ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាលកម្ពុជា បានចំណាយពេល៤ ថ្ងៃនៅក្រៅប្រទេស បន្ទាប់ពីបង្កើតរាជរដ្ឋាភិបាលថ្មី ដើម្បីចូលរួមពិធីតាំងពិព័រណ៍អាស៊ាន-ចិនលើកទី១៥ នៅទីក្រុងណាន់នីង ខេត្តគង់ស៊ីប្រទេសចិន (ពីថ្ងៃទី ១០ ដល់ ១២ ខែកញ្ញា) ដែលនៅទីនោះសម្តេចតេជោហ៊ុនសែនបានចំណាយពេលជួប និង ពន្យល់ក្រុមហ៊ុនធំៗរបស់ចិន និង ពាណិជ្ជករ វិនិយោគិន បរទេសឲ្យបានដឹកបានយល់ពីសក្តានុពលរបស់កម្ពុជាដែលមានលក្ខណៈអំណោយផលសម្រាប់ការវិនិយោគ។
តមកនៅព្រឹកថ្ងៃទី១២ ខែ កញ្ញា សម្តេចតេជោ ហ៊ុន សែន បានអញ្ជើញកាន់ទីក្រុងហាណូយប្រទេសវៀតណាមដើម្បីចូលរួមវេទិកាសេដ្ឋកិច្ចពិភពលោកស្តីពីអាស៊ាន ដែលជាវេទិកាមួយដ៏មានសារៈសំខាន់ដែលផ្តល់នូវទស្សនាទានសំខាន់សម្រាប់ការអភិវឌ្ឍប្រទេសនៅក្នុងបដិវត្តន៍ឧស្សាហកម្មជំនាន់ទី៤ ។ សម្តេចតេជោនាយករដ្ឋមន្ត្រីបានអញ្ជើញមកដល់មាតុប្រទេសវិញកាលពីល្ងាចថ្ងៃទី ១៣ ខែកញ្ញាដោយសុវត្តិភាព ដោយពាំនាំមកជាមួយនូវជោគជ័យថ្មីថែមទៀតសម្រាប់អភិវឌ្ឍន៍ប្រទេសកម្ពុជា។
ក្នុងការស្នាក់នៅទីក្រុងណាន់នីងដើម្បីចូលរួមពិព័រណ៍អាស៊ាន-ចិនលើកទី១៥ សម្តេចអគ្គមហាសេនាបតីតេ ជោ ហ៊ុន សែន នាយករដ្ឋមន្ត្រីកម្ពុជាបានអនុញ្ញាតឲ្យក្រុមហ៊ុនចិនចំនួន២ , និស្សិតកម្ពុជាចំនួន ២២៩ នាក់ និង លេខាធិការបក្សខេត្តគង់ស៊ី ,អញ្ជើញចូលរួមវេទិកាតុមូលជាមួយនាយកប្រតិបត្តិនៃក្រុមហ៊ុនធំៗរបស់ប្រទេសចិន ជួបឧបនាយករដ្ឋមន្ត្រីចិន និង ជួបក្រុមហ៊ុនធំៗចំនួន ៨ របស់ចិន , បន្ទាប់មកចូលរួមបើកពិព័រណ៍អាស៊ានចិនលើកទី១៥ ដោយបានឡើងថ្លែងនូវសុន្ទរកថាដ៏មានអត្ថន័យពាក់ព័ន្ធជាមួយសក្តានុពលនៃសេដ្ឋកិច្ចកម្ពុជា និង អញ្ជើញទស្សនាស្តង់ពិព័រណ៍របស់កម្ពុជា ,អញ្ជើញដាំដើមឈើនិងរមណីយដ្ឋានជាតិក្រុងណាន់នីង ,អញ្ជើញទស្សនាភាពយន្តឯកសារ 3D ដែលនិយាយពីភាពរុងរឿងនៃអាណាចក្រខ្មែរ។
