ខេ​មចាន់​និង រិ​ទ្ធ អាទិត្យ វាយ​ចាញ់​ឡាវ​ដូចគ្នា ក្នុង​ជម្រុះ​ជុំ​ទី​២​ខ្សែក្រវាត់​គូ​បូ​តា

ការប្រកួត​ជម្រុះ​ដណ្តើម​ខ្សែក្រវាត់​ជើងឯក​លេខ១ គូ​បូ​តា​ទម្ងន់​៥៤​គីឡូក្រាម នៅ​សង្វៀន​បាយ័ន​ស្ទឹងមានជ័យ កាលពី​យប់​ថ្ងៃ​សុក្រ​ទី​១៤ ខែ​​កញ្ញា​ ឆ្នាំ​២០១៨ ដែលជា​ការប្រកួត​ជុំ​ទី​២ នោះ ខេ​ម ចាន់ អ្នក​ប្រដាល់​ក្លិប​កងពលតូច​ទ័ព​ឆ័​ត្រ​យោង​៩១១ និង រិ​ទ្ធ អាទិត្យ ក្លិប​អាណាចក្រ​គុន​ខ្មែរ បាន​វាយ​ចាញ់​ឡាវ​ទាំងពីរ​នាក់។​

ខេ​ម ចាន់ គេ​វាយ​ចាញ់​អ្នក​ប្រដាល់​ឡាវ SeangSuriya Site Torkahkart ដោយ​ពិន្ទុ​ហើយ​រិ​ទ្ធ អាទិត្យ គេ​ចាញ់​អ្នក​ប្រដាល់​ឡាវ​Wangngeu Rungrean Kilanakorn Phattom ដោយ​ពិន្ទុ​ដែរ ។​

ក្នុងការ​ប្រកួត​៥​ទឹក​នោះ ខេ​ម ចាន់ មិនអាច​យកឈ្នះ​SeangSuriya បានឡើយ ទោះបីជា​គេ​បាន​វាយ​ចេញ​ច្រើន​ក៏ដោយ ក៏​ការ​វាយ​របស់គេ​ខុស​គោលដៅ និង​ត្រូវ​អ្នក​ប្រដាល់​ឡាវ​នោះ ទប់​បាន​ទាំងអស់។

ជាមួយនឹង​លទ្ធផល​នេះ ខេ​ម ចាន់​បាន​៤​ពិន្ទុ ក្នុង​ពីរ​ប្រកួត ហើយ​អ្នក​ប្រដាល់​ឡាវ SeangSuriya គេ​បាន​៦​ពិន្ទុ ក្នុងការ​ប្រកួត​ពីរ​ជុំ​ដូចគ្នា ។​

ចំពោះ​ការប្រកួត​របស់​រិ​ទ្ធ អាទិត្យ វិញ ក៏​មិន​ខុសគ្នា​ប៉ុន្មាន​ដូច​ការប្រកួត​របស់​ខេ​ម ចាន់​ដែរ ។ ក្នុង​៥​ទឹក អ្នក​ប្រដាល់​ឡាវ​Wangngeun Rungrean បាន​វាយ​ចេញ​មុន រិ​ទ្ធ អាទិត្យ ជានិច្ច ដែល​ធ្វើអោយ​អាទិត្យ ចាញ់​ពិន្ទុ ។
​
រិ​ទ្ធ អាទិត្យ ក្រោយ​ចាញ់​Wangngeun នេះ គេ​ពិបាក​នឹង​ស្តារ​ពិន្ទុ​បានមក​វិញ​ណាស់ ព្រោះ​គេ​វាយ​ចាញ់​២​ប្រកួត​ទៅហើយ ក្នុងការ​ប្រកួត​ជម្រុះ​ពីរ​ជុំ​នេះ ។ ចំណែក​Wangngeun​គេ​មាន​ផ្លូវ​ស្តារ​ពិន្ទុ សម្រាប់​ជុំ​បន្តបន្ទាប់​ទៀត ដោយសារ​គេ​បាន​៤​ពិន្ទុ​ក្នុង​ពីរ​ប្រកួត​ដូចគ្នា​នោះ ។
​
សូមបញ្ជាក់ថា កីឡាករ​ខ្លាំង​ទាំង​១០​រូប ដែល​ចូលរួម​ប្រកួត​ដណ្តើម​ខ្សែក្រវាត់​គូ​បូ​តា​រដូវ​កាល​ថ្មី​ទម្ងន់​៥៤​គីឡូក្រាម​នេះ មាន​អ្នក​ប្រដាល់​ជើង​ខ្លាំង​កម្ពុជា​៥​រូប និង អ្នក​ប្រដាល់​ជើង​ខ្លាំង​ថៃ​-​ឡាវ ៥ រូប ចូលរួម​វាយ​ដណ្តើមយក​ខ្សែក្រវាត់​នេះ ។​
​
អ្នក​ប្រដាល់​មួយរូបៗ ទាំង​ខ្មែរ ទាំង​ថៃ និង​ឡាវ គឺ​ត្រូវ​ឆ្លងកាត់​ការប្រកួត​ក្នុង​ម្នាក់ៗ ចំនួន ៤ ប្រកួត​ម្នាក់ ហើយ​អ្នក​ដែលមាន​ពិន្ទុ​ច្រើន​២​រូប​ក្នុង​មួយ​ពូ​ល ទាំង​ពូ​ល​ខ្មែរ និង ពូ​ល​ថៃ​-​ឡាវ នឹងត្រូវ​បាន​ឡើងទៅ​ប្រកួត​វគ្គ​ពាក់កណ្តាល​ផ្តាច់ព្រ័ត្រ និង ផ្តាច់ព្រ័ត្រ ។​
​ដោយឡែក ការប្រកួត​រវាង​អ្នក​ប្រដាល់​រួម​ជាតិ​វិញ ឡេង ម៉ៅ អ្នក​ប្រដាល់​ក្លិប​ម៉ៃ​ទី ក្រាំង​យ៉ូ​វ បាន​ប្រកួត​ចាញ់ សំ ភក្តី អ្នក​ប្រដាល់​ក្លិប​រ៉ា​ហាប់​ស្វាយប៉ាក ដោយ​ពិន្ទុ ហើយ​ហេង វុ​ទ្ធា អ្នក​ប្រដាល់​ក្លិប​លំពែង​រាជសីហ៍ វាយ​ឈ្នះ ឯម ដា​រ៉ូ អ្នក​ប្រដាល់​ក្លិប​ថ្មគោល​ពោធិ​សែន​ជ័យ ដោយ​ពិន្ទុ​ដែរ៕​



Source: Kampuchea Thmey Daily