ភ្នំពេញ ៖ អភិបាលនៃគណៈអភិបាលរាជធានីភ្នំពេញលោកឃួង ស្រេង បានជំរុញឲ្យអាជ្ញាធរខណ្ឌទាំង១២ ចាត់មន្ត្រីចុះត្រួតពិនិត្យជាប្រចាំរាល់សំណង់ផ្សេងៗ ដែលកំពុងសាងសង់ពិសេសសំណង់ខុសច្បាប់ ឬសំណង់ដែលសង់ខុសកិច្ចសន្យា និងគ្មានគុណភាព ការសង់រោងបុណ្យ,រោងការបិទផ្លូវ ដើម្បីជំរុញអោយពួកគាត់គោរពច្បាប់ និងការណែនាំពីរដ្ឋបាលរាជធានីភ្នំពេញជៀសវាងការថ្នាំងថ្នាក់ដល់ប្រជាពលរដ្ឋ។
ការជំរុញបែបនេះរបស់លោកឃួង ស្រេងបានធ្វើឡើងកាលពីរសៀលថ្ងៃទី១២ ខែកញ្ញា ឆ្នាំ២០១៨ក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ នៅសាលារាជធានីភ្នំពេញ ដោយមានការចូលរួមពីអភិបាលខណ្ឌទាំង១២ និងកងកម្លាំងប្រដាប់អាវុធចំណុះអោយគណៈបញ្ជាការឯកភាពរាជធានីភ្នំពេញចំនួនរាប់សិបនាក់។
លោកអភិបាលក៏បានរំលឹកផងដែរទៅលើការណែនាំចំពោះរថយន្តបាញ់បេតុង ដែលចត.ឈប់ធ្វើឲ្យប៉ះពាល់ដល់ចរាចរតាមដងផ្លូវដូចដែលរដ្ឋបាលរាជធានីភ្នំពេញធ្លាប់បានជូនដំណឹងរួចមកហើយ។ ជាមួយគ្នានេះក៏ត្រូវពិនិត្យផងដែរ ចំពោះការសង់រោងបុណ្យ,រោងការដោយមិនត្រូវឲ្យបិទផ្លូវទាំងស្រុងធ្វើឲ្យប៉ះពាល់ដល់ប្រជាពលរដ្ឋអ្នកធ្វើដំណើរ និងស្ទះចរាចរ ដែលប្រជាពលរដ្ឋតែងបង្ហាញការថ្នាំងថ្នាក់នាពេលកន្លងមក។ ម្ចាស់រោងបុណ្យ ឬរោងការគួររកទីតាំង សមស្របដែលមិនប៉ះពាល់ផ្លូវសាធារណៈដូចជា ទីអារាម ឬតាមភោជនីយដ្ឋាន ឬទីតាំងណាដែលសមរម្យ។
លោកឃួង ស្រេង បានបន្តក្រើនរំលឹកដល់អាជ្ញាធរ និងស្ថាប័នពាក់ព័ន្ធឲ្យបង្កើនប្រសិទ្ធភាពការងារទ្វេដងថែមទៀតលើការបម្រើសេវាសាធារណៈជូនប្រជាពលរដ្ឋឲ្យសក្ដិសមទៅនឹងទំនុកចិត្តរបស់ប្រជាពលរដ្ឋដែលបានបោះឆ្នោតឲ្យយើង។
លោកឃួង ស្រេង បានបន្តថា ការងារជាច្រើនកំពុងរង់ចាំយើងទៅធ្វើ ជាពិសេសការពង្រឹងសន្តិសុខ សណ្តាប់ធ្នាប់របៀបរៀបរយសាធារណៈក្នុងទីក្រុង ដោយផ្តោតទៅលើការអនុវត្តច្បាប់ចរាចរ,បន្តឆែកឆេរអាវុធជាតិផ្ទុះ។ ត្រួតពិនិត្យ កន្លែងសប្បាយភាព,ក្លិបកម្សាន្ត,ក្លិបរាត្រីផ្សេងៗដើម្បីទប់ស្កាត់បទល្មើសគ្រឿងញៀន បើទោះបីយើងមិនអាចលុបបំបាត់នៅចំពោះមុខ តែក៏អាចឈានទៅកាត់បន្ថយបទល្មើសគ្រឿងញៀនបាន១កម្រិតដែរ។
ចំពោះការរៀបចំសណ្ដាប់ធ្នាប់តាមដងវិថីសំខាន់ៗជាអាទិភាពទាំង១១ខ្សែ ដែលបានអនុវត្តរយៈពេល១ឆ្នាំកន្លងទៅនេះ យើងអាចវាយតម្លៃបានថា យើងធ្វើបានល្អនិងកំពុងដើរលើផ្លូវ ត្រូវតាមសំណូមពររបស់ប្រជាពលរដ្ឋ។ ដូច្នេះការងារនេះយើងត្រូវបន្តទៅមុខទៀតឲ្យបានគ្រប់ផ្លូវ។ នៅប៉ុន្មានថ្ងៃមកនេះ រដ្ឋបាលរាជធានីភ្នំពេញកំពុងរៀបចំ សណ្តាប់ធ្នាប់នៅចំណុចផ្លូវព្រះមុនីរ៉េត ជុំវិញផ្សារដើមគរនិងផ្សារនាគមាស ដែលល្បីខាងបាត់សណ្តាប់ធ្នាប់ និងធ្វើឲ្យប៉ះពាល់បរិស្ថាន និងស្ទះចរាចរជារៀង រាល់ថ្ងៃនោះដោយកំណត់រយៈពេល១០ថ្ងៃត្រូវតែឲ្យស្អាត ហើយបន្ទាប់ទៅត្រូវ ប្រគល់ទីតាំងខាងលើនេះឲ្យទៅអាជ្ញាធរខណ្ឌទួលគោក និងខណ្ឌចំការមនជាអ្នកគ្រប់គ្រង និងធានាថាមិនមានការដាក់លក់ទំនិញលើទ្រូងផ្លូវ ឬចតយានយន្ត បែបអានាធិបតេយ្យបង្កការកកស្ទះចរាចរ ប៉ះពាល់អនាម័យបរិស្ថាននិងសណ្តាប់ធ្នាប់សាធារណៈនោះបន្តទៀតឡើយ៕
Source: Kampuchea Thmey Daily
0 Comments