ដេននី ក្វាន់ ទោះរវល់ការងារ ក៏ឆ្លៀតពេលចែកអំណោយប្រជាពលរដ្ឋនៅកំពង់ស្ពឺចំរដូវភ្ជុំបិណ្ឌ

ភ្នំពេញ ៖ តារាស្រីកញ្ញា ដេននី ក្វាន់ ថ្វីត្បិតតែបច្ចុប្បន្ន កំពុងមានការងារមមាញឹកខ្លាំងលើអាជីពបើករបររកស៊ីផ្ទាល់ខ្លួនស្ទើរគ្មានពេលសម្រាកក៏ពិតមែន។ ប៉ុន្តែតារាសម្តែងសាច់សខ្ចីរូបនេះ នៅតែមិនភ្លេចឡើយលើសកម្មភាពការងារមនុស្សធម៌ជួយដល់ប្រជាពលរដ្ឋដែលជួបការខ្វះខាតខាត ចាស់ជរា និងកុមារនៅតាមសហគមន៍ជាដើម។

ជាក់ស្តែងកាលពីថ្ងៃទី២៧ ខែកញ្ញា ឆ្នាំ២០១៨កន្លងមកនេះ កញ្ញា ដេននី ក្វាន់បានឆ្លៀតពេលទំនេរពីការងារនាំយកអំណោយនិងសម្ភារៈបរិភោគមួយចំនួនទៅចែកជូនដល់ប្រជាពលរដ្ឋខ្វះខាតចាស់ជរា ចំនួន៧គ្រួសារស្ថិតនៅភូមិ ថ្មី ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។ អំណោយទាំងនោះរួមមាន៖អង្ករ ,មី ,ត្រីខ ,ទឹកត្រី ,ទឹកស៊ីអ៊ីវ ,ទឹកដោះគោ,សារុង ,ក្រមា និងថវិកាមួយចំនួនផងដែរ។

កញ្ញា ដេននី ក្វាន់ បាននិយាយប្រាប់ឲ្យដឹងនាពេលនោះថា ខ្ញុំពិតជារីករាយក្នុងចិត្តយ៉ាងក្រៃលែងព្រោះតែឃើញពួកគាត់ដែលបានទទួលយកអំណោយពីនាងខ្ញុំទាំងភ្នែកលាយស្នាមញញឹម។ពួកគាត់បានប្រាប់ខ្ញុំថា គាត់សប្បាយចិត្តរកពាក្យថ្លែងមិនត្រូវ ព្រោះខែនេះជារដូវបុណ្យភ្ជុំបិណ្ឌ គាត់មិនមានសូម្បីបាយម្ហូបសម្រាប់ធ្វើចង្ហាន់យកទៅវត្តដើម្បីកាន់បិណ្ឌដូចគេឡើយ។

តារាស្រីស្រស់ស្អាតកញ្ញា ដេននី ក្វាន់ បានបន្តទៀតថា ពួកគាត់បានប្រាប់ទៀតថាតែប៉ុណ្ណេះគឺគាត់អាចមានលុយខ្លះសម្រាប់រៀបចំបាយម្ហូបយកទៅវត្តដូចគេដូចឯងបានហើយគ្រាន់តែឮពាក្យទាំងនេះបេះដូងខ្ញុំស្ទើរតែធ្លាក់ដល់ដី ហេតុអ្វីបានជីវិតពួកគាត់លំបាកយ៉ាងនេះ តែយ៉ាងណាខ្ញុំក៏បានជួយសម្រាលទុកលំបាករបស់គាត់បានមួយគ្រាដែរ ទោះវាមិនច្រើន តែវាក៏ជាទឹកចិត្តរបស់ខ្ញុំដែលមានចំពោះពួកគាត់។

តារាស្រីរាងតូចច្រឡឹងគួរឲ្យស្រលាញ់កញ្ញា ដេននី ក្វាន់ បន្ថែមទៀតថា អ្វីដែលខ្ញុំធ្វើគឺកើតចេញពីសេចក្តីអាណិតនិងស្រលាញ់ ហើយក៏មិនចង់បាន ការតបស្នងវិញដែរ សូមត្រឹមតែខ្ញុំអាចអោយគាត់ទាំងនោះមានស្នាមញញឹមគឺគ្រប់គ្រាន់ហើយ។ មួយជីវិតនេះខ្ញុំជឿជាក់លើការធ្វើល្អទោះមិនមានអ្នកមើលឃើញតែខ្លួនខ្ញុំផ្ទាល់គឺឃើញច្បាស់ណាស់។

ជាការកត់សម្គាល់នេះមិនមែនទើបជាលើកដំបូងនោះទេដែលតារាសម្តែងនិងជាថៅកែហាងកញ្ញា ដេននី ក្វាន់ បានបង្ហាញវត្តមានចូលរួមសកម្មភាពមនុស្សធម៌តាមរយៈការចែកអំណោយ សម្ភារៈសិក្សា ជួយដល់កុមារតាមសហគមន៍ និងប្រជាពលរដ្ឋដែលកំពុងជួបការខ្វះខាតនៅតាមបណ្តាភូមិ/ស្រុកមួយចំនួន៕