ក្រុម​អង្គ​រថា​យ​ហ្គឺ​រ ប្រកាស​រៀបចំ​ទិវា​បាល់ទាត់​នៅ​ខេត្តសៀមរាប ក្នុង​ថ្ងៃ​ព្រ​ហ​ស្ប​ត្តិ៍​សប្ដាហ៍​នេះ

ក្រុមបាល់ទាត់​ខេ​ម​បូ​ឌា​ន​ថា​យ​ហ្គឺ​រ (Angkor Tiger FC) សមាជិក​ពានរង្វាន់​ជម្រើស​ជើងឯក​ជាតិ (Metfone Cambodian League) បានប្រកាស​ដល់​អ្នកគាំទ្រ​ថា​ក្លិប​នឹង​រៀបចំ​ទិវា​បាល់ទាត់​១​លើក (Football Clinic) នៅក្នុង​ទី​រួម​ខេត្តសៀមរាប នៅ​ថ្ងៃ​ព្រ​ហ​ស្ប​ត្តិ៍ សប្ដាហ៍​នេះ​ព្រមទាំង​កំណត់​អ្នកចូលរួម​ជាក់លាក់​មួយ​។

យោង​តាម​សេចក្តី​ជូនដំណឹង​របស់​ក្លិប​បាន​បញ្ជាក់ថា ​ព្រឹត្តិការណ៍​នេះ​នឹង​រៀបចំ​នៅ​ថ្ងៃ​ព្រហស្បតិ៍ ទី​២០ ខែកញ្ញា លើ​តារាង​បាល់ទាត់​ក្រពើ​ស ក្នុង​ខេត្តសៀមរាប​។ ចំពោះ​បងប្អូនៗ​ដែល​មាន​ចំណាប់​អារ​ម្ម​ណ៍​ចង់​ចូលរួម សូម​មេត្តា​រួសរាន់​ឡើង​ដើម្បី​ចុះឈ្មោះ តាមរយៈ​លេខ​ទូរស័ព្ទ 086 691 947-089 767 897 (​រៀងរាល់​ម៉ោង​ធ្វើការ​) ព្រោះ​ចំនួន​មានកំណត់ (​កំណត់​ត្រឹមតែ ៤០​នាក់​ដែល​បាន​ចុះឈ្មោះ​មុនគេ​ប៉ុណ្ណោះ​)​។



​ក្រុម​អង្គ​រថា​យ​ហ្គឺ​រ បាន​ប្តូរ​ឈ្មោះ​មកពី​ក្រុម​ត្រាយ​អាស៊ី​ភ្នំពេញ កាលពី​ចុងរដូវ​កាល​២០១៤ ហើយ​នៅ​រដូវ​កាល​២០១៥ គឺជា​កំណត់ត្រា​ល្អ​របស់​ក្លិប​ពោលគឺ អាច​ឡើង​ដល់​វគ្គ​៤​ក្រុម​ចុងក្រោយ​ទាំង​ពានរង្វាន់​សម្តេច ហ៊ុន សែន និង​ពានរង្វាន់​មិត្ត​ហ្វូ​ន​ខេ​ម​បូ​ឌា​ន​លី​ក ក្រោយ​ឈរ​ចំណាត់ថ្នាក់​លេខ​៣​ដូចគ្នា​។ ក្រុម​នេះ ទទួលបាន​សិទ្ធិ​ប្រើប្រាស់​កីឡដ្ឋាន​ខេត្តសៀមរាប ពី​ក្រសួង​អប់រំ​យុវជន​និង​កីឡា កាលពី​រដូវ​កាល​ឆ្នាំ​២០១៧ កន្លង​ធ្វើជា​ទឹកដី​របស់ខ្លួន​រាល់​ការប្រកួត​នានា​។

​លោក Akihiro Kato ប្រធាន​ក្លិប​អង្គ​រថា​យ​ហ្គឺ​រ ធ្លាប់បាន​បញ្ជាក់​ជុំ​អនាគត​របស់​ក្លិប​នៅ​ទឹកដី​ខេត្តសៀមរាប​ថា​៖«​ខ្ញុំ​មាន​ហេតុផល​ពីរ​យ៉ាង ដោយ​ទី​១) គឺ​ចង់​ផ្ដល់​ទំនុកចិត្ត​ទៅលើ​សក្តានុពល​និង​ទេពកោសល្យ​របស់​ពួកគេ​ព្រោះ​ខ្ញុំ​គិតថា ពួកគេ​នឹង​អាច​ក្លាយទៅជា​និមិត្តរូប​បាល់ទាត់​កម្ពុជា​។ ចំណែក​ទី​២) វា​ជា​ផ្នែក​មួយ​នៃ​ផែនការ​របស់ខ្ញុំ ដែល​ចង់​បង្កើត​យុគមាស​សម្រាប់​អង្គ​រថា​យ​ហ្គឺ​រ ក្នុងពេល​៥​ទៅ​១០​ឆ្នាំ​ខាងមុខ​។ ខ្ញុំ​ដាក់​គោលដៅ​ឲ្យ​អង្គ​រថា​យ​ហ្គឺ​រ ក្លាយជា​ក្លិប​លេខ​១​ក្នុង​តំបន់​អាស៊ាន ហើយ​ខ្ញុំ​រំពឹងថា កីឡាករ​ទាំងអស់​នឹង​លះបង់​ខ្ពស់ ដើម្បី​សម្រេច​ទស្សនៈវិស័យ​រប​ស់​យើង​។ អង្គ​រថា​យ​ហ្គឺ​រ ចង់​ក្លាយជា​និមិត្តរូប​នៃ​ក្ដី​សុ​បិ​ន្ត ក្ដីសង្ឃឹម​និង​កម្លាំងចិត្ត សម្រាប់​ប្រជាពលរដ្ឋ​ខេត្តសៀមរាប ក៏ដូចជា​កម្ពុ​ជាទាំង​មូល​៕

Source: Kampuchea Thmey Daily