អំណោយ​មួយចំនួន និង​កូនឈើ​ប្រណិត​ជិត​៥០០​ដើម ត្រូវបាន​ក្រុម​ជំនួយការ លោក ហ៊ុន ម៉ា​ណែ​ត នាំយកទៅ​ប្រគល់ជូន និង​ធ្វើ​ការដាំដុះ​នៅ​សាលាបឋមសិក្សា​អង្គ​ខ្នារ និង​វត្ត​អង្គ​ខ្នារ ឃុំ​លាយ​បូរ ស្រុក​ត្រាំកក់ ខេត្តតាកែវ

នៅ​រសៀល​ថ្ងៃ​សុក្រ ទី​២៨ ខែកញ្ញា ឆ្នាំ​២០១៨ នេះ ក្រុម​ជំនួយការ​របស់ ហ៊ុន ម៉ា​ណែ​ត បាន​នាំយក​ថវិកា ចំនួន ១៩​លាន​រៀល ស៊ីម៉ង់​តិ៍ ១០​តោន ឥដ្ឋ ១០.០០០​ដុំ ប្រគល់ជូន​សាលាបឋមសិក្សា​អង្គ​ខ្នារ ដើម្បី​ជួសជុល​អគារសិក្សា និង​របង​សាលា រួមជាមួយ​ថវិកា ២​លាន​រៀល និង​ស៊ីម៉ង់​តិ៍ ចំនួន ២០​តោន ដែលជា​អំណោយ​ដ៏​ថ្លៃថ្លា​របស់ ឯកឧត្តម ហ៊ុន ម៉ា​ណែ​ត និង​លោកជំទាវ ពេ​ជ ចន្ន​មុន្នី ប្រគេន​ដល់​វត្ត​អង្គ​ខ្នារ សម្រាប់​ការកសាង​ក្នុង​ទី​អារាម​នេះ​។​



ក្រៅពី​អំណោយ​ទាំងនេះ ក្រុមការងារ​រួមជាមួយ​ប្រជាពលរដ្ឋ អាជ្ញាធរ​មូលដ្ឋាន និង​សិស្សានុសិស្ស បាននាំគ្នា​ដាំ​ដុះ​កូនឈើ​ជិត​៥០០​ដើម ក្នុង​ទី​អារាម​សម្រាប់​ជា​ម្លប់ និង​រួមចំណែក​គាំពារ​ដល់​បរិស្ថាន​។



នៅ​ក្នុងឱកាស​សំណេះសំណាល លោក មែ ស៊ីថន បាន​ពាំ​នាំនូវ​ការ​ផ្តាំ​សាកសួរ​សុខទុក្ខ​ពី​សំណាក់​លោក ហ៊ុន ម៉ា​ណែ​ត និង​លោកជំទាវ ទូល​ប្រគេន​ព្រះសង្ឃ​គ្រប់​ព្រះអង្គ ជូន​លោកយាយ​លោកតា និង​ប្រជាពលរដ្ឋ​ទាំងអស់​។ លោក​ក៏បាន​មានប្រសាសន៍ លោក​ហ៊ុន ម៉ា​ណែ​ត កំពុង​បំពេញបេសកកម្ម​នៅក្រៅ​ប្រទេស ជាពិសេស សម្តេច​តេ​ជោ ហ៊ុន សែន កំពុង​ចូលរួម​កិច្ចប្រជុំ​កំពូល​នៅឯ​អង្គការសហប្រជាជាតិ សហរដ្ឋអាមេរិក ដើម្បី​កិត្យានុភាព កិត្តិយស និង​ផលប្រយោជន៍​ជាតិ​នៅលើ​ឆាក​អន្តរជាតិ​។



លោក មែ ស៊ីថន បានលើកឡើង​នូវ​សារៈសំខាន់​នៃ​សាលា និង​គុណូបការៈ​របស់​គ្រូ និង​បាន​ថ្លែងអំណរគុណ​ចំពោះ​លោកគ្រូ​អ្នកគ្រូ​ដែល​បាន​ដើរ​តួនាទី​យ៉ាង​សំខាន់​ជា​មាតាបិតា​ទី​ពីរ អប់រំ បង្ហាត់បង្រៀន និង​ជួយ​ដល់​ការលូតលាស់​នៃ​បញ្ញា​ស្មារតី​ដល់​សិស្សានុសិស្ស​។ លោក​ក៏បាន​បង្ហាញ​អំពី​គំរូ​វីរភាព​នឹង​ការ​លះបង់​ដ៏​ធំធេង​របស់​ថ្នាក់ដឹកនាំ​និង​យុវជន​ជំនាន់​មុន​ជាពិសេស សម្តេច​តេ​ជោ ហ៊ុន សែន ដែល​បាន​លះបង់​អ្វីៗ​គ្រប់យ៉ាង និង​យក​ជីវិត​ធ្វើជា​ដើមទុន​ដើម្បី​ស្វែងរក​សុខសន្តិភាព​ជូន​ប្រជាជន និង​ប្រទេសជាតិ​ដែល​ធ្វើ​ឲ្យ​យើង​បានរស់នៅ​សុខសាន្ត និង​មានឱកាស​គ្រប់បែប​យ៉ាងដូច​សព្វថ្ងៃ​នេះ​។



