ក្រសួង​អប់រំ ​ប្ដេជ្ញា​ថា​ នឹង​មិន​ឲ្យ​មាន​កំហុស​បច្ចេកទេស​ចំពោះ​លទ្ធផល​ប្រឡង​បាក់​ឌុប​សាជាថ្មី​នៅ​ឆ្នាំក្រោយ​ទៀត​ទេ

ភ្នំពេញ ​៖ ​អ្នកនាំពាក្យ​ក្រសួង​អប់រំ​យុវជន​ និង​កីឡា ​បាន​សំ​ដែល​ការ​សោកស្តាយ ​និង​សូម​អភ័យទោស​ដល់​បេក្ខជន ​និង​មាតាបិតា​សិស្ស​ព្រមទាំង​សាធារណជន​ទាំងអស់​ចំពោះ​កំហុស​បច្ចេកទេស​ដែល​បណ្តាលមកពី​ទិន្នន័យ​បច្ចេកទេស​កុំព្យូទ័រ Er ror​ធ្វើ​ឲ្យ​ពិន្ទុ​នៃ​វិញ្ញាសា​គណិតវិទ្យា​របស់​ថ្នាក់​វិទ្យាសាស្ត្រ​មាន​ភាព​មិនប្រក្រតី​។​

លោក ឌី ខាំ​ប៉ូ​លី អ្នកនាំពាក្យ​ក្រសួង​អប់រំ​យុវជន​និង​កីឡា​បាន​មានប្រសាសន៍​កាលពី​រសៀល​ថ្ងៃទី​១៤​ខែកញ្ញា​ឆ្នាំ​២០១៨​នេះ​ថា ​គណៈកម្មការ​កោសល្យវិច័យ បាន​រកឃើញថា​ដំណើរការ​បូក​ពិន្ទុ តាម​ប្រព័ន្ធ​ក​កុំព្យូទ័រ​(Computer)​មាន​បញ្ហា​បច្ចេកទេស ធ្វើឱ្យប៉ះពាល់​ដល់​ពិន្ទុ​វិញ្ញាសា​គណិតវិទ្យា​នៃ​ថ្នាក់​វិទ្យាសាស្ត្រ របស់​បេក្ខជន​រហូតដល់​ចំនួន​៧៤០​បន្ទប់​។​ បន្ទាប់ពី​ដោះស្រាយ​បញ្ហា​កំហុស​បច្ចេកទេស​Computer រួចមក ក្រសួង​អប់រំ​យុវជន​និង​កីឡា​បាន​សម្រេច​ប្រកាស​លទ្ធផល​នៃ​ការប្រឡង​ជាថ្មី​ដោយមាន​បេក្ខជន​ជាប់​សរុប​ចំនួន ៧៦០៣៤​នាក់​កើនឡើង​៩៧៥​នាក់​ថែមទៀត​ស្មើនឹង​៧៧.០៧​ភាគ​រយ លើស​ពី​ការប្រកាស​លទ្ធផល​ប្រឡង​លើកដំបូង កាលពី​ថ្ងៃទី​៩​និង​ទី​១០​ខែកញ្ញា​កន្លងទៅ​។​

ចំណែក​បេក្ខជន​ទទួលបាន​​និទ្ទេស​A​បាន​កើន​ពី​២៩០​នាក់​ដល់​៤០៨​នាក់ និទ្ទេស​B​ចំនួន​២២២២​នាក់​និទ្ទេស​C​ចំនួន​៦០៤១​នាក់​ និទ្ទេស​D​ចំនួន​១៥១៨០​នាក់ ​និង​និទ្ទេស​E​ចំនួន​៥២១៨៣​នាក់​។​

