ភ្នំពេញ ៖ ជនសង្ស័យ០២នាក់ ត្រូវបានសមត្ថកិច្ចជំនាញនៃការិយាល័យស្រាវជ្រាវបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បានបញ្ជូន ទៅសាលាដំបូងរាជធានីភ្នំពេញ ដើម្បីធ្វើការផ្តន្ទាទោសតាមច្បាប់ បន្ទាប់ពីចាប់ចាប់ខ្លួនពាក់ព័ន្ធករណីលួចកាច់ សោ.ក ម៉ូតូ កាលពីថ្ងៃទី១៥ ខែកញ្ញា ឆ្នាំ២០១៨ វេលាម៉ោងប្រហែល២០និង៣០នាទី នៅចំណុច ផ្លូវលេខ៨៦ ភូមិ១២ សង្កាត់ស្រះចក ខណ្ឌដូនពេញ រាជធានីភ្នំពេញរួចមក។
សមត្ថកិច្ចកងរាជអាវុធហត្ថរាជធានីបានឲ្យដឹងថា ជនសង្ស័យទាំង ០២នាក់ដែលឃាត់ខ្លួននេះរួមមាន ទី១/ ឈ្មោះ លាង ឡុងនី ហៅឡុង ហៅរ័ត្ន ភេទប្រុស អាយុ ២២ឆ្នាំទី២២/ ឈ្មោះ ស៊ីថា ស៊ីណាវិបុល ហៅបុល ភេទប្រុស អាយុ ១៨ឆ្នាំ។
ពួកគេទាំង ០២នាក់ ខាងលើ ត្រូវបានសមត្ថកិច្ចមូលដ្ឋានអាវុធហត្ថខណ្ឌដូនពេញ ធ្វើការស្រាវជ្រាវ ឃាត់ខ្លួនបាន បន្ទាប់ពីពួកគេធ្វើសកម្មភាពលួចកាច់ ក ម៉ូតូ ០១គ្រឿង ម៉ាក SUZUKI Nex ពណ៌ស ស្លាកលេខ ភ្នំពេញ 1GR-7405 ជារបស់ជនរងគ្រោះ ឈ្មោះ ប៉ិច សិរីបញ្ចពណ៌ ហៅឡាង ភេទស្រី អាយុ ១៨ឆ្នាំ ដែលចតនៅមុខហាងលក់គ្រឿងសំអាងយីហោ Choice Cosmetics Shop ។
ប្រភពបន្តថា តាមការសាកសួរ ក្រោមវិធានការជំនាញនៃការិយាល័យស្រាវជ្រាវបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ ជនសង្ស័យទាំង ០២នាក់ ខាងលើ បានសារភាពឲ្យដឹងថា ពួកគេពិតជាបានធ្វើសកម្មភាពលួចកាច់ ក ម៉ូតូ ០១គ្រឿង ម៉ាក SUZUKI Nex ពណ៌ស ស្លាកលេខ ភ្នំពេញ 1GR-7405 ពិតប្រាកដមែន ដោយនៅថ្ងៃកើតហេតុ ពួកគេបានឃើញឱកាសល្អ ពេលដែលជនរងគ្រោះចតម៉ូតូចោល មុខហាង ពួកគេក៏បានចូលទៅលួចកាច់ សោ.ក យកម៉ូតូរបស់ជនរងគ្រោះជិះគេចខ្លួនបាត់តែម្តង។
ក្រោយមក ពួកគេបានជិះម៉ូតូនោះ ទៅផឹកស៊ីជាមួយមិត្តភក្តិរបស់ខ្លួន នៅម្តុំបឹងកក់។ មួយសន្ទុះក្រោយមក ខណៈពេលដែលពួកខ្លួនកំពុងអង្គុយផឹកស៊ី ស្រាប់តែមានសមត្ថកិច្ចអាវុធហត្ថចូលមកធ្វើការឃាត់ពួកខ្លួនតែម្តង ហើយពួកគេបានបញ្ជាក់ប្រាប់សមត្ថកិច្ចអាវុធហត្ថទៀតថា កន្លងមកពួកខ្លួនធ្លាប់ប្រើប្រាស់គ្រឿងញៀន រយៈពេលប្រហែល ០១ឆ្នាំ មកហើយ។
ក្រោយការស្រាវជ្រាវតាមវិធានការជំនាញ និងយោងតាមចម្លើយសារភាពជាក់ស្តែងរបស់ជនសង្ស័យ សមត្ថកិច្ចជំនាញនៃការិយាល័យស្រាវជ្រាវបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បានកសាងសំណុំរឿង និងបញ្ជូនពួកគេទាំង ០២នាក់ ទៅសាលាដំបូងរាជធានីភ្នំពេញ ដើម្បីធ្វើការចោទប្រកាន់ និងផ្តន្ទាទោសដាក់ពន្ធនាគារ តាមបទល្មើសជាក់ស្តែង៕
Source: Kampuchea Thmey Daily
0 Comments