ក្រុម​ភ្នំពេញ​ក្រោ​ន គ្រោង​បញ្ចូល​ក្រុមយុវជន​ថ្នាល​ទៅលេង​ពានរង្វាន់​អន្តរជាតិ​មួយ​នៅ​ប្រទេស​ថៃ

ក្រុមបាល់ទាត់​ភ្នំពេញ​ក្រោ​ន ម្ចាស់​ជើងឯក​៦​សម័យកាល​ប្រចាំ​ពានរង្វាន់​លី​គ​កំពូល​កម្ពុជា (Metfone Cambodian League) បាន​ប្រកាស​ថា ​ក្លិប​របស់ខ្លួន​នឹង​បញ្ជូន​ក្រុម​កីឡាករ​យុវជន​ថ្នាល​របស់ខ្លួន​គឺ​អាយុ​ក្រោម​១៤​ឆ្នាំ (U14) ទៅ​ប្រកួត​ក្នុង​ពានរង្វាន់​អន្តរជាតិ​មួយ​នៅ​ប្រទេស​ថៃ ដែល​មាន​ក្រុម​មកពី​បណ្តាល​ប្រទេស​ជាច្រើន​ចូលរួម​។

ពានរង្វាន់​ដែល​ក្រុម​កីឡាករ​អាយុ​ក្រោម​១៤​ឆ្នាំ​របស់​ភ្នំពេញ គ្រោង​នឹង​ចូល​រួម​ប្រកួត​មាន​ឈ្មោះថា​CP-Meiji Cup U-14 International Champions 2018 ដែលជា​ការផ្តួចផ្តើម​គំនិត​ឡើង​ពី​ក្លិប​យក្ស Buriram United របស់​ថៃ ខណៈ​ពានរង្វាន់​នេះ​នៅ​មិនទាន់​កំណត់​កាលបរិច្ឆេទ​ប្រកួត​ច្បាស់លាស់​នៅឡើយ​ទេ​។



យោង​តាម​ការ​បញ្ជាក់​របស់​ក្លិប​ភ្នំពេញ​ក្រោ​ន ក្រុម​ដែល​នឹង​ចូល​រួម​ក្នុង​ព្រឹត្តិការណ៍​នេះ​មាន​ជាច្រើន​ប្រទេស​ដូចជា​ក្រុម Jubilo Iwata ក្រុម Fagiano Okayama មកពី​ប្រទេស​ជប៉ុន ក្រុម FC Seoul ប្រទេស​កូរ៉េខាងត្បូង Kitchee SC ទីក្រុង​ហុងកុង ក្រុម Aspire Academy ប្រទេស​កាតា និង​មួយក្រុម​ទៀត​មកពី​ប្រទេស​ថៃ ដែល​មិនទាន់​បានធ្វើការ​ជម្រុះ​រកឃើញ​នៅឡើយ​។

​នេះ​ជា​លើក​ទី​៣​ហើយ​ ដែល​ក្លិប​ភ្នំពេញ​ក្រោ​ន បញ្ជូន​កីឡាករ​ទៅ​ចូលរួម​ប្រកួត​ក្នុង​ពានរង្វាន់​នេះ ខណៈ​កាលពី​ឆ្នាំ​ដំបូង​២០១៦ គឺ​ប្រកួត​មិនបាន​ចប់​ចុង​ចប់​ដើម​នោះ​ទេ ដោយ​ការប្រកួត​ត្រូវ​រំសាយ​បន្ទាប់​ព្រះបាទ​Bhumibol Adulyadej ព្រះមហាក្សត្រ​នៃ​ព្រះរាជណាចក្រ​ថៃ បាន​សោយ​ទី​វគ្គត​នៅ​ពេល​នោះ​។ ចូលឆ្នាំ​ទី​២ គឺ​នៅ​ឆ្នាំ ២០១៧ ក្រុម​របស់​ភ្នំពេញ​ក្រោ​ន បាន​ប្រកួត​ចាញ់​គ្រប់​ការប្រកួត​ដោយ​ឈរ​នៅ​បាត​តារាង​ប្រចាំ​ក្រុម​ទាំង​៨​ដែល​ចូលរួម ប៉ុន្តែ​ក្រុម​នេះ​ទទួល​បាន​ពានរង្វាន់ Fiar Play ប្រចាំ​ព្រឹត្តិការណ៍​ទៀតផង​។

​គណៈកម្មការ​បាន​កំណត់​ថា ​ក្រុម​ទាំងអស់​ត្រូវដាក់​កីឡាករ​ឲ្យ​លេង​ម្ខាង​១១​នាក់​ហើយ​ធ្វើឡើង​ចំនួន​ពីរ​តង់​ដោយ​មួយតង់​មាន​រយៈពេល​៣០​នាទី​។ គោលបំណង​របស់​អ្នក​រៀប​ចំ​កម្មវិធី​នេះ​គឺ​ដើម្បី​អភិវឌ្ឍន៍​បាល់ទាត់​យុវជន និង​ការប្រកួត​បាល់ទាត់​អន្តរជាតិ​ជាមួយនឹង​ក្រុម​ខ្លាំង​ក្នុង​តំបន់​។ ពួកគេ​គ្រោង​នឹង​ពង្រីក​ការប្រកួត​នៅ​ថ្ងៃ​អនាគត​៕

Source: Kampuchea Thmey Daily