លោក​ឌី ខាំ​ប៉ូ​លី​បាន​ទទួលស្គាល់ថា ​ក្រសួង​​​ពិត​ជាមាន​កំហុស ដោយសារតែ​ប្រព័ន្ធ​ទិន្នន័យ​កុំព្យូរទ័រ Error ដោយ​ចៃដន្យ​មិនមែនជា​ចេតនា ហើយ​បង្ក​ឱ្យ​បេក្ខជន​ប្រឡង​ខ្លះ មិន​ពេញចិត្ត​ចំពោះ​លទ្ធផល​និង​និទ្ទេស​នៃ​ការប្រឡង​នោះទេ​ ហើយ​ក្រសួង​ធ្វើការ​កែសម្រួល​ឱ្យ​ត្រឹមត្រូវ​ឡើងវិញ ដោយ​ពិនិត្យមើល​ពិន្ទុ នៃ​វិញ្ញាសា​គណិតវិទ្យា​របស់​ថ្នាក់​វិទ្យាសាស្ត្រ​និង​កែតម្រូវ​នៃ​ការប្រកាស​លទ្ធផល​ឱ្យបាន​ត្រឹមត្រូវ​ឡើងវិញ​។​
​
លោក​បាន​ឲ្យ​ដឹង​ទៀតថា ​ក្រសួង​បាន​ខិតខំ​រៀបចំ​ដំណើរការ​ប្រឡង​បានល្អ​ប្រសើរ​ណាស់​ទាំង​ដំណើរការ​សំណេរ កំណែ​ ការ​ស្រង់​ពិន្ទុ​ ប៉ុន្តែ​មាន​បញ្ហា​កំហុស​បច្ចេកទេស​Computer ដោយ​ចៃដន្យ​។​

លោក​បាន​បន្ថែមទៀតថា​ «​ក្រសួង​មានការ​សោកស្តាយ​និង​សូម​អភ័យទោស​ចំពោះ​បេក្ខជន​ប្រឡង​អាណាព្យាបាល​ និង​ភាគី​ពាក់ព័ន្ធ​ទាំងអស់​ចំពោះ​កំហុស​បច្ចេកទេស​លទ្ធផល​ប្រឡង​វិញ្ញាសា​​គណិតវិទ្យា​របស់​ថ្នាក់​វិទ្យាសាស្ត្រ​នេះ​ ហើយ​សូម​ប្តេជ្ញា​ថា ​នឹងមិន​ឲ្យ​មាន​កំហុស​បែបនេះ​កើតឡើង​នៅ​ឆ្នាំក្រោយ​ទៀត​នោះទេ​»​។​

គួរ​បញ្ជាក់ថា ​ការប្រកាស​លទ្ធផល​លើ​វិញ្ញាសា​ប្រឡង​គណិត​វិទ្យា​ថ្នាក់​វិទ្យាសាស្ត្រ​នេះ​បាន​ធ្វើឡើង​បន្ទាប់ពី​មាន​បេក្ខជន​ប្រមាណ​៥០០​នាក់​ ដែល​មិន​ពេញចិត្ត​ទៅនឹង​លទ្ធផល​ប្រឡង​បាន​ដាក់​ពាក្យ​បណ្តឹង​តវ៉ា​ទៅ​ក្រសួង​អប់រំ​យុវជន​និង​កីឡា​កាលពី​ថ្ងៃទី​១១​ ខែកញ្ញា ​ឆ្នាំ​២០១៨​កន្លងទៅ​។​ បន្ទាប់ពី​មានការ​តវ៉ា​រួចមក​ នៅ​ថ្ងៃទី​១២​ ខែកញ្ញា​ ក្រសួង​អប់រំ​បាន​បង្កើត​គណៈកម្មកា​រ​កោសល្យវិច័យ​មួយ​ដើម្បី​ពិនិត្យ​និង​ដោះស្រាយ​ទៅលើ​បណ្តឹងតវ៉ា​របស់​បេក្ខជន​ប្រឡង​។​

លោក​ខាំ​ឌី បូ​លី​បាន​បន្ថែមទៀតថា ​តាម​គម្រោង​គណៈកម្មការ​កោសល្យវិច័យ​ត្រូវ​ដោះស្រាយ​បណ្តឹងតវ៉ា​នេះ​រយៈពេល​១​សប្តាហ៍​តែ​បន្ទាប់ពី​រកឃើញ​នូវ​កំហុសឆ្គង​លើ​ការងារ​បច្ចេកទេស​កុំព្យូទ័រ​រួចមក​គណៈកម្មការ​នេះ​បាន​បញ្ចប់​បេសកកម្ម​មុន​ផែនការ​កំណត់​។​
​
ចំពោះ​ការប្រកាស​លទ្ធផល​ប្រឡង​លើ​ប្រឡង​វិញ្ញាសា​​គណិតវិទ្យា​របស់​ថ្នាក់​វិទ្យាសាស្ត្រ​នេះ ​​​ក្រសួង​បានប្រកាស​នៅ​រាជធានី​ភ្នំពេញ​កាលពី​ថ្ងៃទី​១៤​កញ្ញា​និង​នៅតាម​បណ្តា​ខេត្ត​នៅ​ថ្ងៃទី​១៥​កញ្ញា​នេះ៕

​ ​

Source: Kampuchea Thmey Daily