អ្នកប្រដាល់ជើងខ្លាំងកម្ពុជា២រូប គឺឯម ឡេងលី អ្នកប្រដាល់ក្លិបថ្មគោលពោធិ សែនជ័យ និង វេង សុភ័ក្រ ក្លិបកងពលតូចទ័ពឆ័ត្រយោង៩១១ ត្រូវគេផ្គូឲ្យជួបប្រកួតជាមួយអ្នកប្រដាល់ថៃ លើសង្វៀនWurkz នារសៀលថ្ងៃអាទិត្យទី១៦ ខែកញ្ញា ឆ្នាំ២០១៨នេះ។
អ្នកប្រដាល់ជើងខ្លាំងស្រករក្រោយ ឯម ឡេងលី ក្លិបថ្មគោលពោធិសែនជ័យ ត្រូវគេផ្គូឲ្យជួបជាមួយអ្នកប្រដាល់ថៃឈ្មោះខុន ក្រុងថេប ( Khon Krong Thap )។ ពួកគេទាំងពីរ នឹងប្រកួតគ្នាក្នុងទម្ងន់៧១គីឡូក្រាម ។
ខុន ក្រុងថេប គេធ្លាប់មកប្រកួតនៅកម្ពុជាច្រើនលើកហើយកន្លងមក ។ អ្នកប្រដាល់ ថៃរូបនេះ បើប្រៀបជាមួយឯម ឡេងលី គឺមិនដឹងថាអាចយកឈ្នះឡេងលីបានឬអត់នោះទេ ព្រោះថាឡេងលី គេទើបតែផ្តួលជើងខ្លាំងថៃភិច អារុណ កាលពីចុងខែសីហាកន្លងមកនោះ ។
ខុន ក្រុងថេប គេធ្លាប់ផ្តួលយកឈ្នះអ្នកប្រដាល់ខ្មែរប៉ុន្មាននាក់មកហើយ ។ ប៉ុន្តែយ៉ាងណា អ្នកប្រដាល់ថៃរូបនេះ មកជួបឯម ឡេងលី ហាក់ដូចជារាងយ៉ាប់ស៊ីបន្តិច ។ ខុន ក្រុងថេប មានកំនត់ត្រាប្រកួតចំនួន៨៧លើក ឈ្នះ៦៩លើក ចាញ់១៨លើក និងមិនដែលស្មើ។អ្នកប្រដាល់ថៃរូបនេះ វាយខ្លាំងនិងល្អ ។ យ៉ាងណា ខុន ក្រុងថេប ប៉ះជាមួយ ឯម ឡេងលី ក៏ប្រហែលជាជួបការលំបាកដែរ ព្រោះថា ឡេងលី ថ្វីត្បិតតែមានប្រវត្តិប្រកួតត្រឹមតែជាង៤០លើក ឈ្នះ៣១លើក ចាញ់០៨លើកនិងស្មើ០១លើកក្តី តែគេមានស្នៀតប្រដាល់ល្អ ។
ឯម ឡេងលី យ៉ាងណាក៏ត្រូវប្រយ័ត្នដែរ សម្រាប់ការប្រកួតលើកនេះ។ ដូច្នេះចាំមើល តើនរណាឈ្នះរវាងឯមឡេងលី និង ខុន ក្រុងថេប នេះ ? ។ ឡេងលី គេប្រកួតចុងក្រោយ បានវាយឈ្នះជើងខ្លាំងថៃភិច អារុណក្នុងទឹកទី ៥ កាលពីថ្ងៃទី២៥សីហាកន្លងទៅនេះ ។
ចំពោះ វេង សុភ័ក្រ អ្នកប្រដាល់កងពលតូចទ័ពឆ័ត្រយោង៩១១ ត្រូវគេផ្គូអោយជួបសាកកណ្តាប់ដៃជាមួយ ហា ឆ្លាម(Ha Chhlam) អ្នកប្រដាល់ថៃ ដោយប្រកួតគ្នាក្នុងប្រភេទទម្ងន់៦៣,៥០០គីឡូក្រាម ។