នៅថ្ងៃទីមួយ ក្នុងការស្នាក់នៅក្នុងទីក្រុងណាន់នីងប្រទេសចិន សម្តេចតេជោនាយករដ្ឋមន្ត្រីបានអនុញ្ញាតិឲ្យ លោក លូ ស៊ីនសឺ (Lu Xinshe) លេខាធិការនៃគណៈកម្មាធិការបក្សកុម្មុយនីស្តចិនតំបន់ស្វយ័តជនជាតិជ័ងក្វាងស៊ីចូលជួបសំដែងការគួរសម ។ លោក លូ ស៊ីនសឺ បានថ្លែងនូវអំណរគុណជូនចំពោះសម្តេចតេជោនិងគណះប្រតិភូដែលបានអញ្ជើញចូលរួមពិព័រណ៍ចិនអាស៊ាន លើ ទី១៥ នៅទីក្រុងណាននីង ហើយដែលក្នុងរយៈពេលកន្លងមកនេះសម្តេចបានអញ្ជើញចូលរួមចំនួន ១១ លើកមកហើយ។ ក្នុងនាមប្រជាជនតំបន់ស្វយ័តជនជាតិជ័ងក្វាងស៊ី លោកសូមចូលរួមផ្តល់ជូនអង្ករផ្កាម្លិះដែលមានតម្លៃ ១ លានដុល្លារជូនដល់សម្តេចនិងរាជរដ្ឋាភិបាលកម្ពុជា។
លោក លូ ស៊ីនសឺ បន្តថា លោកបានតាមដានយ៉ាងយកចិត្តទុកដាក់ចំពោះប្រទេសកម្ពុជា ក្នុងនោះរួមទាំងបញ្ហាគ្រោះទឹកជំនន់កាលពីពេលថ្មីនេះ។ លោកបន្តថា ដោយសារការតាំងពិព័រណ៍ឆ្នាំ ២០១៨ នេះមានលក្ខណៈពិសេស គណៈកម្មាធិការពិព័រណ៍បានអញ្ជើញបណ្តាប្រទេសពីតំបន់អាហ្វ្រីក ដែលជាប្រទេសស្ថិតក្នុងវិថីសូត្រសមុទ្ររបស់ចិនចូលរួមតាំងពិព័រណ៍រហូតដល់ជាង ៦.៦០០ ស្តង់ និង ក្រុមហ៊ុនជាង ៧.០០០ ចូលរួមសម្តេចតេជោ ហ៊ុន សែន បានទទួលដោយការរីករាយដែលរដ្ឋាភិបាលនិងប្រជាជនតំបន់ស្វយ័តជនជាតិជ័ងក្វាងស៊ី ដែលបានសម្រេចឧបត្ថម្ភអង្ករដែលមានតម្លៃ១លានដុល្លា ជូនដល់រាជរដ្ឋាភិបាលនិងប្រជាជនកម្ពុជាជាពិសេសចំពោះប្រជាជនដែល រងគ្រោះដោយទឹកជំនន់។ សម្តេចតេជោមានប្រសាសន៍ថា សម្តេចនិងយកអង្ករទាំងនេះជូនដល់កាកបាទក្រហមកម្ពុជា។
នៅព្រឹកថ្ងៃទី១១ ខែ កញ្ញា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជានឹងអញ្ជើញ ចូលរួមកិច្ចសន្ទនាតុមូលជាមួយនាយកប្រតិបត្តិនៃក្រុមហ៊ុនធំៗ របស់ប្រទេសចិនដែលកំពុងវិនិយោគ និង ធ្វើប្រតិបត្តិការនៅក្នុងប្រទេសកម្ពុជា។ ក្រុមហ៊ុនទាំងនោះ វិនិយោគទៅលើវិស័យធនាគារ ហិរញ្ញវត្ថុ សំណង់ ហេដ្ឋារចនាសម្ព័ន្ធ ថាមពល និង វិស័យកសិកម្ម។
