ភ្នំពេញ ៖ ខណៈដែលឯកអគ្គរដ្ឋទូតសាធារណរដ្ឋប្រជាមានិតចិន លោកស្យុង ព័រ បានឈានដល់ពេលបញ្ចប់អាណត្តិការទូតរបស់ខ្លួន ប្រចាំនៅកម្ពុជា បន្ទាប់ពីបានបំពេញការងារអស់រយៈពេលពីរឆ្នាំប្រកបដោយជោគជ័យ នៅព្រឹកថ្ងៃទី២៨ ខែកញ្ញា ឆ្នាំ២០១៨លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រី ក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានអនុញាតឱ្យឯកអគ្គរដ្ឋទូត រូបនេះ ចូលជួបជម្រាបលា និងសំដែងការគួរសម នៅទីស្តីការក្រសួង។
នៅក្រោយបញ្ចប់ជំនួបនេះលោកណុប ចាន់ណារិន្ទ អ្នកនាំពាក្យ និងជាអនុរដ្ឋលេខាធិការ ក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានឱ្យដឹងថា តាមរយៈនៃជំនួបនេះលោកស្យុង ព័រ ឯកអគ្គរដ្ឋទូតចិនប្រចាំកម្ពុជាចប់អាណត្តិ បានជំរាបជូនលោកជំទាវឧបនាយករដ្ឋមន្ត្រីថា ៖ក្នុងរយៈពេល២ឆ្នាំកន្លងមកនេះ ឯ,ឧ បានធ្វើកិច្ចការងារជាច្រើន ពិសេស ជួយសម្របសម្រួលក្នុងដំណើរទស្សនកិច្ច ឯកឧត្តមប្រធានាធិបតីចិន Xi Jinping,ឯកឧត្តមនាយករដ្ឋមន្ត្រីចិន លី ខឺឈាំង មកកាន់ កម្ពុជា ក៏ដូចជាដំណើរទស្សនកិច្ចរបស់សម្ដេចតេជោ ទៅកាន់ប្រទេសចិនផងដែរ។
លោកមន្ត្រីការទូតរូបនេះ បានជំរាបជូនលោកជំទាវ កិត្តិសង្គហបណ្ឌិត ម៉ែន សំអន ថា មុននេះលោកត្រូវបានសម្តេចពញាចក្រី ហេង សំរិន ប្រធានរដ្ឋសភា និងតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអនុញ្ញាតឲ្យចូលសម្តេចជួបថ្លែងអំណរគុណ និងជំរាបលាផងដែរ ។
លោកស្យុង ព័រ ក៏បានជម្រាបជូនលោកជំទាវកិត្តិសង្គហបណ្ឌិត ថា ក្នុងរយៈពេល ២ឆ្នាំមកនេះ គឺបានយកចិត្តទុកដាក់ខ្លាំងនៅក្នុងការជំរុញកិច្ចអភិវឌ្ឍសេដ្ឋកិច្ច នយោបាយផ្លូវមួយ ខ្សែក្រវាត់មួយ និងកិច្ចសហប្រតិបត្តិការជាច្រើនទៀត ដែលក្នុងនោះ ទទួលបាននូវលទ្ធផលដ៏ត្រចះត្រចង់ ដើម្បីពង្រឹង និងពង្រីក កិច្ចសហប្រតិបត្តិការ និងទំនាក់ទំនងចិន-កម្ពុជា ដល់ចំណុចថ្មីមួយទៀត ។
លោកជំទាវកិត្តិសង្គហបណ្ឌិត ម៉ែន សំអន បានថ្លែងអំណរគុណយ៉ាងជ្រាលជ្រៅជាទីបំផុត ចំពោះឯ,ឧ ស្យុង ព័រ និងមន្ត្រីការទូតរបស់ចិនទាំងអស់ ដែលបានខិតខំប្រឹងប្រែងអស់ពីកម្លាំងកាយចិត្ត ធ្វើឲ្យទំនាក់ទំនងរវាងកម្ពុជា និងចិន បានរីកចម្រើនដល់កម្រិតខ្លាំងឡើងថែមទៀត ។
លោកជំទាវ កិត្តិសង្គហបណ្ឌិតឧបនាយករដ្ឋមន្ត្រី បន្តថា ទំនាក់ទំនងរវាងប្រទេសយើងទាំង២បានឈានដល់ចំណុចទី១ គឺកិច្ចសហប្រតិបត្តិការ ភាពជាដៃគូគ្រប់ជ្រុងជ្រោយ ហើយថ្មីៗនេះ ប្រធានាធិបតីចិន ឯកឧត្តមស៊ី ជីនពីង បានមានប្រសាសន៍ ថា កម្ពុជា-ចិន គឺជាមិត្តដែកថែប ដែលកសាងឡើង ដោយភាពស្មោះត្រង់រវាង មិត្តនិងមិត្ត ។
ជាមួយនេះដែរ លោកជំទាវកិត្តិសង្គហបណ្ឌិត ម៉ែន សំអន បានជំរាបជូនឯកអគ្គរដ្ឋទូតចិនថា ក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានអនុវត្តយ៉ាងល្អប្រសើរ ទៅនឹងអនុស្សរណៈដែលបានចុះហត្ថលេខារួចហើយជាមួយអធិការកិច្ចចិនកន្លងមក ហើយនៅពេលខាងមុខដ៏ខ្លីនេះ ក្រសួងត្រៀមរៀបចំទទួលប្រតិភូអធិការកិច្ចរបស់ប្រទេសចិន ដែលមកទស្សនកិច្ចនៅកម្ពុជា ហើយទស្សនកិច្ចនេះ លោកជំទាវឧបនាយករដ្ឋមន្ត្រីយល់ឃើញថា នឹងនាំមកនូវកិច្ចសហប្រតិបត្តិការថ្មីៗបន្ថែមទៀត លើវិស័យអធិការកិច្ចរវាងប្រទេសទាំងពីរ ។
ក្នុងនាមសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា លោកជំទាវកិត្តិសង្គហបណ្ឌិត ម៉ែន សំអន បានថ្លែងអំណរគុណជូនចំពោះប្រជាជន រដ្ឋាភិបាលចិនផងដែរ ដែលតែងតែគាំទ្រកម្ពុជារហូតមក និងសូមជូនពរឲ្យឯ,ឧ បានទទួលជោគជ័យ នៃបេសកកម្មថ្មីថែមទៀត ។
សូមបញ្ជាក់ថា លោកស្យុង ព័រ ត្រូវបានរដ្ឋាភិបាលចិន ជ្រើសតាំងឲ្យមកបំពេញ បេសកកម្មការទូតនៅកម្ពុជា កាលពីអំឡុងឆ្នាំ២០១៦ ហើយមកដល់ពេលនេះ មានរយៈពេល ២ឆ្នាំហើយ ដែលលោកត្រូវបានបញ្ចប់អាណត្តិការទូតនេះ ប៉ុន្តែទោះជាយ៉ាងណា សម្រាប់ឯកអគ្គរដ្ឋទូតថ្មី ដែលនឹងត្រូវមកបន្ដបេសកកម្មការទូតនេះ ក្រសួងការបរទេសកម្ពុជា មិនទាន់បាន បញ្ជាក់នៅឡើយទេ៕
Source: Kampuchea Thmey Daily
0 Comments