ហា ឆ្លាម ជាជើងខ្លាំងនៅស្រុកថៃ ។ គេធ្លាប់មកប្រកួតនៅភ្នំពេញម្តងហើយកាលពីថ្ងៃទី០១កញ្ញា២០១៨ ដោយផ្តួលសេង ស្រឿនអ្នកប្រដាល់ក្លិបមហិទ្ធរិទ្ធតាដំបងដែក អោយសន្លប់ក្នុងទឹកទី២ ។ បើតាមលោកញាណ សុធី អ្នកចាត់ចែងកម្មវិធីប្រដាល់ប្រចាំSEA-TVអោយដឹងថា អ្នកប្រដាល់ថៃរូបនេះ មានប្រវត្តិប្រកួតចំនួន៥៨លើក ឈ្នះ៥១លើក ចាញ់០៧លើក និង មិនដែលស្មើ ។
វេង សុភ័ក្រ ជើងខ្លាំងស្រករក្រោយរបស់កម្ពុជា គេធ្លាប់ប្រកួតជាមួយថៃបាន២១លើកហើយ ដោយវាយឈ្នះ១២លើក ចាញ់ ០៦លើក និងស្មើ០៣លើក ។ សុភ័ក្រ គេមានបទពិសោធន៍ច្រើនក្នុងការប្រកួត ដោយគេមានកណ្តាប់ដៃល្អ វាយចេញចូលរហ័ស ហើយស្នៀតទាត់និងជង្គង់ កែង ក៏ល្អថែមទៀត ។
ទោះជាបែបនេះក្តី មិនទាន់ហ៊ានសន្និដ្ឋានថា វេង សុភ័ក្រជួបសំណាងល្អនៅក្នុងការប្រកួតជាមួយអ្នកប្រដាល់ថៃ ហា ឆ្លាម នេះឡើយ ? ចាំមើល សុភ័ក្រ អាចយកឈ្នះ ហា ឆ្លាមបានឬអត់ សម្រាប់ជំនួបលើកនេះ ? ។ វេង សុភ័ក្រ ប្រកួតចុងក្រោយជាមួយថៃ គេបានវាយចាញ់Pek Theing ដោយពិន្ទុ ។
គង់ សំបូរ អ្នកប្រដាល់ជើងខ្លាំង ដែលបានបាត់មុខពីសង្វៀនជិតមួយឆ្នាំនោះ ពេលនេះគេបានវិលត្រឡប់មកប្រកួតវិញហើយ ដោយប្រកួតអោយក្លិបអាណាចក្រប្រយុទ្ធខេត្តសៀមរាប ព្រោះគេបានទៅនៅនិងហ្វឹកហាត់នៅទីនោះ។
សំបូរ ត្រូវគេផ្គូអោយជួបប្រកួតជាមួយចេង គា អ្នកប្រដាល់ក្លិបសាលវ័ន្តកីឡាដោយ ប្រកួតក្នុងទម្ងន់៦៣,៥០០គីឡូក្រាម ។ ពីរនាក់នេះ មិនធ្លាប់ជួបគ្នាទេពីមុនមក ។ អ្នកណាឈ្នះ អ្នកណាចាញ់ មិនអាចទាយមុនបានទេ ព្រោះគង់ សំបូរ ខានប្រកួតយូរ។
ចំណែក ភួង ពិសិដ្ឋ អ្នកប្រដាល់ក្លិបរាជសីហ៍ខេត្តរតនគិរី នឹងជួបប្រកួតជាមួយនួន រ៉ាថេន អ្នកប្រដាល់ក្លិបតាឯកដំបងដែកមានរិទ្ធខេត្តព្រៃវែង។ ពួកគេប្រកួតគ្នាក្នុងទម្ងន់៥៧គីឡូក្រាម៕
Source: Kampuchea Thmey Daily
0 Comments