សម្រាប់​ការ​ដាំដុះ​កូនឈើ លោក​បាន​បន្តថា នេះ​ជា​ពេលវេលា​ដ៏​ល្អ​ដែល​យើងទាំងអស់គ្នា​មានឱកាស​ចូលរួម​ដាំ​ដើមឈើ​ដើម្បី​ទុកជា​គុណប្រយោជន៍​សម្រាប់​សង្គម និង​មនុស្ស​ជំនាន់​ក្រោយ។ លោក​បាន​បញ្ជាក់​ថា តាមពិត​ពេលវេលា​ដែល​ល្អ​បំផុត​គឺ​យើង​ដាំ​ដើមឈើ​កាលពី​១០​ឆ្នាំមុន ហើយ​បាន​ផល​នៅថ្ងៃនេះ ក៏ប៉ុន្តែ​យើង​ដាំ​ថ្ងៃនេះ​ក៏​មិនទាន់​ហួសពេល​ដែរ យើង​ចាប់ផ្តើម​ដាំ​ដុះ​តែម្តង​និង​រំពឹង​ទទួល​ល​ផលប្រយោជន៍​នៅ​១០​ឆ្នាំក្រោយ​ទៀត​។



លោក​អភិបាលរង​ស្រុក​ត្រាំកក់ និង លោក អ៊ុន វណ្ណា ក្នុងនាម​តំណាង​គណៈ​អភិបាលខេត្ត អាជ្ញាធរ​ខេត្តតាកែវ និង​ជំនួសមុខ​ជូន​ប្រជាពលរដ្ឋ​អ្នកស្រុក​ត្រាំកក់ ខេត្តតាកែវ សូម​ថ្លែងអំណរគុណ​ក្រុមការងារ និង​គោរព​ថ្លែងអំណរគុណ​ចំពោះ លោក ហ៊ុន ម៉ា​ណែ​ត និង​លោកជំទាវ ដែល​បាន​គិតគូរ​សុខទុក្ខ​ប្រជាពលរដ្ឋ ដោយបាន​ចូលរួម​ផ្តល់​អំណោយ​ដ៏​ថ្លៃថ្លា​នេះ​។



ក្នុង​ប្រសាសន៍​សំណេះសំណាល លោក អ៊ុន វណ្ណា ក្នុងនាម​គណបក្ស​ប្រជាជន​កម្ពុជា​ខេត្តតាកែវ បាន​ធ្វើ​ការ​កោត​សរសើ​រ​ក្រុមការងារ និង​វាយតម្លៃ​ថា សកម្មភាព​ដាំ​កូនឈើ​នេះ គឺជា​គំរូ​ដ៏​ល្អ​ក្នុងនាម​ជា​ប្រជាពលរដ្ឋ ដែល​ជា​ការចូលរួម​កិច្ចការ​សង្គម​ប្រកបដោយ​ទឹកចិត្ត​និង​ឆន្ទៈ​សម្រាប់​ផលប្រយោជន៍​រួម​សម្រាប់​រយៈពេល​យូរអង្វែង​។



លោក​ក៏បាន​ជំរាប​ជូន ប្រជាពលរដ្ឋ លោកគ្រូ អ្នកគ្រូ​សិស្សានុសិស្ស នូវ​មោទនភាព​ជាតិ កិត្យានុភាព​ជាតិ​ក្នុងនាម​ប្រជាជាតិ​ខ្មែរ ដែល​វិ​រ​បុរស​និង​ជា​មេដឹកនាំ​ដ៏​ឆ្នើម​របស់​កម្ពុជា គឺ​សម្ដេច​តេ​ជោ ហ៊ុន សែន បាន​បង្ហាញ​ទៅដល់​ពិភពលោក​នៅក្នុង​មហាសន្និបាត​អង្គការសហប្រជាជាតិ​លើក​ទី​៧៣ ទីក្រុង​ញ៉ូ​វ​យ៉​ក សហរដ្ឋអាមេរិក ថ្ងៃទី​២៨ ខែកញ្ញា ឆ្នាំ​២០១៨​។



សូម​បញ្ជាក់​ថា នៅក្នុង​ឱកាស​នោះដែរ ក្រុម​ពី​អំណោយ​របស់​ខាងលើ ក្រុមការងារ​បាន​នាំ​យក​អំណោយ​អនុស្សាវរីយ៍​របស់​លោក ហ៊ុន ម៉ា​ណែ​ត និង​លោកស្រី ពេ​ជ ច​ន្ន​មុន្នី ក្នុងនោះ​រួមមាន សម្ភារៈ​សិក្សា​ជូន​សិស្សានុសិស្ស ក្រមា ក្រណាត់សរ និង​ថវិកា​ជូន​លោកយាយ​លោកតា និង​ប្រជាពលរដ្ឋ​ផងដែរ​៕

Source: Kampuchea Thmey Daily