ភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ លោក លាង សំណាត់ បានចេញដីកាបង្គាប់ឲ្យចាប់ និងឃុំខ្លួនលោក គឹម សុខ អ្នកវិភាគសង្គម និងនយោបាយ លំអៀង ពាក់ព័ន្ធបទល្មើសមួយ ដែលលោក កឹម សុខ បានចោទប្រកាន់លើរាជរដ្ឋាភិបាលថា បានបង្កើតប្រព័ន្ធសម្លាប់មនុស្ស ហើយរកមុខឃាតកមិនឃើញ។
តាមដីកាបង្គាប់ឲ្យចាប់ខ្លួន ចុះថ្ងៃទី១៤ ខែកញ្ញា ឆ្នាំ២០១៨ របស់លោក លាង សំណាត់ ចៅក្រមស៊ើបសួរសាលាដំបូងរាជធានីភ្នំពេញ បានបញ្ជាក់ថា ជនត្រូវចោទឈ្មោះ គឹម សុខ ត្រូវបានចោទប្រកាន់ពីបទល្មើសព្រហ្មទណ្ឌ ដែលត្រូវផ្តន្ទាទោសដាក់ពន្ធនាគារលើសពីមួយឆ្នាំ ហើយតាមរបាយការណ៍របស់សមត្ថកិច្ចបានបញ្ជាក់ថា ឈ្មោះនេះបានគេចខ្លួន ពុំដឹងទៅរស់នៅទីណា។
ជាមួយគ្នានេះ តំណាងអយ្យការ ក៏បានឯកភាពឲ្យចាប់ខ្លួនជនត្រូវចោទតាមដីកាបញ្ជូនឲ្យឆ្លើយ ចុះថ្ងៃទី១៤ ខែកញ្ញា ឆ្នាំ២០១៨ ដូច្នេះសម្រេច ទី១, បញ្ជាដល់កម្លាំងសាធារណៈ ឲ្យស្រាវជ្រាវរកចាប់ និងឲ្យនាំខ្លួនឈ្មោះ គឹម សុខ ភេទប្រុស អាយុ៣៨ឆ្នាំ (កើតថ្ងៃទី១៣ ខែតុលា ឆ្នាំ១៩៨០) ទៅក្នុងមណ្ឌលអប់រំកែប្រែ នៃក្រសួងមហាផ្ទៃ និងទី២, បញ្ជាដល់ប្រធានមណ្ឌលអប់រំកែប្រែ នៃក្រសួងមហាផ្ទៃឲ្យទទួល និងឃុំខ្លួនបុគ្គលនោះ។
សូមបញ្ជាក់ថា លោក គឹម សុខ ត្រូវបានតុលាការដោះលែងឲ្យមានសេរីភាព កាលពីថ្ងៃទី១៧ ខែសីហា ឆ្នាំ២០១៨ បន្ទាប់ពីអនុវត្តទោសចប់សព្វគ្រប់ ពោលបានជាប់ពន្ធនាគារអស់រយៈពេលប្រមាណ១៨ខែ ប៉ុន្តែមិនទាន់បានបង់លុយពិន័យនៅឡើយ។ លោកត្រូវបានចៅក្រមជំនុំជម្រះសាលាដំបូងរាជធានីភ្នំពេញ លោក គី ប្ញទ្ធី កាលពីថ្ងៃទី១០ ខែសីហា ឆ្នាំ២០១៧ សម្រេចផ្ដន្ទាទោសដាក់ពន្ធនាគារចំនួន១៨ខែ និងពិន័យប្រាក់ចំនួន៨លានរៀល រួមនឹងប្រាក់សងជំងឺចិត្តដល់ដើមបណ្តឹង៨០០លានរៀល ក្រោមការចោទប្រកាន់ពីបទញុះញង់ឲ្យមានបទឧក្រិដ្ឋជាអាទិ៍។
ការផ្តន្ទាទោសនេះ ធ្វើឡើងតាមបណ្តឹងរបស់គណបក្សប្រជាជនកម្ពុជា បន្ទាប់ពីលោក គឹម សុខ បានចោទប្រកាន់គណបក្សប្រជាជនកម្ពុជាថា នៅពីក្រោយឃាតកម្មលោក កែម ឡី។
ទាក់ទងបញ្ហានេះ លោក គី តិច មេធាវីតំណាងដោយអាណត្តិរបស់សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានថ្លែងប្រាប់សារព័ត៌មានកាលពីរសៀលថ្ងៃទី១៧ ខែកញ្ញា ឆ្នាំ២០១៨ថា សំណុំរឿងនេះពាក់ព័ន្ធ លោក គឹម សុខ ដែលបាននិយាយនៅក្នុងកិច្ចសម្ភាសន៍ជាមួយវិទ្យុអាស៊ីសេរី កាលពីថ្ងៃទី១៣ ខែកុម្ភៈ ឆ្នាំ២០១៧ ដោយចោទប្រកាន់លើរាជរដ្ឋាភិបាលថា បានបង្កើតប្រព័ន្ធមួយសម្លាប់មនុស្ស រួចហើយរកមុខឃាតកមិនឃើញ។ ពាក្យបណ្តឹងនេះត្រូវបានដាក់ចូលទៅកាន់សាលាដំបូងរាជធានីភ្នំពេញ កាលពីថ្ងៃទី១៦ ខែកុម្ភៈ ឆ្នាំ២០១៧ហើយនៅពេលនេះត្រូវបានចៅក្រមចេញដីកាបង្គាប់ឲ្យចាប់ និងឃុំខ្លួនតែម្តង។
មូលហេតុដែលនាំទៅដល់ការចាប់ខ្លួននេះ ដោយសារតែលោក គឹម សុខ បាននិយាយក្នុងកិច្ចសម្ភាសន៍មួយនៅវិទ្យុអាស៊ីសេរី កាលពីយប់ថ្ងៃទី១៣ ខែកុម្ភៈ ឆ្នាំ២០១៧ យ៉ាងដូច្នេះថា “គេនេះ គឺសំដៅទៅលើប្រព័ន្ធ.... ប្រព័ន្ធមួយក្រោមការគ្រប់គ្រងនៃរដ្ឋាភិបាលបច្ចុប្បន្នហ្នឹង វាបណ្តោយឲ្យមានប្រព័ន្ធមួយ ដែលមានការសម្លាប់មនុស្សហើយ រួចហើយរកមុខឃាតកមិនឃើញ មិនត្រឹមតែលោកបណ្ឌិត កែម ឡី ទេ អ្នកតស៊ូមតិមុនៗ....”៕
Source: Kampuchea Thmey Daily
0 Comments