងចោល នៅតាមបណ្តោយផ្លូវជាតិលេខ១ ក្បែរប៉ុស្តិ៍នគរបាលរដ្ឋបាលសង្កាត់ច្រកម្ទេសចម្ងាយ៥០ម៉ែត្រធ្វើឲ្យមានការភ្ញាក់ផ្អើលដល់អ្នកធ្វើដំណើរតាមដងផ្លូវទាំងព្រឹកនិងសមត្ថកិច្ច។
ករណីប្រទះឃើញសព គេយកមកទម្លាក់ផ្លុងចោលនេះ ប្រជាពលរដ្ឋ ដែលរស់នៅជិតកន្លែងកើតហេតុបានឲ្យដឹងថា ប្រទះឃើញនៅវេលាម៉ោង៦និង០០នាទីព្រឹក ថ្ងៃទី១៣ ខែកញ្ញា ឆ្នាំ២០១៨នៅភូមិ សាលាទាន សង្កាត់ច្រកម្ទេស ក្រុងបាវិត ខេត្តស្វាយរៀង។
បើតាមសមត្ថកិច្ចបានបង្ហើបឲ្យដឹងថា ការសន្និដ្ឋានជំហានដំបូងសពជនរងគ្រោះមានសម្បុរសហើយសពត្រូវបានក្រុមជនល្មើសសម្លាប់នៅកន្លែងផ្សេង រួចច្រកសពក្នុងថង់ប្លាស្ទិកពណ៌ខ្មៅដឹកតាមរថយន្តមកពីទិសខាងកើតមកទម្លាក់ផ្លុងចោលនៅលើចិញ្ចើមថ្នល់ជាតិលេខ១ជិតប៉ុស្តិ៍រដ្ឋបាលសង្កាត់ច្រកម្ទេសចម្ងាយ៥០ម៉ែត្រ។
ប្រភពដដែលបានបន្តទៀតថា បើតាមប្រជាពលរដ្ឋនៅជិតកន្លែងកើតហេតុបានឲ្យដឹងថា ៖ នៅម៉ោងប្រមាណជា៤ទៀបភ្លឺគេឃើញមានរថយន្តតូចមួយគ្រឿងបើកមកពីទិសខាងកើត លុះមកដល់ចំណុចខាងលើ បានឈប់មួយសន្ទុះ ក៏បានបត់រថយន្តត្រឡប់ទៅទិសខាងកើតវិញ ក៏ប៉ុន្តែមិនបានចាប់អារម្មណ៍អ្វីទេ លុះម៉ោង៦និង០០នាទីព្រឹកអ្នកលក់នំ បានប្រទះឃើញសព ទើបឆោឡោ និងប្តឹងសមត្ថកិច្ចតែម្តង។
ក្រោយពីសមត្ថកិច្ចជំនាញមកពិនិត្យមកដល់ធ្វើកោសលវិច័យមិនទាន់ស្គាល់អត្តសញ្ញាណទេ ហើយសន្និដ្ឋានថា ជាករណីឃាតកម្មដោយសភាពសព បែកមាត់ បែកក្បាល និងស្នាមវ៉ៃចំក្បាលពីក្រោយ ហើយសមត្ថកិច្ចបានបញ្ជាក់ថា ពិតជាករណីឃាតកម្មពិតមែន។ សាកសពត្រូវសមត្ថកិច្ចយកសពមកតម្កល់ទុកនៅវត្តជិតកន្លែងកើតហេតុ។
បច្ចុប្បន្នសមត្ថកិច្ច កំពុងធ្វើការស្រាវជ្រាវរកមុខឃាតកដើម្បីយកមកផ្តន្ទាទោសតាមផ្លូវច្បាប់៕
Source: Kampuchea Thmey Daily
0 Comments