សម្តេចតេជោនាយករដ្ឋមន្ត្រីបានធ្វើការគូសបញ្ជាក់យ៉ាងមុតមាំថារាជរដ្ឋាភិបាលថ្មីនីតិកាលទី ៦ ដែលដឹកនាំដោយសម្តេចផ្ទាល់ នឹង បន្តជំរុញលើកទឹកចិត្ត និង ផ្តល់នូវការគាំពារខ្ពស់ចំពោះអ្នកវិនិយោគទុនបរទេសទាំងអស់ក្នុងនោះរាប់ទាំងវិនិយោគទុនចិនដែលមានវត្តមាននៅទីនេះនិងដែលមានគម្រោងទៅបណ្តាក់ទុនក្នុងប្រទេសកម្ពុជានៅថ្ងៃអនាគតផងដែរ។ ជាមួយនិងការលើកឡើងនោះដែរសម្តេចតេជោនាយករដ្ឋមន្ត្រីក៏បានគូសបញ្ជាក់ដល់អ្នកវិនិយោគទុនចិនពីគម្រោងដែលរាជរដ្ឋាភិបាលកម្ពុជាគ្រោងស្នើដល់រដ្ឋាភិបាលចិនក្នុងការផ្តល់កម្ចីសម្បទានដល់ការសាងសង់ហេដ្ឋារចនាសម្ព័ន្ធរូបវ័ន្តក្នុងប្រទេសកម្ពុជា ដែលក្នុងនោះមានការតភ្ជាប់ផ្ទៃក្នុងប្រទេស និងការតភ្ជាប់ជាមួយនិងបណ្តាប្រទេសក្នុងតំបន់អាស៊ានក៏ដូចជាការតភ្ជាប់ទៅកាន់ប្រទេសចិន តាមរយៈផ្លូវទឹក ផ្លូវគោក និង ផ្លូវ អាកាស។
សម្តេចតេជោនាយករដ្ឋមន្ត្រីក៏បានគូសបញ្ជាក់ទៅកាន់បណ្តាក្រុមហ៊ុនចិនសុំកុំឲ្យ មានការភ័យខ្លាចទៅលើការលុបកុងត្រាចាស់ណាមួយពីសំណាក់រាជរដ្ឋាភិបាលថ្មីទៅលើគម្រោងវិនិយោគរបស់ក្រុម ហ៊ុន តែផ្ទុយទៅវិញរាជរដ្ឋាភិបាលថ្មីនីតិ កាលទី៦ ក្រោមការដឹកនាំដោយផ្ទាល់ពីសម្តេច។ សម្តេចនឹងបន្តការពារនូវរាល់ផលប្រយោជន៍របស់ក្រុមហ៊ុនទាំងអស់ក្នុងប្រទេសកម្ពុជា។
នៅល្ងាចថ្ងៃទី១១ ខែ កញ្ញា សម្តេចតេជោនាយករដ្ឋមន្ត្រី ហ៊ុន សែន ក៏បានបន្តជួបជាមួយតំណាងក្រុមហ៊ុនធំៗចិនចំនួន ៨ ចូលជួបសំដែងការគួរសម និង ពិភាក្សាការងារ។
ក្រុមហ៊ុនទាំង ៨ នោះរួមមាន៖ ១. ក្រុមហ៊ុន Xiaomi Corporation, ២.ក្រុមហ៊ុន Zhejiang Geely Holding Grou, ៣.ក្រុមហ៊ុន CHINT Group Co., Ltd, ៤.ក្រុមហ៊ុន Dongming Petrochemical Group,៥.ក្រុមហ៊ុន Futong Group Co., Ltd, ៦.ក្រុមហ៊ុន Hollry Group, ៧.ក្រុមហ៊ុន ENN Group Holding Limited, និង ៨.ក្រុមហ៊ុន China Minseng Investment group។ ក្រុមហ៊ុន ទាំងនេះស្ថិតក្នុង សហព័ន្ធសភាពាណិជ្ជកម្មចិន ដែលក្នុងនោះគឺមានក្រុមហ៊ុនភាគច្រើនបាននិង កំពុងវិនិយោគ នៅក្នុងប្រទេសកម្ពុជាជាង ១០ឆ្នាំមកហើយលើវិស័យកសិកម្ម, កំពង់ផែ ,ថាមពល, វារីអគ្គីសនី។
