ឌុន រដ្ឋា អ្នកប្រដាល់ជើងខ្លាំង នៃក្លិបអេភូថងកីឡា នឹងត្រូវឡើងតស៊ូជាមួយអ្នកប្រដាល់ថៃChhouk Namchhai នាព្រឹកថ្ងៃអាទិត្យទី ២៩ មេសា ២០១៨នេះ នៅលើសង្វៀន Boo strong Fighter On Fire របស់SEA-TV ។
Chhouk Namchhai ជាអ្នកប្រដាល់ថៃចំណូលថ្មី ដែលមិនធ្លាប់មកប្រកួតនៅស្រុកខ្មែរម្តងណានៅឡើយទេពីមុនមក ។ អ្នកប្រដាល់ថៃរូបនេះ បើតាមលោកញាណ សុធី អ្នកចាត់ចែងកម្មវិធីប្រដាល់ប្រចាំនៅSEATV អោយដឹងនោះថា គេប្រកួតមានប្លង់តាមលក្ខណះបច្ចេកទេស ទាំងកណ្តាប់ដៃ ទាំងជើងទាត់ ជង្គង់កែង គឺមានកំប្លេតែម្តង ។
យ៉ាងណា Chhouk Namchhai នេះ មានកំនត់ត្រាប្រកួតចំនួន៧០លើក ឈ្នះ៥៨លើក ចាញ់១១លើក និងស្មើ ០១លើក ។
ឌុន រដ្ឋា អ្នកប្រដាល់កម្ពុជាយើងវិញ ជាអ្នកប្រដាល់ចាស់វស្សា។គេមានស្នៀតប្រដាល់ល្អនិង មានចិត្តប្រដាល់ធំ ហើយហ៊ានប្តូរជាមួយគូប្រកួតដោយមិនខ្លាចញញើតឡើយ ។
សម្រាប់ការជួបប្រកួតជាមួយChhouk Namchhai នេះ មិនដឹងថា ឌុន រដ្ឋា អាចយកឈ្នះបានឬអត់នោះទេ ? ។ ទោះជាយ៉ាងណា អ្នកប្រដាល់ឌុន រដ្ឋា គេមិនសូវជួបសំណាងល្អប៉ុន្មានទេ ក្នុងការជួបប្រកួតជាមួយថៃនោះ ។ បើតាមការកត់សម្គាល់កន្លងមក ក្នុងការជួបថៃចំនួន១៤លើក រដ្ឋា វាយឈ្នះថៃបានតែ០៤លើកប៉ុណ្ណោះ ។
ឌុន រដ្ឋា មានកំនត់ត្រាប្រកួត៨៥លើក ឈ្នះ៦៣លើក ចាញ់១៧លើក និងស្មើ៥លើក ។ដូច្នេះ ចាំមើលរវាងឌុន រដ្ឋា និង Chhouk Namchhai ជួបគ្នាលើកទី១នេះ តើនរណាជាអ្នកឈ្នះនោះ ?។
សារឿន ច័ន្ទ អ្នកប្រដាល់ក្លិបសម្រែករាជសីហ៍ ត្រូវជួបជាមួយអ្នកប្រដាល់ថៃឈ្មោះPhat Ngam ដោយប្រកួតក្នុងទម្ងន់៦០គីឡូក្រាម ។ អ្នកប្រដាល់ថៃរូបនេះ មិនធ្លាប់មកប្រកួតនៅSEA-TVនេះទេកន្លងមក។
បើតាមលោកញាណ សុធី អ្នកចាត់ចែងកម្មវិធីប្រដាល់នៅSEA-TVអោយដឹងនោះថា Phat Ngam អ្នកប្រដាល់ថៃរូបនេះ មានកម្ពស់ខ្ពស់ជាងសារឿន ច័ន្ទ តែប្រវត្តិប្រកួតរបស់គេ គឺតិចជាងសារឿន ច័ន្ទ ប្រមាណជាង២០លើក ។ Phat Ngam ប្រកួតបានចំនួន៨៥លើក ដោយឈ្នះ៧៣លើក ចាញ់១២លើក និងមិនដែលស្មើ ខណះដែលសារឿន ច័ន្ទ អ្នកប្រដាល់កម្ពុជាយើងប្រកួតបានចំនួន៩៨លើក ឈ្នះ៧៩ដង ចាញ់១៧លើក និងស្មើ០២លើក ។
