មេដឹកនាំ​កូរ៉េ​ទាំងពីរ​ បញ្ចប់​កិច្ចប្រជុំ​កំពូល​ជាមួយ​ដំណើរ​កម្សាន្ត​ទៅ​ភ្នំ​ដ៏​ពិសិដ្ឋ

លោក គីម ជុង​អ៊ុន និង​លោក មូ​ន ចេ​អ៊ី​ន បាន​ទៅ​ទស្សនា​កន្លែង​កំណើត​ខាង​សាសនា​នៃ​ប្រជាជាតិ​កូរ៉េ​កាលពី​ថ្ងៃ​ព្រហស្បតិ៍​ដើម្បី​បង្ហាញ​សាមគ្គីភាព​ បន្ទាប់ពី​កិច្ចប្រជុំ​កំពូល​អន្តរ​របស់​ពួកគេ​បាន​ផ្តល់​សន្ទុះ​ថ្មី​ដល់​ការចរចា​របស់​ក្រុង​ព្យុងយ៉ាង​ជាមួយ​ក្រុង​វ៉ាស៊ីនតោន។

មេដឹកនាំ​កូរ៉េខាងជើង​កាលពី​ថ្ងៃ​ពុធ​បាន​យល់ព្រម​បិទ​កន្លែង​សាកល្បង​មី​ស៊ី​ល Tongchang-ri នៅ​ចំពោះមុខ​អ្នកសង្កេតការណ៍​អន្ដរជាតិ​ដែល​នេះ​ជា​ទង្វើ​មួយ​ត្រូវបាន​អាមេរិក​ស្វាគមន៍​ដោយ​និយាយថា ខ្លួន​ត្រៀម​រួចជាស្រេច​សម្រាប់​កិច្ចពិភាក្សា​ភ្លាមៗ​ក្នុង​គោលបំណង​រំសាយ​អាវុធ​នុយក្លេអ៊ែរ​របស់​ប្រទេស​កូរ៉េខាងជើង​។​

ក្រុង​ព្យុងយ៉ាង​ក៏បាន​និយាយ​ផងដែរ​ថា ខ្លួន​អាច​រុះរើ​ទីតាំង​នុយក្លេអ៊ែរ​ដ៏​ល្បីឈ្មោះ​របស់ខ្លួន​នៅ​តំបន់ Yongbyon បើសិនជា​សហរដ្ឋអាមេរិក​ចាត់វិធានការ​ត្រូវ​គ្នា​។​

លោក មូ​ន និង​លោក គីម បាន​ស្វែងរក​ការពង្រឹង​ចំណងមិត្តភាព​រវាង​កូរ៉េខាងជើង​និង​កូរ៉េខាងត្បូង​នៅឯ​កិច្ចប្រជុំ​កំពូល​ក្រុង​ព្យុងយ៉ាង​ដោយ​យល់ស្រប​ថា មេដឹកនាំ​កូរ៉េខាងជើង​នឹងធ្វើ​ទស្សនកិច្ច​នៅ​ទីក្រុង​សេ​អ៊ូ​ល​ក្នុង​ពេលអនាគត​ដ៏​ខ្លី​ខាងមុខនេះ​។​

កាលពី​ថ្ងៃ​ព្រហស្បតិ៍ លោក​មូ​ន​និង​លោក​គីម​ដែល​អមដំណើរ​ដោយ​ភរិយា​របស់​ពួកគេ​បាន​ទៅ​ទស្សនា​ភ្នំ Paektu នៅជាប់​ព្រំដែន​ចិន​។​

ភ្នំ​ដែលមាន​កំពស់​២,៧៤៤​ម៉ែត្រ​មួយ​នេះ​ត្រូវបាន​ចាត់ទុកថា​មាន​ភាព​សក្តិ​សិទ្ធិ​ដល់​ប្រជាជន​កូរ៉េ​ទាំងអស់​ព្រោះ​ជា​កន្លែង​កំណើត​របស់ Dangun ដែលជា​អ្នកបង្កើត​នគរ​កូរ៉េ​មុនគេ​បង្អស់​។​

យោងតាម​ការរៀបរាប់​របស់​ព្យុងយ៉ាង​បាន​ឲ្យ​ដឹងថា វា​ក៏​ជា​កន្លែង​ដែល​ឪពុក​របស់លោក​គីម​ជុង​អ៊ុន​គឺ​លោក​គីម​ជុងអ៊ីល​ចាប់កំណើត​នៅក្នុង​ជំរំ​សម្ងាត់​មួយ​ផងដែរ​ដែល​នៅ​ទីនោះ​ឪពុក​របស់គាត់​ឈ្មោះ គីម អ៊ី​ល​ស៊ុ​ល ដែលជា​ស្ថាបនិក​របស់​កូរ៉េខាងជើង​កំពុង​ប្រយុទ្ធ​ជាមួយ​ពួក​អាណានិគម​ជប៉ុន​។​

ភ្ញៀវទេសចរ​កូរ៉េខាងត្បូង​នាំគ្នា​ទៅ​មើល​ភ្នំ​នេះ​តាមរយៈ​ប្រទេស​ចិន​ប៉ុន្តែ​មាន​ជនជាតិ​កូរ៉េខាងត្បូង​មួយចំនួន​តូច​បំផុត​ដែល​ទទួលបាន​ការអនុញ្ញាត​ឲ្យ​ចូល​ពី​ខាង​ភាគី​កូរ៉េខាងជើង​ដោយ​ភាគច្រើន​សម្រាប់​គោលបំណង​ស្រាវជ្រាវ​៕ AFP

​

Source: Kampuchea Thmey Daily