សម្តេចតេជោ ហ៊ុន សែន បានបញ្ជាក់អំពីការគាំទ្រចំពោះក្រុមហ៊ុនទាំងចាស់ទាំងថ្មីដែល មានបំណងវិនិយោគនៅកម្ពុជា។ ទន្ទឹមនឹង នោះដែរគឺរាជរដ្ឋាភិបាលកម្ពុជា នឹងបន្តលើកទឹកចិត្ត ដល់ ក្រុមហ៊ុនទាំងអស់ក្នុងការវិនិយោគនៅកម្ពុជាដោយគ្មានការរើសអើងឡើយ។
នៅពេលរសៀលថ្ងៃទី១១ ខែកញ្ញានេះសម្តេចតេជោ ហ៊ុន សែន ជួបពិភាក្សាការងារជាមលោក ហាន់ ចឹង ឧបនាយករដ្ឋមន្ត្រីទី១ នៃសាធារណរដ្ឋប្រជាមានិតចិន។ បន្ទាប់មកសម្តេចនឹងផ្តល់កិច្ចសម្ភាសន៍ផ្ទាល់ជាមួយសារព័ត៌មានចិននិងនៅពេលរាត្រីសម្តេចត្រូវបានអញ្ជើញចូលរួមនៅក្នុងពិធីជប់លៀងដែលរៀបចំដោយឧបនាយករដ្ឋមន្ត្រីទី១ របស់ប្រទេសចិន។
នៅព្រឹកថ្ងៃទី១២ កញ្ញា សម្តេចតេជោនាយករដ្ឋមន្ត្រីបានអញ្ជើញកាត់ខ្សែបូសម្ពោធពន្លាជាតិ កម្ពុជាជាមួយ លោក ហាន់ ចឹង ឧបនាយករដ្ឋមន្ត្រីទី១ ចិន។ បន្ទាប់មកបានអញ្ជើញចូលរួមពិធីបើកពិព័រណ៍ពាណិជ្ជកម្មចិន-អាស៊ាន លើកទី១៥។
តមកសម្តេចតេជោ ហ៊ុន សែន បានដឹកនាំគណប្រតិភូរាជរដ្ឋាភិបាលកម្ពុជាអញ្ជើញចាកចេញពីទីក្រុងណាន់នីងប្រទេសចិនហោះត្រង់ទៅកាន់ទីក្រុងហាណូយប្រទេសវៀតណាមដើម្បីចូលរួមវេទិកាសេដ្ឋកិច្ចពិភពលលោកស្តីពីអាស៊ាន ៤.០ (សំដៅទៅលើការវិវឌ្ឍឧស្សា ហកម្មទី៤ )។
នៅរសៀលថ្ងៃទី១២ ខែកញ្ញា សម្តេចតេជោហ៊ុនសែនក៏បានអញ្ជើញចូលរួមក្នុងបទអន្តរាគមន៍ក្នុងកិច្ចប្រជុំកំពូលពេញអង្គស្តីពីចក្ខុវិស័យថ្មីសម្រាប់តំបន់មេគង្គ។ បន្ទាប់មកសម្តេចតេជោ ហ៊ុន សែន ក៏បានទទួលជួបរដ្ឋមន្ត្រី ការបរទេសជប៉ុន លោក តារូ កូណូ រដ្ឋមន្ត្រីការបរទេសជប៉ុន នៅក្នុងជំនួបនោះភាគីទាំងពីរបានពិភាក្សាគ្នាដោយផ្តោត ទៅលើរបៀបវារៈនៃកិច្ចប្រជុំកំពូល មេគង្គ ជប៉ុន ដែលនឹងប្រព្រឹត្តធ្វើនៅដើមខែតុលា ខាងមុខនេះ។