សារឿន ច័ន្ទ ធ្លាប់ប្រកួតជាមួយថៃ៣៦លើកហើយកន្លងមក ដោយវាយឈ្នះថៃដោយពិន្ទុ១០លើក និងវាយសន្លប់៩លើក ហើយចាញ់ថៃ១៧លើក ។ការប្រកួតជាមួយថៃលើកចុងក្រោយនេះ សារឿន ច័ន្ទវាយចាញ់Phich Ngenthong ក្នុងទឹកទី៤ កាលពីថ្ងៃទី៣១មីនា២០១៨ ។
ជាអ្នកប្រដាល់ដែលមានកណ្តាប់ដៃលឿន រហ័ស និងខ្លាំងនោះ សារឿន ច័ន្ទ វាយមិនញញើតអ្នកប្រដាល់ថៃនោះឡើយ។ចាំមើល តើសារឿន ច័ន្ទ អាចយកឈ្នះ Phat Ngam បានឬអត់ ? ។
ចំពោះ អ្នកប្រដាល់ចាន់ ចំរើន ក្លិបនិរោធមានជ័យ នឹងត្រូវស្វាគមន៍អ្នកប្រដាល់បារាំងឈ្មោះ Duverly។ ពួកគេទាំងពីរ ជួបប្រកួតគ្នាក្នុងទម្ងន់៦០គីឡូក្រាម ។
ចាន់ ចំរើន ជាអ្នកប្រដាល់ដែលចាត់ទុកថាជាជើងថ្មី ព្រោះគេទើបតែជួបប្រកួតជា មួ យអ្នកប្រដាល់បរទេសជាលើកទី៨ប៉ុណ្ណោះ ហើយក៏ជាអ្នកប្រដាល់ដែលមានបទពិសោធន៍ខ្ចីនៅឡើយដែរ ។ ប៉ុន្តែចាន់ ចំរើន បែរជាអាចវាយឈ្នះថៃ ច្រើនជាងចាញ់ទៅវិញ ។
ចាន់ ចំរើន មានប្រវត្តិប្រកួតប្រមាណជិត៦០លើកប៉ុណ្ណោះ ក្នុងនោះវាយឈ្នះ៤៧ ចាញ់១១និងស្មើ០២លើក តែធ្លាប់ផ្តួលដៃគូអោយសន្លប់ចំនួន១២ ។ គេជាអ្នកប្រដាល់ជើងខ្លាំងស្រករក្រោយ ដោយមានចិត្តធំ កម្លាំងខ្លាំង វាយមិនសំចៃដៃឡើយ ។ ប៉ុន្តែយ៉ាងណាការប្រកួតលើកនេះ មិនដឹងថាចំរើនអាចយកឈ្នះDuverly បានឬអត់នោះទេ ? ។ ចំរើន ប្រកួតជាមួយថៃលើកចុងក្រោយនេះ វាយឈ្នះNuth Kor. ដោយពិន្ទុ ។
Duverly ជាអ្នកប្រដាល់ជើងថ្មី តែមានស្នៀតទាត់និងកណ្តាប់ដៃល្អ។គេមិនធ្លាប់មកប្រកួតនៅស្រុកខ្មែរម្តងណាទេកន្លងមក គឺទើបតែមកលើកទី១ ជួបចាន់ ចំរើននេះឯង ។ ទោះជាយ៉ាងណា ចាន់ ចំរើន មិនអាចមើលស្រាលចំពោះDuverly នេះឡើយ ។ចាំមើល Duverly និងចាន់ ចំរើន តើនរណាជាអ្នកឈ្នះនោះ?៕
Source: Kampuchea Thmey Daily
0 Comments