នៅទីក្រុងហាណូយ ប្រទេសវៀតណាម នៅព្រឹកថ្ងៃទី១៣ កញ្ញា ប្រមុខរដ្ឋាភិបាលកម្ពុជាក៏បានអញ្ជើញអាហារពេលព្រឹកការងារជាមួយ នាយករដ្ឋមន្ត្រីឡាវ និង វៀតណាម មុនពិធីបិទកិច្ចប្រជុំកំពូលពេញអង្គនៃវេទិកាសេដ្ឋកិច្ចពិភពលោកស្តីពីអាស៊ានលើកទី២៧។ ក្នុងពិធីទទួលទានអាហារពេលព្រឹកការងារនោះប្រមុខរដ្ឋាភិបាលនៃប្រទេសទាំងបី កម្ពុជា ឡាវ វៀតណាម បានធ្វើការពិភាក្សាគ្នាយ៉ាងយកចិត្តទុកដាក់ទៅលើការរឹតចំណងសាមគ្គីភាព និងកិច្ចសហប្រតិបត្តិការនៃប្រទេសទាំងបី ពិសេសការរិះរកគ្រប់មធ្យោបាយក្នុងការជំរុញកិច្ចអភិវឌ្ឍ សម្រាប់ប្រទេសទាំងបីដែលក្នុងនោះភាគីទាំងបីបានផ្តោតការពិភាក្សាទៅលើការបន្តរួមគ្នាដោះស្រាយបញ្ហាប្រឈមនានា ដើម្បីធានាសន្តិភាព ស្ថេរភាព ដើម្បីជំរុញកំណើន នៃ ការអភិវឌ្ឍប្រទេសទាំងបីកម្ពុជា ឡាវ និងវៀតណាម។
មេដឹកនាំនៃប្រទេសទាំងបីក៏បានធ្វើការពិភាក្សាគ្នាយ៉ាងយកចិត្តទុកដាក់ទៅលើគំរោងនៃការតភ្ជាប់នៃប្រទេសទាំងបីពិសេសនៅតំបន់ត្រីកោណដែលជាតំបន់មួយមានការអភិវឌ្ឍទាបនៅឡើយ។ ប្រមុខរដ្ឋាភិបាលនៃប្រទេសទាំងបី ក៏បានធ្វើការពិនិត្យរួមគ្នាការងារជាអាទិភាពមួយចំនួនសម្រាប់គម្រោងអាទិភាពនៃការអភិវឌ្ឍតំបន់ត្រីកោណ សំដៅធ្វើយ៉ាងណាកាត់បន្ថយគន្លាតនៃការអភិវឌ្ឍតំបន់ទាំងនោះឲ្យមានការតភ្ជាប់និងការអភិវឌ្ឍប្រកបដោយនិរន្តរភាពខាង សេដ្ឋកិច្ច និង ពាណិជ្ជកម្ម។ មេដឹកនាំនៃប្រទេសទាំងបីបានប្តេជ្ញារួមគ្នាក្នុងការជំរុញល្បឿននៃការអភិវឌ្ឍតំបន់ត្រីកោណតាមរយៈការពិនិត្យលទ្ធភាពនិងការដាក់សំណើទៅកាន់ដៃគូអភិវឌ្ឍ ដើម្បីរកកញ្ចប់ថវិកាអភិវឌ្ឍតំបន់ត្រីកោណឲ្យកាន់តែមានការអភិវឌ្ឍរីកចម្រើន ទ្វេឡើងថែមទៀត ពិសេសជីវភាពរស់នៅរបស់ប្រជាពលរដ្ឋក្នុងតំបន់ត្រីកោណ កាន់តែទទួលបាននូវការលើកកម្ពស់ និងមានជីវភាពកាន់តែប្រសើរឡើង៕
Source: Kampuchea Thmey Daily
0 Comments